Read Masana 2 LABAR-MA-LIYNA 12 Bible Online

2 LABAR-MA-LIYNA 12 - Masana bible

2 LABAR-MA-LIYNA 12

¹Hay li ma mulda vi Robowam muɗ dono muɗna, hay li ma nam kay tuwam kaw muɗ dono muɗna, nam noy gatta vi Ma-Vatɗin goyo, sum sa Israyel kaf hiɗi namu kaw.

²Hay busata vaslta vi mulda vi Robowam, Sisak, mulla vi Egipte, fok kulo'o kat Yerusalem, kay nisi min vi kuɗ Ma-Vatɗinɗi.

³Nam ka hiɗi keke-ma-duura birimi hiɗi kis-ma', sa ɓe kulumayn birim dok-karkiya, sum sa coy hiɗi nam hay Egipte pana ŋol zututu, sa Libiyana, sa Sukkiyena, hiɗi sa Etiopiyana.

⁴Nam sli Hoyok-ziy ma donona ma ir vi Yudana, co ta-ta hay Yerusalem.

⁵Nala sa ma jobta Semayeya kali kat mulla Robowam hiɗi sa ŋulona vi Yuda, sa fi yam tuwsi hay Yerusalem hay li ma nisi wi ala Sisak ka co'o. Nam di tisiya: Ma-Vatɗin ka di tigi ala: Nigi noyanawa goyo, nan kaw, nan min noygi goyo hay ɓam Sisak.

⁶Sa ŋulona vi Israyel hiɗi mulla hot yisi gaa'a, nisi di'e: Ma-Vatɗina nam ɗigere.

⁷Hay li ma Ma-Vatɗin wi ala nisi ka hot yisi gaa'a, nam di yoboyn tam Semayeya ala: Nisi hot yisiyawa gaa'a, nala nan ma vatsi goy loɗi; hini neeɗa ɦawa, nan ma vulsi hagata kay nisi ma hulot goyo, nala ɦiyda vanu ma mer goy hay Yerusalem kaf hiɗi ɓam Sisakɗi.

⁸Hiɗi kayni kaf, nisi ma li gorvo valamu, nisi ma wi ala sunan nanu hiɗi sun muliyan sara'a nam ir valamu valamu.

⁹Sisak mulla vi Egipte fok kulo'o kat Yerusalem. Nam yaw timgilla ma ka hay Tempella hiɗi timgil ma ka hay ziyna vi mulla. Nam yawam kafe. Nam yaw maray ma ora ma Salomon kotomna.

¹⁰Mulla Robowam kot maray ma wayna hay baŋalamu, nam vulum hay ɓam sa ŋulona vi sa jaŋŋa, sa ka ŋom vun-ziyna vi mulla.

¹¹Hay liyn kaf ma mulla min kal hay ziyna vi Ma-Vatɗina, sa jaŋŋa co'o, nisi ziy marayna; bugolda nisi hotom hay ziyna vi sa jaŋŋa.

¹²Kay Robowam hot yalam gaa'a, Ma-Vatɗina vat ɦiyda valam goy talamu, kay vatam (mulda valam) goy noŋ kafɗi. Slen ma ŋaana ka malam hay Yuda kaw.

¹³Mulla Robowam muɗ dono'o hay Yerusalem, nam ti mulda. Hay li ma Robowam tun mul kayni, busata valam asay dok-fiɗi yam kepe, nam ti mulda ir busat doogo yam siɗiya hay Yerusalem, hoyok-ziyna ma Ma-Vatɗina vilekemu jar Israyel kafe kay tun semda valam haya. Sulumu semda va'a Naama, na'a ti ta Amonta.

¹⁴Nam li joota, kay nam min tun dikamu kay gar Ma-Vatɗinɗi.

¹⁵Lopna vi Robowam, ma jewna hiɗi ma cawna, ka ɗoya hay ɗerwelda vi ma jobta Semayeya, hiɗi ma wi vokomna Iddo kay li ŋaɓta valam goyo.[5] Duura li jar Robowam hiɗi Yerobowam dok-doko.

¹⁶Robowam miti kuɗ sumiyamu, nisi pum hay hoyok-ziyna vi David. Goora valamu Abiya ti mulda hay baŋalamu.