Read Masana 2 LABAR-MA-LIYNA 28 Bible Online

2 LABAR-MA-LIYNA 28 - Masana bible

2 LABAR-MA-LIYNA 28

¹Ahaz ka hiɗi busat dok-ma' hay li ma nam tun mulu, nam ti mulda ir busat doogo yam karkiya hay Yerusalem. Nam may li sle ma ɗigera vok ir Ma-Vatɗina ki bulum David may li nalaɗi.

²Nam poy hay hagata vi muliyana vi Israyel, nam kot va ma sli tuw sana ma yoray hiɗi kawayna kay Baal.

³Nam ŋal urdina hay lokŋa vi gurona vi Hinnom, nam ŋal gurona valam goy hay kuta, ŋray ca ki lop ma liwisna ma jaf-sum sa Ma-Vatɗin munsi voksina ka lumna nala.

⁴Nam ka li ɗifinna hiɗi ɗifin ma ŋal-goyna kulo kay liyn ma ɗiŋiriŋŋa, kulo kay hiɗiyna, gaa kuɗ guway ma goɗayn kaf kaw.

⁵Ma-Vatɗina Lawna valamu vulum goy hay ɓam mulla vi Siriya, sum sa Siriyan ci sumuna valamu, yaw sumun kuɗum daŋgay ŋolo, nisi kalsi hay Damas. Nam vulis goyo hay ɓam mulla vi Israyel kaw, mulla vi Israyel ci sumun kuɗum ŋolo.

⁶Peka, goora vi Remaliya ci sumun birim kis kalam dok-ma' hay buurta kep, sum sa jufay sa donon kaf, kay nisi noy Ma-Vatɗina Lawna vi sumaysi goyo.

⁷Zikri sa ma donona hay Efrayim ci Maaseya goora vi mulla, Azrikam, guverner ma hay ziyna vi mulla, hiɗi Elkana, soje ma ŋolla vi mulla.

⁸Sum sa Israyella yaw sumun daŋgay birim kis-ma' kuɗ guro-biyosina, kayn di ala boyna, guro-jufayna hiɗi guro-boyna, nisi yaw sle ma ɓuraŋŋa kuɗsi ŋolo kaw. Sle ma ɓuraŋŋa nisi kalam hay Samariya.

⁹Hay liy namna sa ma jobta vi Ma-Vatɗin ka kep yum Oded. Nam kali goy kir sojena sa hotay vo hay Samariya, nam di tisiya: Ma-Vatɗina Lawna vi sumaygiya, hay ɦiyda valamu kat Yuda, nam vul guro-biyogina goy hay ɓigiya, nigi cisi goyo hiɗi taŋgasta ta co ta-ta kulo hay wuralawna.

¹⁰Wulin kayni, gurona vi Yuda hiɗi Yerusalem lakŋi, nigi di ala nigi min muɗsi goy gorvo vigiya, may nigiya, nigi li kayni va ma joo kat Ma-Vatɗina Lawna vigiya ɗisu?

¹¹Wulin kayni, humangiya, sum sa nigi yawsi gorvo'o jar guro-biyogin lakŋi, nigi ma gisi irsi vo visiya; kay ɦiyda ŋolda vi Ma-Vatɗina ka kigiya.

¹²Sum sa jar nisi sa ka tuni ŋulo'o kay gurona vi Efrayim, Azariya, goora vi Yohanan, Berekiya goora vi Mesillemot, Ezekiyas goora vi Sallum, hiɗi Amasa goora vi Hadlay, nisi yaw kulo'o kat sum sa may vun duur pana,

¹³nisi di tisiya: Sum nisi sa nigi yawsi ay gorvon lakŋi nigi ma kalsi ay kulo tanɗi; sulukŋa vaya hiɗi joota vaya nigi min tap suluk mara talam kayni kay muɗay joo suwa. Nay wulin lakŋ ka hiɗi sulukŋa, ɦiyda ŋolda vi Ma-Vatɗina ka kay sa Israyella kaw.

¹⁴Sojena hin sa daŋgayna hiɗi jakŋa gaa vok sa ŋulona hiɗi tokŋa kaf.

¹⁵Sum sa nisi yisi semda visi goyna fokay kulo'o, nisi yaw sa gorvona; sle ma nisi yawamay ɓuraŋŋa nisi gan tuw sa daŋgayna sa ay goy nalana hiɗi namu; nisi vulsi sligara hiɗi tuguruna; nisi vulsi tina hiɗi cina kaw, nisi kotsi vun milla visiya, sum sa as tuɗ kay tuwsiɗina, nisi ɓesi kulo kay kurona, nisi kalsi hay Yeriko, hoyok-ziy ma gomona, kat ɓosiyosina. Bugolda nisi hot hay Samariya.

¹⁶Hay liy namna kayni, mulla Ahaz gi sunda kay gar gutda kat mulla vi Asiriya.

¹⁷Sum sa Edomna co mara lo, nisi ci sum sa hay Yudana, yaw sum sara gorvo'o.

¹⁸Sum sa Filistina cukay kulo'o hay hoyok-ziy ma hay lokŋa hiɗi fulda vi Yuda; nisi sli Bet-Semes, Ayalon, Gederot, Soko hiɗi naga ma kuɗa'na, Timna hiɗi naga ma kuɗa'na, Gimzo hiɗi naga ma kuɗa'na, nisi lak ziy hayamu may.

¹⁹Kay Ma-Vatɗina hot yam Yuda gaa'a, kuɗ Ahaz mulla vi Israyel ma mar gijum-gijumta hay Yuda, ma ɗek tuwam goy bay-ɗigere kat Ma-Vatɗina kaw.

²⁰Tilgat-Pilneser,[9] mulla vi Asiriya co durumu, nam ɗuwum ki sa ma gawt nala, min gutumɗi.

²¹Kay sle ma hay ziyna vi Ma-Vatɗina Ahaz yawam goy kafe, slena vi mulla hiɗi slena vi sa ŋulona kaf kaw, kay li vulda tam mulla vi Asiriya hiɗi namu. May hiɗi sle ma nam vulum petna kaw nam may fi gutdaɗi.

²²Hay li ma mulla Ahaz ka vun zlat pet kaw, nam min vi kuɗ Lawnɗi.

²³Nam li ɗifini tam lawayna vi Damas sa kol kalamna, kay nam di'e: Kay lawayna vi muliyana vi Siriya ka gut kuɗsiya, nan kaw nan min li ɗifin tam lawayna visiya kay nam ma gut kuɗanu. Lawta kayni muɗi mi va ma gum nam gaa'a, cuk sa Israyel gaa kafe kaw.

²⁴Ahaz tok sle ma ka hay ziyna vi Lawn kaf, nam tom goyo, nam duk vun-galana vi ziyda vi Ma-Vatɗina, nam kot giwin-ma-ɗifinna goy hay gef Yerusalem kafe,

²⁵nam tun liyn ma ɗiŋiriŋŋa hay hoyok-ziyna vi Yuda kafe kay ŋal urdina tam lawayn hegena. Ki kayn nala nam ɓulak dik Ma-Vatɗina Lawna vi sumiyamu.

²⁶Caw lopna valam ma hinina hiɗi lop ma nam lum kafna, ma jewna hiɗi ma cawna, kayni ka ɗoy hay ɗerwelda vi Yuda hiɗi Israyel.

²⁷Ahaz miti kuɗ sumiyamu, nisi pum hay hoyok-ziyn Yerusalem, nisi may burum hay zulda vi muliyana vi Israyelɗi. Goora valamu Ezekiyas ti mulda hay baŋalamu.