Read Masana 2 LABAR-MA-LIYNA 15 Bible Online

2 LABAR-MA-LIYNA 15 - Masana bible

2 LABAR-MA-LIYNA 15

¹Ŋusta vi Lawna cuk kay Azariya goora vi Oded,

²nam kali goy kir Asa, di talam ala: Humangiya, Asa, jafna vi Yuda hiɗi Benyamin kaf kaw, Ma-Vatɗina ka hiɗi nigiya hay li ma nigi ka hiɗi namu, la nigi garamu, nigi as fumu, may la nigi noyom goyo, nam ma noygi goyo kaw.

³Jar buura ŋolo, Lawn ma gasiya kay sa Israyella mayɗi, mul-ma-ɗifinna ma li hatta mayɗi, gatta tayɗi kaw.

⁴May hay li ma nisi ka vun zlata, nisi hotay kat Ma-Vatɗina, Lawna vi Israyel, nisi garamu; nam hinsi fumu.

⁵Hay li namna kayni, sum sa poy goyna sle'ta may kisi noŋɗi, kay ɦilayta ka jar sum sa hay nagatna kafe;

⁶jaf-sumun ka dur tuwsiya tuwsiya, hoyok-ziyn ka dur tuwamu, kay mige Lawna ka hiwir sumuna hiɗi makka mara'a mara'a kafe.

⁷Nigi hayɗini, lakgi ɗeŋe, hingi ɓigi muɗ maŋayɗi, kay wurakŋa kay lopna vigi ka'a.

⁸Hay li ma Asa hum yoboyna ma sa ma jobta Oded dum dina, nam muɗ ɗeŋe, lawayn ma liwisna ma ka jar jafna vi Yuda hiɗi jafna vi Benyamin kaf hiɗi ma hay hoyok-ziyna ma nam yawam kulo kay hiɗiyta Efrayim kaf nam tom goyo. Nam hot in giwin-ma-ɗifinna vi Ma-Vatɗina ma ka vok diɓira vi Ma-Vatɗina.

⁹Nam tok jafna vi Yuda hiɗi Benyamin kaf hiɗi jafna vi Efrayim, jafna vi Manase hiɗi Simeyon sa jok ziy jarsiya, kay jafna vi Israyel ŋolo gi dirsi kuɗumu hay li ma nisi wi ala Ma-Vatɗina Lawna valamu ka hiɗi namu.

¹⁰Nisi tok tuwsi hay Yerusalem hay til ma ɦidina vi buurta doogo yam vaslta vi mulda vi Asa.

¹¹Hay buur na'ta kayni, nisi li ɗifini tam Ma-Vatɗina kuɗ sle ma ɓuraŋŋa ma nisi maramna, luwayna kis-siɗiya, fukunayna birim siɗiya may.

¹²Nisi col dita visi ala nisi min gar Ma-Vatɗina, Lawna vi sumaysiya, hiɗi diksi kaf, hiɗi ciwta visi kafe kaw.

¹³La san gigekaw la nam min gar Ma-Vatɗina Lawna vi Israyelɗi, nisi as cum goyo, la nam ŋolo lebo gooro, la nam mi sa jufu lebo ca'a kaw.

¹⁴Nisi yi va kisi tam Ma-Vatɗina hiɗi delsi kulo ŋolo, hiɗi ciriyna, hiɗi buwna vi togolomna hiɗi difna.

¹⁵Jafna vi Yuda kaf li firiya kay va namna ma nisi yum kisina, kay nisi yi va kisi kayni hiɗi diksi kaf, nisi gar Ma-Vatɗin kayni hiɗi diksi kaf, nam hin tuwam a nisi fumu kaw. Ma-Vatɗina vulsi tun-sukka goy hay galsi kaf.

¹⁶Mulla Asa yaw gaŋeraŋa vi cata-mulda goy hay ɓam sulum Maaka noŋo, kay na' kot Lawn ma waana kay Asera*. Asa to lawayna va' ma waan goyo, nam muɗum goy butuw-kuwa, ŋalam goy hay lokŋa vi Sedron.

¹⁷May hiɗi dikga vi Asa ta nam vula' tam Lawna hay buurta irita valam kaf kaw, liyn ma ɗiŋiriŋŋa hay Israyel may vat goyɗi.

¹⁸Slen ma bulum vulum goy tam Lawna hiɗi ma nam vulum goy tam Lawna kaw, doorota hiɗi ora hiɗi slen mara'a mara'a kaf, nam maram hay ziyna vi Lawna.

¹⁹Duura may li noŋɗi ta-ta hay busata dok-ɦidi yam vaslta vi mulda vi Asa.