Read Masana 2 LABAR-MA-LIYNA 14 Bible Online

2 LABAR-MA-LIYNA 14 - Masana bible

2 LABAR-MA-LIYNA 14

¹Asa li slen ma ŋaana ma ɗigera vok ir Ma-Vatɗina Lawna valamu.

²Giwin-ma-ɗifinna ma girif lawayn ma waana ma kulo hay ɗiŋiriŋŋa nam tom goyo, nam to slen ma inin gaa'a, naga ma iniya ma yum ala Asera* nam tom gaa'a kafe.

³Nam di tam sumuna vi Yuda kay nisi gar Ma-Vatɗina, Lawna vi sumiyamu, kay nisi ma li kuɗ gatta hiɗi vun-ma-gatna.

⁴Hay hoyok-ziyna vi Yuda kaf, liyn ma ɗiŋiriŋŋa hiɗi liyn ma ŋal urdina nam tom goyo, hiɗi namu nagat mus hay sle'ta.

⁵Nam in hoyok-ziy ma donona hay Yuda; kay nagat tun ŋal kiliŋ, hay busa namna cani sum sa durum sayɗi, kay mige Ma-Vatɗin vulum tun-sukka.

⁶Nam di tam sumuna vi Yuda: Inay hoyok-ziyn lakŋi, ŋuyay gulmun talamu, kotay simdira hiɗi vun-galana hiɗi malla ma kawayna talamu; nagata ka vok iray tuwa, kay nay gar Ma-Vatɗina Lawna vaya; nay garamawa nam vulay tun-sukkawa goy hay galay kafe. Nisi in hoyok-ziy namna hiɗi donota.

⁷Asa ka hiɗi soje birim kis-ɦidi kuɗ sumuna vi Yuda, sa ziy maray ma ŋulona hiɗi kawayna, segena birim kis-ma' hiɗi diram dok-glafandi kaw kuɗ sumuna vi Benyamin, sa ziy maray ma gurayna, gi ɓarawta kaw, kaf si sum sa jufay sa donona.

⁸Zerak ma Etiopiyana kali goy kirsiya hiɗi sojen kuɗum miliyoŋ kep, keke-ma-duur kis-ɦidi, nam ɦuray vokomu ta-ta hay Maresa.

⁹Asa kal ay goy vokomu, nisi zlar goyo kay li duura hay liyn ma lokŋa vi Sefata, goboy hiɗi Maresa.

¹⁰Asa yi sem Ma-Vatɗin Lawna valamu nam di'e: Ma-Vatɗina, naŋ as co kay gut kuɗ sa ma donona hiɗi sa ma maŋayn kaw ŋray ca: Naŋay gutaŋ kuɗma'a, Ma-Vatɗina Lawna vuma'a, kay numa deŋ tuwma kayni kataŋ naŋu, numa co dur vok ma hini-hini namna kayni hay semda vaŋu. Ma-Vatɗina, naŋu mi Lawna vuma'a: May ŋaa kay san kol kaŋɗi.

¹¹Ma-Vatɗina digiɗ sa Etiopiyana vok Asa hiɗi sumuna vi Yuda, nala sum sa Etiopiyan mun jaŋi.

¹²Asa hiɗi sum sa kuɗumna munsi ta-ta hay Gerar, sum sa Etiopiyan cuk gaa'a bay fi yal ma suɗ tuwsi goyo, kay nisi meray goyo vok Ma-Vatɗina hiɗi sumuna valamu. Asa hiɗi sumuna valamu yaw sle ma ɓuraŋŋa ŋolo;

¹³nisi ci sum sa hay hoyok-ziy ma goboy hiɗi Gerar, kay narta vi Ma-Vatɗina kal hay diksiya, nisi vurum hoyok-ziyn kafe, kay sle ma vurumna ka hay hoyok-ziy namna ŋolo.

¹⁴Nisi to guɗukŋa vi farayn gaa'a kaw, nisi mar fukunayna hiɗi lamgan kuɗsi ŋolo kaw. Bugolda nisi hot hay Yerusalem.