Read Masana 2 LABAR-MA-LIYNA 25 Bible Online

2 LABAR-MA-LIYNA 25 - Masana bible

2 LABAR-MA-LIYNA 25

¹Amatsiya muɗ mul hay busata dok-ma' yam vaslta, nam ti mulda ir busat dok-ma' yam zleeŋe hay Yerusalem. Sulum ya' ala Yehoyadan, ta Yerusalemta.

²Nam li slen ma ɗigera vok ir Ma-Vatɗina, may hiɗi dikga ta ɓurawayta.

³Hay li ma nam muɗ dono'o hay mulda valam muɗna, sa sunda valamu sa ci bulumna nam cisi goy kafe.

⁴May nam min ci gurona visi goyɗi, kay nam li kuɗ sle ma ɗoy hay gatta, hay ɗerwelda vi Musus, hay liyn ma Ma-Vatɗin vul vun-ma-gatna ala: Ci sumayna goy kuɗ gurona visiɗi, ci guron goy kuɗ sumaysiɗi kaw; may san gigekaw cum goy ɗawni kuɗ sulukŋa valamu valamu.[7]

⁵Amatsiya tok sumuna vi Yuda, nam laksi goy kuɗ ziyna vi sumaysi sa jufayn kaf, sa ŋulona vi vok ma birimna, hiɗi sa ŋulona vi vok ma kisna, hay jafna vi Yuda hiɗi Benyamin kaf; nam li ŋaɓta visi goyo, tun caw tam busat dok-ma' pa ta-ta kulo vok ɗaw, nam fi sum sa wi duura birim kis-ɦidi, kayni si sa asay kay tuɗ vun duura, sa wi futna vi kawayna hiɗi marayna.

⁶Jar sa Israyella, nam yaw sum sa jufay sa donon kuɗum birim kis, ir gurjuta sikel* kis.

⁷Sana vi Lawn kep co'o di talamu: Mulla, hin sojena vi Israyel tuɗ hiɗi naŋɗi, kay sum sa Israyella hiɗi gurona vi Efrayim kaf lakŋi Ma-Vatɗin may hiɗi nisiɗi.

⁸La naŋ tuɗ hiɗi nisi kuɗaŋu, la naŋ col vun duur maŋ dono ŋol kaw, Ma-Vatɗin ma pukaŋ gaa'a vok sa gaw kaŋŋa, kay Lawna ka hiɗi gaŋeraŋa kay gut sana, kay pukum gaa'a kaw.

⁹Amatsiya di tam sana vi Lawna: Wulin kayni talente* ma kisna ma nan vulum mi sojena vi Israyel nan lum ɗawn litige? Sana vi Lawn hot di'e: Ma-Vatɗina as vulaŋ ŋolo suw kayni.

¹⁰Nala Amatsiya ja jaram goy hiɗi sojena sa may goy vi Efrayim pana, kay nisi ma kal vo visiya. May nisi muɗ ɦiy ŋolo kat Yuda, nala nisi hotay vo visiya hiɗi ɦiyda ta ŋolda.

¹¹Amatsiya muɗ dono hay mulda valamu, nam tun vok sumuna valamu. Nam kali hay lokŋa vi mandana, ci sumun birim doogo kuɗ gurona vi Seyir.

¹²Gurona vi Yuda yaw sumun kuɗsi ir birim doogo, nisi tuɗsi kulo kay hiɗiyt kepe, zutsi gaa'a, nisi kaf jiweɗ goyo.

¹³May vokŋa vi sojena sa Amatsiya gisi irsiya kay nisi ma tuɗ vun duura hiɗi namɗina mer goy hay hoyok-ziyna vi Yuda kaf, fokay hay Samariya zaw ta-ta hay Bet-Horon, nisi ci sumun birim ɦidi, vurum slen ŋolo kaw.

¹⁴Hay li ma Amatsiya hotay vo'o bugol kolda valam kay sa Edomna, nam mar lawayna vi gurona vi Seyir, nam muɗum ki lawayna valam nala; nam girif gaa vokomu, ŋalam urdina kaw.

¹⁵Ki kayn nala Ma-Vatɗina muɗ ɦiya kat Amatsiya, nam gi sa ma jobta kep talamu, sa ma jobta dum ala: Naŋ kal gar lawayna vi sum nisina kay mige? Kay lawayna visiya may butsi goy hay ɓaŋɗi.

¹⁶Hay li ma nam ka lawa, Amatsiya di talamu: Numa tunaŋ kay vul gatta mi mulla lancitige? Baŋ vunaŋu. Naŋ min ala numa ma caŋu kay mige? Sa ma jobta vat vunam hiɗi dit ala: Nan wi ala varta vi Lawn coli vatiya kay ɓulakaŋ goyo, kay naŋ li slen kayni, may naŋ min hum gatta vanɗi.

¹⁷Bugolda hay li ma Amatsiya mulla vi Yuda job sa falamna jobna, nam gi sunda tam Yowas, goora vi Yowahaz, goora vi Yehu mulla vi Israyel ala: Naŋaya, nay duray tuwaya.

¹⁸Yowas mulla vi Israyel, gi sunda tam Amatsiya, mulla vi Yuda ala: Gu-cocona vi Libaŋ gi sunda tam gu-gamna vi Libaŋ ala: Vul goota vaŋ ca'a mi goora vanu. May muuriya ma fulla hay Libaŋ jik kay gu-cocona, nam tayam gaa'a.

¹⁹Naŋ kolawa kay sa Edomna naŋ di nala, dikaŋ fok kulo'o, naŋ subur tuwaŋu kaw. Wulin kayni musaŋ hay ziyna vaŋu. Naŋ kal tuwaŋ vun duur ma laŋ joon ɗaw kay mige? Naŋ ma mita, jafna vi Yuda hiɗi naŋ kaw.

²⁰May Amatsiya min humumɗi, kay kayni may goy vi Lawna pa, kay nam ma vulis goy hay ɓam sa ma gawta, kay mige nam gar lawayna vi Edom.

²¹Ki kayn nala Yowas mulla vi Israyel fokay kulo'o kir Amatsiya mulla vi Yuda. Nisi dur tuwsiya hay Bet-Semes ta vi Yuda.

²²Israyel kol kay Yuda, gigekaw pir jaŋi hay guɗukŋa valamu valamu.

²³Amatsiya mulla vi Yuda goora vi Yowas, goora vi Yowahaz, Yowas mulla vi Israyel vum daŋgaya hay Bet-Semes. Nam kalam hay Yerusalem, nam co baŋana ir goldoŋ kis-fiɗi hay gulmunna vi Yerusalem, tun caway tam vun-galana vi Efrayim pa ta-ta tam vun-galana ma ŋuy goyna.

²⁴Nam yaw ora hiɗi doorota kaf, hiɗi slen kaf ma ka hay ziyna vi Lawna, hay ziyna vi Obed-Edom, hiɗi timgilla ma ka hay ziyna vi mulla; nam yaw sum sara daŋgaya kaw, bugolda nam hotay hay Samariya.

²⁵Amatsiya goora vi Yowas, mulla vi Yuda, mus iri busat doogo yam vasl bugol mitta vi Yowas, goora vi Yowahaz, mulla vi Israyel.

²⁶Caw lopna vi Amatsiya ma hinina, ma jewna hiɗi ma cawna, kayni ka ɗoy hay ɗerwelda vi muliyana vi Yuda hiɗi Israyel.

²⁷Hay li ma Amatsiya ja jaram goy hiɗi Ma-Vatɗin jana, nisi fok lawt kalamu hay Yerusalem, nam pir hay Lakis; nisi jaŋ kuɗumu hay Lakis; ɗawni nisi cum goyo.

²⁸Nisi ziyimu hay kulumayna, nisi pum kat sumiyamu hay hoyok-ziyna vi Yuda.