Read Masana 2 LABAR-MA-LIYNA 18 Bible Online

2 LABAR-MA-LIYNA 18 - Masana bible

2 LABAR-MA-LIYNA 18

¹Yosafat fi farayna hiɗi gajijita ŋolo. Nam tun slita jaram hiɗi Akab.

²Hay vatta vi busat ir neeɗa, nam kali kat Akab hay Samariya, Akab li ɗifin kalamu, kay sum sa ay hiɗi namna kaf kaw, nam ŋat fukunayna hiɗi luwayn ŋolo. Nam zutumu kay nam ma tuɗ hay Ramot vi Galaad.

³Akab mulla vi Israyel di tam Yosafat mulla vi Yuda: Naŋ min tuɗ hiɗi nanu hay Ramot vi Galaad su? Yosafat hot dita: Awa, nanu ki naŋ nala, sumuna vanu ki sumuna vaŋ nala, numa min tuɗis hiɗi naŋu kay li duura.

⁴Bugol kayni Yosafat di tam mulla vi Israyel: Wulin kayni nan siɗawaŋu kay naŋ ma job dita vi Ma-Vatɗina.

⁵Mulla vi Israyel tok sa jobta, nisi tapay pet kis-fiɗi, nam di tisiya: Nay ma tuɗ kay li duura hay Ramot vi Galaad lebo tel tuway su? Nisi hot dita: Tuɗaŋ laŋ duura mulla, Lawna ma vulsi hay ɓaŋu.

⁶May Yosafat di'e: Sa ma jobta vi Ma-Vatɗina ma nay jobomu may tanɗi su?

⁷Mulla vi Israyel hot dit tam Yosafat, sa ma job Ma-Vatɗina vunamna ka kayn kep tuta; may nan minimɗi, kay nam may di vun-jobta ma ŋaa kanɗi, nam dum kan kayn mi vun-jobta joon dok-doko: Namu mi Mikka, goora vi Yimla. Yosafat di'e: Mulla, naŋ ma law ki kayn naɗi.

⁸Nala mulla vi Israyel yi sa ma patayn kep nam dumu: Naŋ ma garan Mikka goora vi Yimla ay gosoyo.

⁹Mulla vi Israyel hiɗi Yosafat mulla vi Yuda ka lakay kay zlamda-mulda visiya visiya, cuki hiɗi sligar ma mulda visiya, nisi ka lakay hay muɗakŋa hay vun-galana vi Samariya, sa jobta kaf ka di vun-jobta visiya.

¹⁰Sedekiyas goora vi Kenaana, nam kot miyok ma kawayna, ka di'e: Kayni ti dita vi Ma-Vatɗina: Hiɗi kayni naŋ ma jik sa Siriyana ta-ta naŋ ma vatsi goyo.

¹¹Sum sa jobta kaf ka di vun jobta ki kay nala, nisi ka di ala: Tuɗaŋ hay Ramot vi Galaad, naŋ ma kola, Ma-Vatɗina ma vulsi hay ɓaŋu, mulla.

¹²Sa ma giy sunu kay yi Mikka di talam ala: Sum sa jobta kaf vunsi kuɗ tuwsi kepe kay di slen ma ŋaana mi mulla; hin yoboyna vaŋu tap hiɗi fisina, naŋ kaw ma dum mi law ma ŋaana.

¹³Mikka hot dita: Ma-Vatɗina ka iriya, va ma Lawna van ma dantina nan ma dum goyo.

¹⁴Hay li ma nam co kat mulla, mulla dumu: Mikka, numa as tuɗ li duura hay Ramot vi Galaad su? Lebo nan as tel tuwam su? Nam hot dita: Tuɗgiya, nigi ma kola, nisi ma vulis goy hay ɓigiya kaw.

¹⁵May mulla di talamu: Nan ma halafaŋ sem gaage a naŋ ma dan gasita hay sem Ma-Vatɗina?

¹⁶Nala Mikka di'e: Nan wi sum sa Israyel kaf meray goy kay hiɗiyn ɓe'-ɓe' ki fok-dimina ma bay ŋomda nala. Ma-Vatɗina di ala: Sumun kayni sum sa ŋomda visi sayɗi, hin gigekaw hot hay ziyna valamu hiɗi toyta.

¹⁷Mulla vi Israyel di tam Yosafat: Nan may daŋɗi su? Nam may di law ma ŋaa kanɗi, may mi law ma joona!

¹⁸Ki kayn nala Mikka di'e: Awa ŋaa'a, humgi yoboyna vi Ma-Vatɗina: Nan wi Ma-Vatɗina musi kay zlamda-mulda valamu, sojena vi wuralawna kaf ka zlaray hay galam gulu hiɗi galam jufu kaf.

¹⁹Ma-Vatɗina di'e: Sa ma min ɗut Akab mulla vi Israyel kay nam ma tuɗ hay Ramot vi Galaad, a nam ma mit ɗawni mi gige? Nisi hot dit ir va'a va'a.

²⁰Ki kayn nala, ŋusta tara'a kali goy kepe, na' col goy vok Ma-Vatɗina, na' di'e: Nanu nan min ɗutumu. Ma-Vatɗin di'e: Ir nanige?

²¹Nam hot dit ala: Nan ma kal goyo, nan ma muɗ ti ŋusta vi sinda hay vun sa jobta valam kafe. Ma-Vatɗina di'e: Naŋ ma ɗutumu, naŋ ma vum hay ɗutta kaw. Kalaŋ goyo, laŋ ki kayni nala.

²²Wulin kayni, Ma-Vatɗina kal ŋusta ta ɗuttawa hay vun sa jobta vaŋ lakŋi; Ma-Vatɗina hin jootawa nig gaa kaŋu.

²³Ki kayn nala Sedekiyas goora vi Kenaana co'o, nam ci Mikka hay geliyamu, nam di'e: Ŋusta vi Ma-Vatɗina kali goy hayan pa kay law hiɗi naŋu kayni na' jikay arige pa?

²⁴Mikka di'e: Naŋ ma wi kayni ŋaa ŋolo hay buur ma naŋ ma kal hay ziy mara'a mara'a hay ŋay tuwaŋu.

²⁵Mulla vi Israyel di'e: Vigi Mikka, tuɗgit kat Amon mulla vi hoyok-ziyna, kat Yowas goora vi mulla.

²⁶Nigi ma di talamu: San kayni nigi ma gum daŋgaya, vulum fun ne' ne' ɦawa, vulum niyn ne' ne' ɦawa kaw, ta-ta hay li ma nan ma hotay hiɗi sle'ta tuwa.

²⁷Mikka di'e: La naŋ hotiyawa hay sle'ta, kayn di ala Ma-Vatɗina may di va tanɗi. Nam di lo: Humgiya, nigi sumun noŋ kafe.

²⁸Mulla vi Israyel hiɗi Yosafat mulla vi Yuda kali hay Ramot vi Galaad.

²⁹Mulla vi Israyel di tam Yosafat ala nam min jok nafaramu kay tuɗ vun duura; nam di tam mulla vi Yuda ala nam cuk sligara vi mulda talamu. Ki kayn nala mulla vi Israyel jok nafaramu, nisi kali vun duura may.

³⁰Mulla vi Siriya hin dita tam sa ŋulona vi keke-ma-duura valam ala: Nigi ma dur sa ŋolɗi, sa goorɗi kaw, may nigi ma durum mi mulla vi Israyel tuta.

³¹Hay li ma sa ŋulona vi keke-ma-duura irsi cuk kay Yosafat, nisi di'e: Kayni mi mulla vi Israyel. Nisi ŋuyumu kay durumu, Yosafat job gutda, Ma-Vatɗina gutumu may, Lawn digiɗsi goy gine hiɗi namu.

³²Sa ŋulona vi keke-ma-duura, hay li ma nisi wi ala kayni may mi mulla vi Israyelɗi, nisi vi tuwsi goy gine talamu.

³³San mara kep ɓe ɓarawta kuɗ ɦayta, na' vi mulla vi Israyel jar ŋoŋŋa. Mulla di tam sa ma jaŋ keke-ma-duura valamna: Muɗaŋ ŋoroŋu, naŋ ma kalan goy hay sine ma duura pa. Kay tuwan kaay goy mili.

³⁴Hay buur na'ta kayni duura li dono ŋolo. Nisi col mulla vi Israyel kulo vok sa Siriyana hay keke-ma-duura valamu ta-ta vulatita, hay li ma fatta ɗika, nam mita may.