Read Masana 2 LABAR-MA-LIYNA 16 Bible Online

2 LABAR-MA-LIYNA 16 - Masana bible

2 LABAR-MA-LIYNA 16

¹Hay busata dok-ɦidi yam karkiyata vi mulda vi Asa kayni, Bayeska, mulla vi Israyel, fokiya kay tuɗ dur Yuda. Nam in gulmun tam Rama kay tel sumuna vi Asa kay nisi ma kal goyɗi, hot voɗi kaw.

²Asa yaw doorota hiɗi ora ma hay timgil ma kalaf vi Ma-Vatɗina hiɗi ma hay ziyna vi mulla, nam gi sunda tam Ben-Hadad mulla vi Siriya ma ka musi ziy hay Damas, (kay dum ala):

³Naŋu hiɗi nanu nay ma jun bonot jar-tuwaya, ki bonot liys jar bunu hiɗi buŋu nala. Tani nan vulaŋ doorota hiɗi ora, tuɗaŋu, bonota ta jaraŋ hiɗi Bayeska mulla vi Israyel naŋ ma ja' goyo, kay nam ma vi tuwam goy tan gine'e.

⁴Ben-Hadad hum dita vi mulla Asa; nam cuk sa ŋulona vi sojena valamu kat hoyok-ziyna vi Israyel, nisi ci sum sa hay Iyon, Dan, Abel-Mayim, hiɗi liyn ma lak jakŋ haya hay hoyok-ziyna vi Neftali kaf kaw.

⁵Hay li ma Bayeska hum kayni, nam min in (gulmun tam) Rama loɗi, nam hin lopna.

⁶Ki kayn nala Asa yaw sumuna vi Israyel hiɗi Yuda kaf kuɗumu, hiɗiyna hiɗi guna ma nisi molomu kay in Rama hiɗi namna nisi yawamu, nisi kot Geba hiɗi Mispa hiɗi namu.

⁷Hay liy namna kayni, ma wi vokomna Hanani kali kat Asa mulla vi Yuda, nam di talam ala: Kay naŋ gara' ti donota vi mul ma Siriyana, kay naŋ min gar donota vi Ma-Vatɗina Lawna vaŋɗi, sojena vi mulla vi Siriya hulotawa goy hay ɓaŋu.

⁸Sum sa Etiopiyana hiɗi sum Libiyana sojena visi ka tokay yam tuwsi ŋolɗi su? Hiɗi keke-ma-duura, hiɗi sa jaŋ kulumayna kaw ŋol dak-dak ɗisu? May hiɗi kayn kaf Ma-Vatɗin vulsi hay baŋu, kay mige naŋ gar donota valamu.

⁹Kay Ma-Vatɗina iram ka cuki kay nagat kaf, kay sum sa diksi vuli malam kafna ma fi dono'o. Kay hay lawta kayni naŋ ki sa ma ɦay-ɦayna nala, wulin pa naŋ ma fi duura.

¹⁰Asa dikam ɓulak kat sa ma wi vokomna, nam gum daŋgaya, kay nam muɗ ɦiy katamu kuɗ lawta kayni. Hay na'ta kayni, Asa curoɗ sum segen kaw.

¹¹Lopna vi Asa, ma jewna hiɗi ma cawna, nam ka ɗoy hay ɗerwella vi muliyana vi Yuda hiɗi Israyel.

¹²Hay busat dok-ɦidi yam zleeŋeta vi mulda valamu, moy ma ŋolla vi Asa hay selemu; hiɗi kayn kaf, hay moyna valam noŋ kaw, nam min gar Ma-Vatɗinɗi, garsi si sa yer sumuna.

¹³Asa miti kuɗ sumiyamu; nam mit hay busata dok-fiɗi yam kepta vi mulda valamu.

¹⁴Nisi pum hay zulda kep ta nam jugoɗa' kalamu hay hoyok-ziyna vi David. Nisi burum kay raŋgawna ma nisi kotom hiɗi urdi ma hisna, hiɗi urdi ma kotom si sum sa wum lopna valam ŋaa'a, nisi ŋal urdin ir ŋol suw asa kalamu.