Read Masana 2 LABAR-MA-LIYNA 2 Bible Online

2 LABAR-MA-LIYNA 2 - Masana bible

2 LABAR-MA-LIYNA 2

¹Salomon ŋaɓ sumun goy birim dok-siɗiya kay ziy jakŋa, sumun birim dok-glafandi, kay ceɗ hiɗiyna, sum sa ŋomsina birim ɦidi hiɗi kis-karkiya.

²Salomon gi sunda tam Huram mulla vi Tirus ala: Naŋ ma li tanu ki naŋ li tam bunu David nala, naŋ vulum gu-gamna aya kay nam ma in ziy ma nam fi mus haya.

³Wulini nan ka in ziya hay semda vi Ma-Vatɗina, Lawna vanu, kay vula' malamu, kay ŋal urdi ma hisna vok iramu, kay vulum fun ma zlaray kay tuwamna dok-doko, hiɗi ɗifin ma ŋal-goyna ma hay vulatita hiɗi graw culumta, hay buur sabatna, hay til ma wulina hiɗi yuldeta vi Ma-Vatɗina Lawna vuma'a, kay kayni dok-dok mi lop ma tuni kay sa Israyella.

⁴Ziyda ta nan min ina'ta ɗawni na' ma li ŋolo, kay Lawna vuma'a nam ŋol suw lawayn kafe.

⁵May sa ma ka hiɗi gaŋeraŋa kay inim ziyna mi gige? Kay dukalawna ma suw dukalawna may asamɗi? Nan gige ma asay kay inim ziya? Suw kayni lo nan asay kay ŋal urdi ma hisna vok iram su?

⁶Wulin kayni naŋ gan sa ma iram yal aya kay li lop ora, doorota, wayna, hiɗi kawayna, sligar ma tuwam ɗoy hiɗi purpella, ma slawna hiɗi ma goɗayna, sa ma wi yal kay ɗo tuw slena, kay nam ma li lopo hiɗi sum sa yali sa ka katan tani hay Yuda hiɗi Yerusalem, sum sa bunu David yawsiyays goyna.

⁷Hay Libaŋ pa naŋ ma jokan gu-gamna aya, gu-siprena hiɗi gu-santalla*; kay nan wi ala sa sunda vaŋu wi yal kay ka' guna ma hay Libaŋ. Sa sunda vanu kaw ma tap hiɗi sa faŋŋa.

⁸Nigi ma kotan gun ŋolo, kay ziyd ta nan min kota'ta ɗawni na' ma li ŋolo, jifiy ŋolo kaw.

⁹Sa sunda vaŋu sa ka' gun ɗawni, nan ma vulsi alkamarena ma duwi goyna ir koro* birim dok-ma', orgena ir koro birim dok-ma' kaw, vinna ir litir birim dok-ma', mula ir gasas birim dok-ma' kaw.

¹⁰Huram mulla vi Tirus hot dita hay ɗerwelda, nam joka' tam Salomon, ala: Kay Ma-Vatɗina min sumuna valamu, kuɗ na'ta kayni nam tunaŋ mul kisiya.

¹¹Huram hot di lo: Suburta tam Ma-Vatɗina Lawna vi Israyel, ma li wuralawna hiɗi nagata, kay nam vul goor ma yali mi mulla David, ma ŋalda valam ka'a, ma wida valamu waki-wak, namu ma min in ziyda mi Ma-Vatɗina, in ziyda-mulda kalam namu kaw.

¹²Wulini nan min gaŋ sa ma yali, ma wida valamu waki-wak, Huram-Abi.

¹³Nam mi goora vi cat kep jar guro-boyna vi Dan, bulumu mi sa ma Tirusna may. Nam wi yal kay li lop ora, doorota, wayta hiɗi kawayna, hiɗiyna hiɗi guna, sligar purpella hiɗi ma goɗayna, sligar ma haɓna hiɗi ma slawna. Nam wi yal ma ɓir tuw slena, hiɗi slen ma vulumta kay kotom kaf, hiɗi sumuna vaŋu sa yali, sumuna vi mulanna David ma buŋŋa.

¹⁴Wulin kayni, alkamarena, orgena, mula hiɗi vinna ma naŋ mulla van di kalamna naŋ ma joksitiya.

¹⁵Numa hayɗina, numa min ka guna vi Libaŋ ŋray ca ki naŋ min nala; numa ma dolomis goloŋ hay niyna ta-ta hay Yaffa, naŋ ma yawamu, kalam kulo hay Yerusalem may.

¹⁶Salomon ŋaɓ sum sa rogoyna sa hay nagata vi Israyel goy kafe, kayni si sum sa bulumu David ŋaɓsiyays jewna. Nisi fi sumun birim kis, hiɗi diram dok-vasl yam ɦidi kalam kis-karkiya.

¹⁷Nam yaw sumun kuɗsi birim dok-siɗiya kay ziy jakŋa, birim dok-glafandi kulo kay hiɗiyna kay ceɗemu, birim ɦidi hiɗi kis-karkiya kay ŋom sumuna, kay nisi ma li lopna.