Read Masana 2 LABAR-MA-LIYNA 20 Bible Online

2 LABAR-MA-LIYNA 20 - Masana bible

2 LABAR-MA-LIYNA 20

¹Bugol kayni gurona vi Mowab hiɗi gurona vi Amon, hiɗi sum sa Amonna kuɗsi kaw, nisi co'o kay dur Yosafat.

²Nisi co tam Yosafat dum ala: Sumun ŋol hini-hini, ka tuɗay hay gal hena vi niy-lumna, hay gal Siriya pa, nisi ka co duraŋu, nisi ka wulini hay Hatsason-Tamar, min di'e: Eyin-Gedi.

³Narta kal hay Yosafat, nam vilek kay job Ma-Vatɗina. Nam tun li laata kay sum sa hay Yuda kafe.

⁴Jafna vi Yuda tok tuwsiya kay gar Ma-Vatɗina, sumun coy hay hoyok-ziyna vi Yuda kafe pa kay gar Ma-Vatɗina.

⁵Yosafat col kulo'o jar sumuna vi Yuda, hiɗi sum sa Yerusalemna, hay ziyna vi Ma-Vatɗina, vok wur-daŋŋa ma wulina.

⁶Nam di'e: Ma-Vatɗina, Lawna vi sumayma'a, naŋu may mi Lawn ma hay wuralawnɗi su? Naŋu mi ma ka ti mulda kay muliyana hay nagat kafɗi su? Donota hiɗi gaŋeraŋa ka kayni hay ɓaŋ naŋɗi su? Sa ma as duraŋ naŋ mayɗi!

⁷Naŋ Lawna vuma kayni mi ma digiɗ jaf-sum sa hay nagan namna lakŋi goy vok sumuna vaŋ sa Israyella ɗisu? Naŋu mi ma vulsi kay dok-doko mi jafna vi David ma minaŋŋa ɗisu?

⁸Nisi lakawa hay ziy namna, nisi inaŋ liy ma peldetnawa hayamu hay semda vaŋu, kay nisi di'e:

⁹La va ma joo co kuma'a, kew-gaferaŋa, kitata, moyna, lebo mayta, numa ma lak vok ziyda tani, vok iraŋu, kay semda vaŋu ka hay ziyd zawni. Numa ma yaŋu kay naŋ gutma'a hay li ma numa ka vun zlata; naŋ ma huma, naŋ ma suɗma'a kaw.

¹⁰Wulin kayni, sum sa Amonna hiɗi sa Mowabna, hiɗi nisi sa ka hay hiɗiyta Seyir, sum sa naŋ may vul hagata tam Israyel kay cuk hay nagata visiɗi hay li ma nisi kali goy hay Egipte pa. Kay nam vi tuwam goy tisiya, min vatsi goyɗi.

¹¹Vaydi sum nisin ka wurakma'a hay li ma nisi co kay digiɗma goy hay nagata ta naŋ vulma'a.

¹²Hih! Naŋ Lawna vuma'a, naŋ min ka kitata vaŋ kisiɗi su? Kay sum nisi sa ŋol hini-hini sa ka co durma'an kayni donota vuma voksi tayɗi. Numa wi va ma numa as liɗi, may irma ka cuki kaŋu.

¹³Sumuna vi Yuda kaf lak kulo'o vok ir Ma-Vatɗina, hiɗi gurona visi sa gurayn kaf, boyna visiya hiɗi guro sa jafayn kafe.

¹⁴Nala jar tokŋa pa ŋusta vi Ma-Vatɗina kal hay Yahaziyel goora vi Zakariya, goora vi Benaya, goora vi Yeyel, goora vi Mattaniya ma Levitna, jar gurona vi Asaf.

¹⁵Nala Yahaziyel di'e: Lakgi kiliŋ, nigi sumuna vi Yuda hiɗi jafna vi Yerusalem kaf, naŋ mulla Yosafat kaw. Ma-Vatɗina ka di tay ala: Ligi narɗi, tuwgi vigi bat-bat' vok sum nisi sa ŋol hini-hininɗi, kay kayni may mi duura vigiɗi, may duura vi Lawna.

¹⁶Jifini, tuɗgi kirsiya; nisi ma co ɗawni hay ɗiŋiriŋŋa vi Hatsis pa, nigi ma fisi hay vun ɗiŋiriŋŋa, goy vun fulda vi Yeruwel.

¹⁷Nigi ma dur noŋɗi, tuɗgiya, lakgi hay liy namna, nigi ma wi su'da ta Ma-Vatɗin min suɗgiya. Yuda hiɗi Yerusalem, ligi narɗi, tuwgi wirgiɗi, jifini, cukgi goy kirsiya, Ma-Vatɗina ma li hiɗi nigiya.

¹⁸Yosafat dab vokom gaa kay nagata, sumuna vi Yuda hiɗi sum sa hay Yerusalem, girif gaa vok Ma-Vatɗina, dab voksi gaa vokom kaf.

¹⁹Sa Levitna sa jar gurona vi sa Kehatna hiɗi jar gurona vi Kore yaw kulo'o, kay subur Ma-Vatɗina Lawna vi Israyel, hiɗi delsi kulo dono ŋolo.

²⁰Nisi yaw kulo graw culum culum, kali hay fulda vi Tekowa. Hay li ma nisi ka cuk goyo, Yosafat col kulo'o nam di'e: Nigi ma humanu, sumuna vi Yuda hiɗi sum sa hay Yerusalem, lakgi dono'o hay vida vigi kuɗ Ma-Vatɗina Lawna vigiya, vigi kuɗ sa jobta valam kaw, nala nigi ma kola.

²¹Bugol nam vul gatta mi sumun vulla, nam vilek sa gi nulla hay sem Ma-Vatɗina, cuk ganna ma peldetna tisiya, nisi tun goy vok sumuna, ka gi nulla ala: Tiygi sem Ma-Vatɗina, kay ŋaata valamu mus ta-ta hay vatɗita.

²²Hay li ma nisi ka ci ɓisiya, subur Ma-Vatɗina kaw, Ma-Vatɗina gan jawta gaa vok sa Amonna hiɗi sa Mowabna hiɗi sa ka hay hiɗiyt Seyir, hiɗi sa co kay dur jafna vi Yuda, nisi kol kisiya.

²³Sum sa Amonna hiɗi sa Mowabna mok sum sa kay hiɗiyt Seyir kay cisi goyo, kay vatsi goyo kaw; hay li ma nisi ci sum sa Seyir goy cina, nisi muɗ kat tuwsiya kay ci tuwsi goyo.

²⁴hay li ma sumuna vi Yuda co kat liyn ma goboy hiɗi fulda, nisi muɗ irsi kat sum sa ŋol hini-hinina, nisi ɗuw na kayni, sumun ka cuki gaa kay nagata, mitiya, sa kep kaw may pir goyɗi.

²⁵Yosafat hiɗi sumuna valam co'o kay fok sligar ma tisina, nisi fi slen ŋolo; gurjuna, sligara hiɗi sle ma jifiy ŋolo. Nisi yaw slen ŋolo ta-ta nisi as a ziyim kafɗi. Nisi li buur ɦidi kay yaw sle ma ɓuraŋŋa, kay nam ŋol zututu.

²⁶Hay buurta fiɗita, nisi tok tuwsi hay lokŋa vi Beraka, ɗawni nisi subur Ma-Vatɗina; kuɗ na'ta kayni liy namna nisi yum ala lokŋa vi Beraka ta-ta vaydi.

²⁷Sumuna vi Yuda hiɗi Yerusalem kaf, Yosafat ka tuni voksiya, kali hiɗi firita kay hot hay Yerusalem, kay Ma-Vatɗina hobsiyawa hiɗi firita hay baŋal sa gawt kisina.

²⁸Nisi cuk kulo hay Yerusalem hiɗi dilla, hiɗi dil ŋolla, hiɗi togolomna kaw, ta-ta hay ziyna vi Ma-Vatɗina.

²⁹Narta kuɗ Ma-Vatɗina kal hay muliyan sa hay naga heta kafe, hay li ma nisi hum ala Ma-Vatɗina dur sa gaw kay sa Israyellawa.

³⁰Mulda vi Yosafat mus hay sle'ta, Lawna valamu vulum tun sukka goy hay galam kaf.

³¹Yosafat ti mulda kay Yuda. Hay li ma nam muɗ mul kayni busata valam asay dok-ɦidi yam vasl, nam ti mulda hay Yerusalem ir busat dok-ma' yam vasl. Semda vi sulum ala Azuba, goota vi Silhi.

³²Nam poy hay hagata vi bulum Asa, min cal goyɗi, nam lum mi sle ma ɗigera vok ir Ma-Vatɗina.

³³May hiɗi kayni kaf liyn ma ɗiŋiriŋŋa may vat goyɗi, sumun may hiɗi diksi juni tam Lawna vi sumaysi noŋ kaf tuwaɗi.

³⁴Caw lopna vi Yosafat ma hinina, ma jewna hiɗi ma cawna, kayni ka ɗo ay hay ɗerwelda vi Yehu, goora vi Hanani, nam ka tapay kulo jar ɗerwella vi muliyana vi Israyel.

³⁵Bugol kayni, Yosafat mulla vi Yuda vi bonot hiɗi Ahaziya mulla vi Israyel, ma poyta valam liwisi,

³⁶nam tap hiɗi namu kay kot lumayna ma min kal hay Tarsis; nisi kot lumay namna hay Etsiyon-Geber.

³⁷Nala Eliezer goora vi Dodava ma hay Maresa, di vun jobta kat Yosafat, nam di'e: Kay naŋ jun bonot hiɗi Ahaziya, Ma-Vatɗin ɓulak lopna vaŋu. Lumay namna to goyo, may co hay Tarsisɗi.