Read Masana 2 LABAR-MA-LIYNA 19 Bible Online

2 LABAR-MA-LIYNA 19 - Masana bible

2 LABAR-MA-LIYNA 19

¹Yosafat mulla vi Yuda hotay hay sle'ta hay ziyna valamu hay Yerusalem.

²Yehu, goora vi sa ma wi vokomna Hanani, kali goy vok iramu. Nam di tam mulla Yosafat: San as kay gut sa ma joon su? Naŋ min sum sa ka gaw hiɗi Ma-Vatɗin su? Kuɗ kayni Ma-Vatɗin dikam ɓulakay kataŋu.

³May slen ma ŋaana ka hay dikaŋu, kay naga ma ini kay girif Asera* naŋ torom goyo hay nagata, naŋ tun dikaŋu kay gar Ma-Vatɗina.

⁴Yosafat mus hay Yerusalem. Bugolda nam ŋuy jar sumuna sem mara kep lo, fokay hay Bar-Seba pa ta-ta tam hiɗiyna vi Efrayim, nam hot sumunay tam Ma-Vatɗina, Lawna vi sumiyamu.

⁵Nam lak sa ka kitata hay hoyok-ziyn ma ŋulona vi nagat Yuda kaf, hay hoyok-ziyn kaf.

⁶Nam di tam sa kitata: Lakgi jigere kay slen ma nigi ma lumna, kay kitat nigi ka' ɗawni may ir vi sumunɗi, kitat nigi ka' ɗawni ir vi Ma-Vatɗina ma ka jargiya kay ɗigergiya.

⁷Wulin kayni, hingi narta vi Ma-Vatɗina cuk kigiya; ligi ŋali hay li ma nigi li va'a, kay ɗutta tay vi Ma-Vatɗina Lawna vayɗi, poŋ-irta tayɗi, vi vulda hay ɓam saɗi kaw.

⁸Nala kaw, hay li ma nisi hot hay Yerusalem, Yosafat tun sa Levitna, muliyan-sa-ɗifinna hiɗi sa ŋulona vi jafna vi Israyel kaw hay Yerusalem, kay li ɗigerta vi Ma-Vatɗina hay law ma ci-wayt ka kuɗumna.

⁹Nam vulsi hagat ala: Nigi ma li ki kayn nala hay narta kuɗ Ma-Vatɗina, hiɗi gasita, hiɗi dikga bay ɓuraw-goyta kaw.

¹⁰Hay kitat kaf ta ɓosiyogi sa ka lakay hay hoyok-ziyna visiya min mar tigiya, la kuɗ mat ma cina, kuɗ gatta, kuɗ vun-ma-gatna, kuɗ ɗota hiɗi slen ma colina kaf, nigi ma ɗeksi goyo, kay nisi ma muɗ tuwsi joo'o vok Ma-Vatɗinɗi, kay ɦiyda valamu ma ɗek tuwa' goy katgiya hiɗi bosiyoginɗi kaw. Nigi ma li ɗawni ki kayn nala, nigi ma kal tuwgi hay jootɗi.

¹¹Wulini mul ŋol ma-ɗifinna Amarya ka tuni vokgiya, kay ɗekgi slena vi Lawn noŋ kafe, Zebadya goora vi Ismayel, guverner ma hay jafna vi Yuda, kay ɗekgi slena vi mulla noŋ kafe. Sa Levitna ka vokgiya ki sa wi ɗota nala, lakgi ɗeŋe, ligi lopo, hin Ma-Vatɗina mus hiɗi sa ma li ŋaata.