Read Masana 2 LABAR-MA-LIYNA 21 Bible Online

2 LABAR-MA-LIYNA 21 - Masana bible

2 LABAR-MA-LIYNA 21

¹Yosafat miti kuɗ sumiyamu, nisi pum kat sumiyamu hay hoyok-ziyna vi David. Goora valamu Yoram ti mulda hay baŋalamu.

²Guro-biyom Yoramna sa gurona vi Yosafatna ka'a. Kayni si Azariya, Yehiyel, Zakariya, Azariya, Mikayel, hiɗi Sefatiya, nisi kaf si gurona vi Yosafat mulla vi Israyel.

³Busi vulsi slen ŋolo, doorota hiɗi ora, nam vulsi Hoyok-ziy ma donona hay Yuda, may nam hin mulda mi Yoram, kay namu mi ma vuɗi jewna.

⁴Hay li ma Yoram musawa hay mulda vi bulumu, hay li ma sutay mulda valam kaw cukawa gaa'a, nam ci guro-biyomna goy hiɗi kew-gaferaŋa kaf, hiɗi sum segena jar sa ŋulona vi Israyel kaw.

⁵Hay li ma Yoram tun mul kayni, busata valam dok-ɦidi yam ma', nam ti mulda busat glafandi hay Yerusalem may.

⁶Nam poy hay hagata vi muliyana vi Israyel, ki jafna vi Akab li nala, kay cata valamu ti goota vi Akab, nam li slen ma joo'o kir Ma-Vatɗina.

⁷May Ma-Vatɗina may vat jafna vi David goyɗi, kuɗ bonota ta nam juna' hiɗi David, kay nam di ala nam min hin mulda hay jafna valamu hiɗi gurona valam dok-doko.

⁸Hay liyna valamu, sum sa Edomna yaw kulo'o, kay nisi min ala Yuda ma ti mul kisiɗi, nisi tun mul kisi kay tuwsiya.

⁹Yoram kali hiɗi sa ŋulona valamu hiɗi keke-ma-duura valam kaf; nam fok kulo hay henjeta, nam ci sum sa Edomna sa ŋuyi talamna hiɗi sa ŋulona vi keke-ma-duura kaw.

¹⁰Hay na'ta pa ta-ta vaydi sum sa Edomna may hot gaa kuɗ gaŋeraŋa vi Yudaɗi. Hay li namna sum sa hay Libna yaway kulo'o kat gaŋeraŋa vi Yuda kaw, kay jafna vi Yuda noy Ma-Vatɗina Lawna vi sumaysi goyo.

¹¹Yoram kot liyn ma ɗiŋiriŋŋa kulo kay hiɗiyta vi Yuda noŋo; nam kal sum sa hay Yerusalem hay viyuwta, nam zut sum sa Yudana hay kaw.

¹²Sa ma jobta Eli ɗom ɗerwelda ay ala: Humaŋ dita vi Ma-Vatɗina Lawna vi buŋu David, kay naŋ min poy hay hagata vi buŋ Yosafat hiɗi buŋ-ŋolo Asa muliyana vi Yudaɗi,

¹³may naŋ poy kayni hay hagata vi muliyana vi Israyel; kay sumuna vi Yuda hiɗi sum sa hay Yerusalem naŋ kalsiyawa hay viyuwta, ki jafna vi Akab li nala, kay guro-biyoŋŋa sa ŋaa suwaŋ naŋu naŋ cisi goyo, ziyna vi buŋ noŋo kaw.

¹⁴Humaŋu, Ma-Vatɗina ma wat sumuna vaŋu hiɗi bakmara ma ŋolo, gurona vaŋu, boyna hiɗi slena vaŋ noŋ kaf;

¹⁵naŋ hayɗini, nam ma wataŋ hiɗi moy ma ŋolo, moyna vi ruwatna, moy namna ma ɦur vokomu hay buurta buurta, ta-ta ruwataŋ ma zuk goyo kuɗ ti ma nam taŋ ŋolla.

¹⁶Sum sa Filistina hiɗi sum sa Arabna sa ka goboy hiɗi Etiopiyana Ma-Vatɗina yawsiyay kulo'o kat Yoram.

¹⁷Nisi yaway kay dur Yuda, nisi co kisi tukusi', nisi yaw slen kaf ma ka hay ziyda vi mulla, boyna valamu hiɗi gurona valam noŋ kaf, hin goy kuɗsi kayni mi goora valam ma goora ma yum Yowahazna tuta.

¹⁸Bugol kayni kaf, Ma-Vatɗina watam hiɗi moyna vi ruwatna ma as yer goyɗina.

¹⁹Moy namna ka jor vokomu hay buurta buurta, co hay busata ma'ta kayni, ruwatam zuk goyo kuɗ ti ma nam tum ŋolla. Nam mit hay tuw-tita ta ŋolda; Sumuna valamu may ŋal urdina hay semda valamu ki nam li kat sumiyam naɗi.

²⁰Busata valam dok-ɦidi yam ma' hay li ma nam tun mulla, nam ti mulda busat glafandi hay Yerusalem. Nam mit kayn sa ma yorom mayɗi, nisi pum hay hoyok-ziyna vi David, may nisi pum jar zulda vi muliyanɗi.