Read Masana 2 LABAR-MA-LIYNA 11 Bible Online

2 LABAR-MA-LIYNA 11 - Masana bible

2 LABAR-MA-LIYNA 11

¹Hay li ma Robowam co hay Yerusalem, nam tok jafna vi Yuda hiɗi Benyamin, sum sa wi duura birim kis kalam dok-glafandi, kay nisi ma tuɗ dur sa Israyella kay hot mulda ay hay gaŋeraŋa valamu.

²May Lawna di yoboyn tam Semayeya sana vi Lawna ala:

³Naŋ ma di tam Robowam goora vi Salomon, mulla vi Yuda, tam sa Israyella hay Yuda hiɗi hay Benyamin kaw, kay naŋ ma disi ala:

⁴Ma-Vatɗina ka di ala: Nigi ma tuɗ dur guro-biyoginɗi, sa gige gigekaw ma hot hay ziyna valamu valamu. Kay lawt kayni na' may goy van nan pa. Nisi hum kuɗ yoboyna vi Ma-Vatɗina, hotay misi vo'o may, min tuɗ dur Yerobowam loɗi.

⁵Robowam mus hay Yerusalem, nam kot Hoyok-ziy ma donona hay Yuda.

⁶Nam in Betlehem, Etam, Tekowa,

⁷Bet-Sur, Soko, Adullam,

⁸Gat, Maresa, Zif,

⁹Adorayim, Lakis, Azeka,

¹⁰Soreya, Ayalon hiɗi Hebron hay Yuda hiɗi hay Benyamin. Nam kayni mi Hoyok-ziy ma donona.

¹¹Nam kot gulmun talamu, lak sum sa ŋomomna, lak sle ma tina, mula hiɗi vinna kaw haya.

¹²Hay Hoyok-ziy namna kaf maray ma ŋulona hiɗi kawayna ka'a, nam muɗum dono ŋolo. Jafna vi Yuda hiɗi Benyamin ay ir valamu.

¹³Muliyan-sa-ɗifinna hiɗi sa Levitna sa ka hay Israyel kaf, yaway hay nagata visi kaf, nisi gi dirsi kuɗumu;

¹⁴kay sum sa Levitna hin ziyna visiya hiɗi slena visi goyo, nisi kali hay Yuda hiɗi Yerusalem, kay mige Yerobowam hiɗi gurona valamu telsi goyo kay li lopna vi ɗifinna hay sem Ma-Vatɗina.

¹⁵Yerobowam tun muliyan-sa-ɗifinna kay liyn ma ɗiŋiriŋŋa, kay guro-luwayna hiɗi fukunayna ma nam inimna.

¹⁶Nisi sa hay jafna vi Israyel kaf sa diksi min kay gar Ma-Vatɗina Lawna vi Israyel tap kuɗ sa Levitna hay Yerusalem, kay li ɗifin tam Ma-Vatɗina, Lawna vi sumaysiya.

¹⁷Nisi muɗ mulda vi Yuda dono'o, Robowam goora vi Salomon kaw nisi muɗum dono'o ir busat ɦidi; kay jar busat ta ɦidit lakŋi, nisi poy hay hagata vi David hiɗi Salomon.

¹⁸Robowam sli Mahalat goota vi Yerimot goora vi David hiɗi Abihayil goota vi Eliyab goora vi Isay.

¹⁹Na' vuɗum gurona: Yewus, Semariya hiɗi Zaham.

²⁰Bugola' na'a, nam hot sli Maaka, goota vi Absalom. Na' vuɗum Abiya, Attay, Ziza hiɗi Selomit.

²¹Maaka goota vi Absalom, Robowam mina' ŋolo suw boyna valamu hiɗi boy sa sunda valam kafe, kay nam yaw boyn doogo yam glafandi, boy sa sunda dok-karkiya, nam vuɗ guro sa jufayn dok-ma' yam glafandi, guro-boyn dok-karkiya may.

²²Robowam vul liyn ma vokŋa mi Abiya, goora vi Makka, kay nam ma li mi ma ŋolla vok guro-biyomna kay nam min kay tunum mulu.

²³Nam fi yalda kay mer gurona valamu goy hay nagata vi Yuda hiɗi Benyamin kafe, hay hoyok-ziyna ma donon kafe; nam vulsi sle ma tin ŋolo, job boyn kisi ŋolo kaw.