Read Masana 2 LABAR-MA-LIYNA 27 Bible Online

2 LABAR-MA-LIYNA 27 - Masana bible

2 LABAR-MA-LIYNA 27

¹Yotam ka hiɗi busat dok-ma' yam vasl hay li ma nam tun mulu. Nam ti mulda ir busat doogo yam karkiya hay Yerusalem. Sulum semda va' Yerusa, na' ti goota vi Sadok.

²Nam li slen ma ɗigera vok ir Ma-Vatɗina, ŋray ca ki bulum Oziyas li nala. May nam min kal hay Tempella vi Ma-Vatɗinɗi. Suw kayni lo, sumun ka li tuwsi liwisi.

³Namu mi ma kot vun-ziyn ma ŋolla vi ziyna vi Ma-Vatɗina; nam in ziyn ŋolo kulo kay gulmunna vi Ofel.

⁴Nam in hoyok-ziyna kulo kay hiɗiyna vi Yuda, in gulmunna hiɗi ziyna kaw jar juruta.

⁵Nam li duura hiɗi mulla vi sa Amonna, nam kol kisiya. Hay busat na'ta sum sa Amonna vulum gurjuta ir talente* kis, alkamarena koro birim doogo, orgena ir koro birim doogo kaw; kayni mi slen ma sum sa Amonna wurakamtina, hay busata ma'ta hiɗi busata ɦidita kaw.

⁶Yotam muɗ dono'o, kay nam ɗiger hagata valamu vok Ma-Vatɗina, Lawna valamu.

⁷Caw lopna vi Yotam ma hinina, duur ma nam lumna hiɗi lop ma nam lumna kaf, kayni ka ɗoy hay ɗerwelda vi muliyana vi Yuda hiɗi Israyel.

⁸Hay li ma nam tun mulu, nam ka hiɗi busat dok-ma' yam vasl, nam ti mulda ir busat doogo yam karkiya hay Yerusalem.

⁹Yotam miti kuɗ sumiyamu, nisi pum hay hoyok-ziyna vi David. Goora valamu Ahaz ti mulda hay baŋalamu.