Read Masana 2 LABAR-MA-LIYNA 13 Bible Online

2 LABAR-MA-LIYNA 13 - Masana bible

2 LABAR-MA-LIYNA 13

¹Hay busata doogo yam glafandita vi Yerobowam hay mulda, Abiya ti mulda hay Yuda.

²Nam ti mulda busat ɦidi hay Yerusalem. Sem sulum ala Mikaya, goota vi Uriyel ma Gibeyana. Duura li jar Abiya hiɗi Yerobowam.

³Abiya fok duura hiɗi soje sa wi duur ŋaana, sum sa wi duura birim kis-fiɗi; Yerobowam fok duura hiɗi nisiya, hiɗi sum sa wi duura birim kis-glafandi, sum sa wi duura sa dono ŋolla.

⁴Kulo kay hiɗiyta Semarayim, ta ka tapay tam hiɗiyta vi Efrayim, Abiya fok kulo'o nam di'e: Naŋ humanu, Yerobowam, hiɗi nigi sa Israyella kaf kaw!

⁵Ma-Vatɗina vul mulda mi David hiɗi gurona valam kaw mi sa Israyella kay dok-doko, kuɗ bonota ta sa as kusa'ɗita nigi may wi kaynɗi su?

⁶May Yerobowam goora vi Nebat, sa ma sunda vi Salomon goora vi David fok kulo'o, nam ŋel vun mulamna.

⁷Sum sa nagayɗina, sa tulurina, tok tuwsi katamu, nisi kol kay Robowam, goora vi Salomon. Robowam ay joriyo'o, bay vari, nam min col ɗeŋ voksiɗi.

⁸Wulin kayni, nigi di ala nigi ma kol kay mulda vi Ma-Vatɗina, na' ta ka hay ɓam gurona vi David. Nigi kayni si jaf-sum sa ŋol dak-dak, guro-luway ma ora ma Yerobowam kotom kigiya ki lawayna vigi nalana ka jargi ŋol dak-daki kaw.

⁹Muliyan-sa-ɗifinna sa sunda vi Ma-Vatɗina gurona vi Aaron hiɗi sa Levitna nigi may noysi goyɗi su? Nigi kay tuwgi gar muliyan-sa-ɗifinna ki sum sa hay naga hena nala ɗisu? La gigekaw co hiɗi put ma joriyo'o tapay hiɗi fok-gamala siɗiya kay nigi tunum hay lopna ni, nigi tunum mul-ma-ɗifinna vi sle ma may Lawnɗin de'.

¹⁰Numa hayɗini, Ma-Vatɗin kayn mi Lawna vuma'a, numa bay noyom goyo, muliyan-sa-ɗifinna sa ka sun Ma-Vatɗina nisi si gurona vi Aaron, li lopn kayn si sa Levitna kaw.

¹¹Hay graw culumta hiɗi vulatita dok-doko, numa ka li ɗifin ma ŋal-goyna tam Ma-Vatɗina, numa ka ŋal urdi ma hisna, numa ka zlar funa kulo kay table ma peldetna, hay vulatit kaf numa ka ŋal va ma tun fitilla ma ora hiɗi fitilla valamu; kay numa ka li kuɗ dita vi Ma-Vatɗina, Lawna vuma'a. May nigiya, nigi noyomawa goyo.

¹²Humgiya, Lawna hiɗi sa sunda valamu ka jarma'a, ka tuni vokma'a, numa ka hiɗi togolomna hay ɓuma'a kay buwum katgiya (kay durgiya). Nigi gurona vi Israyel, ligi duura kat Ma-Vatɗina Lawna vi sumaygiɗi, kay nigi as kay kolɗi.

¹³Yerobowam gi ir sojen goy bugolsiya, ki nisi ka moksiya nala, soje segena ka zlaray vok sumuna vi Yuda may.

¹⁴Sumuna vi Yuda muɗ irsiya, kay duura ka voksiya, bugolsiya kaw. Nisi siwel tam Ma-Vatɗina, muliyan-sa-ɗifinna buw togolomna.

¹⁵Sumuna vi Yuda pat ciriyna, kuɗ ciriyna vi sumuna vi Yuda, Ma-Vatɗina ci Yerobowam hiɗi sa Israyella kaf vok Abiya hiɗi Yuda.

¹⁶Sumuna vi Israyel mun jaŋi vok Yuda, Lawn vulsi hay ɓam Yuda.

¹⁷Abiya hiɗi sumuna valamu ci sumun kuɗsi ŋolo, sum sa wi duura birim kis-vasl fi cita kuɗ sum sa Israyella.

¹⁸Hay na'ta kayni nisi hot yam gurona vi Israyel gaa'a, gurona vi Yuda kol kisiya, kay nisi jun tuwsi tam Ma-Vatɗina Lawna vi sumaysiya.

¹⁹Abiya digiɗ Yerobowam, nam yaw hoyok-ziy kuɗumu; Betel hiɗi hoyok-ziy ma kuɗa'na, Yekana hiɗi hoyok-ziy ma kuɗa'na, Efron hiɗi hoyok-ziy ma kuɗa'na.

²⁰Yerobowam hin bay dono'o hay liyna vi Abiya, bugol kayni Ma-Vatɗina watamu, nam cap mita.

²¹May mulda vi Abiya muɗ dono'o. Nam yaw boyn doogo yam fiɗi, vuɗ guro sa jufayn dok-ma' yam ma', guro-boyn doogo yam karkiya may.

²²Caw lopna vi Abiya ma hinina, slen ma nam lumna hiɗi ma nam dumna, kayni ka ɗoy hay ɗek-lawta vi sa ma jobta Iddo.

²³Abiya miti kuɗ sumiyamu, nisi pum hay hoyok-ziyna vi (bulumu) David. Goora valamu Asa ti mulda hay baŋalamu. Hay liyna valamu, nagat mus hay sle'ta ir busat doogo.