Read Masana 2 LABAR-MA-LIYNA 23 Bible Online

2 LABAR-MA-LIYNA 23 - Masana bible

2 LABAR-MA-LIYNA 23

¹Hay busata siɗiyata, Yehoyada muɗ dono'o, nam jun bonota hiɗi sa ŋulona vi vok ma kisna, Azariya goora vi Yeroham, Ismayel goora vi Yohanan, Azariya goora vi Obed, Maaseya goora vi Adaya, hiɗi Elisafat goora vi Zikri.

²Nisi ŋuy Yuda kaf, hiɗi sa ŋulona kuɗ jafna vi Israyel. Nisi co hay Yerusalem.

³Sumun kaf jun bonota hiɗi mulla hay ziyna vi Lawna. Yehoyada di tisiya: Goora vi mulla damni, nam ma ti mulda, ki Ma-Vatɗina li di-goyta kay gurona vi David nala.

⁴Kayni mi va ma nigi ma li'e: Sum sa sli lopna jargi hay buura vi sabatn ɗawni, muliyan-sa-ɗifinna hiɗi sa Levitna, gal ma ɦidina ma ŋom vun-ziyna,

⁵gal ma ɦidina ma tun hay ziyna vi mulla, gal ma ɦidina ma lak hay vun-ziyna vi Yesod. Sumun kaf ma lak hay wur-daŋŋa vi ziyna vi Ma-Vatɗina.

⁶Hin sa mara kal kalaf hay ziyna vi Ma-Vatɗinɗi, say muliyan-sa-ɗifinna hiɗi sa Levitna sa lopna ka kisina tuta. Nisi kayni as cuk kalafi, kay nisi ka peldete. Sumun kaf ma li ŋomda hay sem Ma-Vatɗina.

⁷Sum sa Levitna ma ŋuy mulla goy hay galam kaf, gigekaw hiɗi sle-ma-duura valam hay ɓalamu, la sa gigekaw min kal kalaf hay ziyna, cum ciy goyo. Nigi ma lak goboy tam mulla hay li ma nam kal kalafi hiɗi liyn ma nam kal goyo.

⁸Sa Levitna hiɗi sumuna vi Yuda kaf li kuɗ dita ta mul-ma-ɗifinna Yehoyada vul tisiya. San gigekaw tok sumuna valamu valamu, sa cuk kalafi hay buura vi sabatna, sa cuk goyo hay buura vi sabatna; kay mul-ma-ɗifinna Yehoyada may poŋ ir vok mara goyɗi.

⁹Mul-ma-ɗifinna Yehoyada vul kawayna hiɗi marayna ma ŋulona hiɗi ma gurayna hay ɓam sa ŋulona vi vok ma kisna, kawayna hiɗi marayna ma ays vi mulla David, ma ka ŋayay hay ziyda vi Lawna.

¹⁰Nam zlar sumun goy kafe, gigekaw hiɗi sle-ma-duura valam hay ɓalamu, tun caway hay gal ma jufna vi ziyd pa ta-ta hay gala' ma gulla, goboy tam giwin-ma-ɗifinna, goboy tam ziyda kaw kay ŋuy mulla.

¹¹Nisi ɦur goora vi mulla ay kulo goboyo, nisi tun jakawata vi di-goyt kalamu. Nisi tunum mulu; Yehoyada hiɗi gurona valam ɦok mul kalamu, nisi di'e: Mulla mus iri musge.

¹²Atali hum del sumuna sa ka jaŋa, sa ka subur mulla.

¹³Na' co kat sumuna hay ziyda vi Ma-Vatɗina, na' ɗuw na kayni, mulla ka coli kulo kay va ma tun zlamda-mulda, vun liy ma kal kalafna; sa ŋulona hiɗi togolomna kaw ka goboy tam mulla, sum sa hay nagat kaf ka hay firita, sumun ka buw togolomna, sum sa gi nulla, hiɗi sle ma gi nulla, ka tuni voko kay gi nulla ma suburta. Atali jet sligara va' goyo na' di'e: Vun ma ŋirayna! Vun ma ŋirayna!

¹⁴Ki kayn nala Yehoyada mul-ma-ɗifinna cuk sa ŋulona vi vok ma kisna ay goyo, sa ŋulona vi sojen kaw, nam di tisiya: Kala'ay goy jar sumun pa, sa marige kaw ma tap kuɗa'a cigit goy hiɗi kew-gaferaŋa. Kay mul-ma-ɗifinna di'e: Nigi ma ca' kalaf hay ziyna vi Ma-Vatɗin tanɗi.

¹⁵Nisi kala'ay goyo, na' co hay ziyna vi mulla hiɗi hagata vi vun-galana vi kulumayna. Nisi ca' mati hay liy namna.

¹⁶Yehoyada ŋra vunam hiɗi sumun kaf, hiɗi mulla kaw, nisi jun bonot hiɗi Lawna kay nisi ma lak si sumuna valam dok-doko.

¹⁷Sumun kaf cuk hay ziyna vi Baal, giwin-ma-ɗifinna hiɗi sle ma slum tuwam nalana, nisi ɦom gaa'a, tom goyo, Mattan mul-ma-ɗifinna vi Baal nisi cum goy vok giwin-ma-ɗifinna.

¹⁸Yehoyada vul ŋomda vi ziyda vi Ma-Vatɗina hay ɓam muliyan-sa-ɗifinna sa Levitna, sa David ɓurawsi irsi goyo hay ziyda vi Ma-Vatɗina kay nisi ma li ɗifin ma ŋal-goyna tam Ma-Vatɗina, ki ɗoy hay gatta vi Musus nala, hay firita hiɗi nulla, ki David diys nala.

¹⁹Yehoyada lak sumuna kay ŋom vun-ziyda vi Ma-Vatɗina, kay sa ma tuwam muɗi liwisi kuɗ va mige kal ma kal kalaf haya'ɗi.

²⁰Bugolda nam yaw sa ŋulona vi vok ma kisna, sa lak vun muliyana, sa ka hiɗi ŋolda jar sumuna, hiɗi sum sa hay nagat kafe, nisi jik mulla ay gaa hay ziyda vi Ma-Vatɗina pa, nisi co hay ziyna vi mulla hay vun-gala ma ŋolla pa, nisi mus mulla kay zlamda-mulda.

²¹Sum sa hay nagat kaf ka li firiya, hoyok-ziyn kaf tuni ŋal kiliŋi. Nisi ci Atali goy hiɗi kew-gaferaŋa.