Read Masana 2 LABAR-MA-LIYNA 24 Bible Online

2 LABAR-MA-LIYNA 24 - Masana bible

2 LABAR-MA-LIYNA 24

¹Yowas ka hiɗi busat siɗiya, hay li ma nam tun mulu, nam ti mulda ir busat dok-fiɗi hay Yerusalem. Sulumu ya' Sibiya, ta hay Ber-Seba.

²Yowas li slen ma ŋaana vok ir Ma-Vatɗina hay buur ma irita vi mul-ma-ɗifinna Yehoyada noŋ kaf.

³Yehoyada yaw boyn mi Yowas ma', nam vuɗ guro sa jufayna hiɗi guro sa boyna kaw.

⁴Bugol kayni Yowas fi varta kay kot tuw ziyda vi Ma-Vatɗina.

⁵Nam tok muliyan-sa-ɗifinna hiɗi sa Levitna, nam di tisiya: Cukgi goy hay hoyok-ziyna vi Yuda, hay nagata Israyel kaf, nigi ma targi gurjuta hay busat kaf, kay kot tuw ziyda vi Lawna; ligi tuwgi koloyo hay lawt kayni. May sum sa Levitna min li koloyɗi.

⁶Mulla yi mul ŋol ma-ɗifinna Yehoyada, nam di talamu: Taara ma Musus sa ma sunda vi Ma-Vatɗin tunumis kay tokŋa vi Israyella kay (kotta vi) guɗuk ma fi-tuwna, naŋ min so tuwaŋ tam sa Levitna kay nisi ma tuɗ hay Yuda hiɗi Yerusalem kay maramɗi kay mige?

⁷Kay Atali ta joota hiɗi gurona va'a vurum sle ma hay ziyda vi Lawna, slen ma vuli goyo hay ziyda vi Lawna nisi li lop goy hiɗi namu mi Baal kafe.

⁸Ki kayn nala mulla di ala nisi ma kot goor timgil kepe, tunum hay vun-ziyda vi Ma-Vatɗina goy jiya.

⁹Nisi siwel lawt goy hay Yuda hiɗi Yerusalem kaf ala: Vulda ta Musus sa ma sunda vi Ma-Vatɗina job sa Israyel ka'a kay nisi vula' tam Ma-Vatɗina, hay li ma nisi ka hay fulda, nisi ma mar vul na'ta.

¹⁰Sum sa ŋulona hiɗi sumun kaf li firiya, nisi mar vul na'ta, cuka' hay timgil ma goora, ta-ta nam hob goyo.

¹¹Hay li ma liyn asawa kay sa Levitna mar timgil ma goora tam mulla kay nam ɗuwumu, kayn min di'e hay li ma nisi wi ala gurjut ka hayam ŋolo. Sa ma ɗo slena vi mulla hiɗi sa ma sunda vi mul ŋol ma-ɗifinna co'o, nisi ko gurju ma hay timgil ma goora goyo, hot tun timgilla gaa hay liyna valamu, nisi ka li ki kayn nala hay buurta kaf, nisi ka fi gurjut ŋolo kaw.

¹²Mulla hiɗi Yehoyada ka vulum mi sa lopna ka vuli hay ɓisiya kay kot hay-ziyda vi Ma-Vatɗina, sa ka yaw sumuna kay ceɗ hiɗiyna hiɗi sa ceɗ guna kay kot ziyda vi Ma-Vatɗina hiɗi sum sa li lop kawayna, lop wayna kaw, kay kot ziyda vi Ma-Vatɗina.

¹³Sum sa lopna vuli hay ɓisina ka li lopo, ɗek sumun kay lopn kayn si nisiya, nisi kot tuw-ziyda vi Lawna goy ŋaa'a, hot muɗa' dono'o kaw.

¹⁴Hay li ma nisi vat lopn vatna, caw gurju ma hinina nisi maram vok mulla hiɗi Yehoyada. Nisi kot sle ma kay ziyda vi Ma-Vatɗina, jakŋa ma li lopna hiɗi ma ŋal ɗifinna, tasana, jak hena ma koti hiɗi ora, hiɗi doorota kaw. Hay buura irita vi Yehoyada kaf, nisi ka li ɗifin ma ŋal-goyna hay ziyda vi Ma-Vatɗina dok-doko.

¹⁵Yehoyada muɗ maari, nam mit kayni asay hiɗi busat ta'. Hay li ma nam mit kayni, busata valam asay kis kalam dok-ɦidi.

¹⁶Nisi pum hay hoyok-ziyna vi David hiɗi muliyana, kay nam li slen ma ŋaana hay Israyel, nam li ŋaa'a kat Lawna, kat ziyna valamu kaw.

¹⁷Bugol mitta vi Yehoyada, sa ŋulona vi Yuda co'o, nisi girif gaa vok mulla, nala mulla humsiya.

¹⁸Nisi noy ziyda vi Ma-Vatɗina Lawna vi sumaysi goyo, nisi tun caw girif Asera* hiɗi lawayn waana. Ma-Vatɗina muɗ ɦiy kat Yuda hiɗi Yerusalem, kay nisi muɗ tuwsiyawa joo'o.

¹⁹Ma-Vatɗina cuk sa sunda ay katsiya kay hotsiyay talamu. Sa jobta marsi di-goyta visiya, may nisi min jak humsi kay kaynɗi.

²⁰Ŋusta vi Lawna cuk kay Zakariya, goora vi mul-ma-ɗifinna Yehoyada, nam col kulo vok sumuna di tisiya: Humgi va ma Lawn di'e: Nigi raw vun-ma-gatna vi Ma-Vatɗin goyo kay mige? Nigi as fi donotɗi, kay nigi noy Ma-Vatɗin goyo, nam ma noygi goyo kaw.

²¹Ki kayn nala nisi fok lawt kalamu, mulla vul hagat tisiya, nisi cum goyo hay wur-daŋŋa vi ziyna vi Ma-Vatɗina.

²²Mulla Yowas humam may gum kay ŋaata ta Yehoyada bum Zakariya la' kalamtaɗi, nam ci goora valam goyo. Hay li ma Zakariya ka mita, nam di'e: Hin Ma-Vatɗin wi kayni, nam ma job yalamu kaw.

²³Hay li ma busat kep vatawa, sojena vi Siriyana co'o kay dur Yowas. Nisi co hay Yuda hiɗi Yerusalem. Sum sa ŋulona jar sumuna nisi cisi goy kafe, sle ma ɓuraŋŋa nisi jokom mi mulla vi Damas kafe.

²⁴Sojena vi Siriya co kuɗ tuwsi ir goor ɦawa, may hiɗi kayni kaf Ma-Vatɗina vul soje sa ŋolla hay ɓisiya, kay nisi noy Ma-Vatɗina Lawna vi sumaysi goyo. Ki kayn nala Ma-Vatɗina ɗek ɦiyda valam goy tam Yowas hiɗi sa Siriyana.

²⁵Hay li ma nisi kal goy gine hiɗi namu, bugol nisi hinim hay lasta ŋolda hinna, sa sunda valamu yaw kulo kalamu kuɗ busuwna vi gurona vi mul-ma-ɗifinna Yehoyada; nisi cum gaa kay va ma buura valamu, nam mita may. Nisi pum hay hoyok-ziyna vi David, may nisi min pum hay zulda vi muliyanɗi.

²⁶Kayni mi semda vi nisi sa fok kulo kalamu: Zabad, goora vi Simeyat, cata ta Amonta, Yozabad goora vi Simrit, cata ta Mowabta.

²⁷Sem gurona vi Yowas, vun jobta ma nisi dum talam dak-dakŋa, inda ma nam in ziyda vi Lawna, kayni ka ɗoy hay cawam ma ɗeki goyna vi ɗerwelda vi muliyana. Goora valam Amatsiya ti mulda hay baŋalamu.