Read Masana 2 LABAR-MA-LIYNA 10 Bible Online

2 LABAR-MA-LIYNA 10 - Masana bible

2 LABAR-MA-LIYNA 10

¹Robowam kali hay Sikem, kay sum sa Israyel kaf co hay Sikem kay tunum mulu.

²Hay li ma Yerobowam goora vi Nebat hum kayni, nam ay goy hay Egipte, kay nam pir goyo kay mulla Salomon; Yerobowam hotay hay Egipte pa.

³Nisi gi sunda kalamu kay yumaya. Ki kayn nala Yerobowam hiɗi sa Israyel kaf co'o, nisi di tam Robowam ala:

⁴Buŋu tun jak ma nekŋ kuma'a, may wulin kayni, lopna ma ɗeŋŋa hiɗi jak ma nekŋa ma nam tunum kuma'na naŋ ma ma muɗum hefteŋe, nala numa ma sunaŋu may.

⁵Nam di tisiya: Nigi ma hotay tanu hay buur ɦidi. Sumun kaliya may.

⁶Mulla Robowam job sa maariyana sa ay mus kat bulumu hay li ma bulum ays iri tuwa, nam di tisiya: Gatta ta nigi vul tanu kay nan ma hot dit tam sumun kayni ti gatta mige?

⁷Nisi ka di talam ala: La naŋ li ŋaa tam sumun kayni, la naŋ visi hiɗi firita, la naŋ lawsi hiɗi ŋaa'a, nisi ma li si sa sunda vaŋu dok-doko.

⁸May Robowam min vi gatta vi sum sa maariyanɗi, nam jobsi si sa wul hiɗi nam kuɗ tuwsina, sa ka lak talamna.

⁹Nam disiya: Sumun kayni di tan ala jak ma nekŋa ma bun tunum kelsina nan ma muɗum hefteŋe. Gatta ta nigi min vul tanu kay nan ma hotsi dit hiɗi na'a ti gatta mige?

¹⁰Nisi sa bokiyomna sa wul hiɗi namna ka di talam ala: Sum nisina sa jobaŋ ala buŋ tun jak ma nek kisiya, naŋ muɗum hefteŋe na, naŋ ma di tisiya ala: Cita-ɓan ta goota na' ŋolo suw fur bunu.

¹¹Wulin kayni, bun tun jak ma nek kigiya, nan hayɗini, jak ma nek ma kigina nan muɗum nek suwa; bunu watgi hiɗi libetna, may nanu, nan ma watgi hiɗi ɦurduwna.

¹²Yerobowam hiɗi sumun kaf co kat Robowam hay buurta ɦidita, kuɗ dita ta nam di tisi kay nisi ma co talamu hay buurta ɦidita.

¹³Mulla hot dit tisi hiɗi delem ɗeŋe. Mulla Robowam min vi kuɗ gatta vi sum sa maariyanɗi,

¹⁴nam law tisi kuɗ gatta ta sa joriyon di talamta ala: Nan ma tun jak ma nek kigiya, nan ma muɗum neke, bunu watgi hiɗi libetna, may nanu, nan ma watgi hiɗi ɦurduwna.

¹⁵Ki kayn nala mulla min hum dita vi sumunɗi; kay lawt kayni guna' dela' kayn mi Lawna, kay hob vun yoboy ma Ma-Vatɗin dum hay vun Ahiya ma Silona kat Yerobowam goora vi Nebat.

¹⁶Hay li ma sumun kaf wi ala mulla may humsi vunsiɗi, nisi hot dit tam mulla: Voco ma ka jaray dar hiɗi David mi mige? Voco may jaray dar hiɗi gurona vi Isayɗi. Wulin kayni, nisi sa Israyella, gigekaw kal hay guɗukŋa valamu valamu, nigi jafna vi David, gargi tin vun tuwgiya.

¹⁷Nala sum sa Israyel kaf kali hay guɗukŋa visiya visiya. Sum sa Israyella sa hin hay hoyok-ziyna vi Yudana, Robowam ti mul kisiya.

¹⁸Bugolda mulla Robowam gi Hadoram ma ŋom sa li lopna. May sa Israyella gum hiɗi goorhoyona, nam mita. Mulla Robowam donota valam hini kayni kay ɓe kay keke-ma-duura kay pir hay Yerusalem tuta.

¹⁹Ki kay nala sum sa Israyella yaw kulo'o kat ziyna vi David ta-ta vaydi.