Read Masana 2 LABAR-MA-LIYNA 29 Bible Online

2 LABAR-MA-LIYNA 29 - Masana bible

2 LABAR-MA-LIYNA 29

¹Ezekiyas tun mul hay busat ta dok-ma' yam vaslta, nam ti mulda ir busat dok-ma' yam zleeŋe hay Yerusalem. Sulumu semda va' ala Abiya, na' ti goota vi Zakariya.

²Nam li sle ma ɗigera vok ir Ma-Vatɗina, ŋray ca ki bulumu David li nala.

³Hay busata jewta vi mulda valamu, hay til ma jewna, nam mal vun-galana vi ziyda vi Ma-Vatɗin goyo, nam kotomu kaw.

⁴Nam mar muliyan-sa-ɗifinna hiɗi sa Levitna, nam toksi gaa'a hay gal ma kuɗuwna vi ziyda,

⁵nam di tisiya: Humangiya nigi sa Levitna, wulin kayni ligi tuwgi goy peldete, ziyda vi Ma-Vatɗina Lawna vi sumaygiya nigi ma la' goy peldete kaw, slen ma liwisna nigi ma cukum goy gine'e hiɗi liyn ma peldetna.

⁶Kay sumiyaya nisi min vi kuɗ Lawnɗi, nisi li slen ma joona vok ir Ma-Vatɗina, Lawna vaya, nisi noyom goyo, nisi min ɗuw liyn ma peldetna vi Ma-Vatɗina Lawna visiɗi, nisi muɗum ŋorsiyawa.

⁷Vun-galana vi diɓira nisi dukumawa noŋo, nisi tew fitillawa goyo, urdina hiɗi ɗifin ma ŋal-goyna ma lum tam Lawna vi Israyel hay liyn ma peldetna nisi may lum noŋɗi.

⁸Ki kayn nala Ma-Vatɗina was ɦiyda valamawa goy kay Yuda hiɗi Yerusalem, nam hinsiyawa hay narta, hay lawta hiɗi miyesta, ki nigi ka wisi hiɗi irgi nala.

⁹Wulini sumiyay ciy goyo kay kew-gaferaŋa, gurona vay sa jufayna hiɗi sa boyna, boyna vay kaw kali gorvo'o kuɗ kayni.

¹⁰Wulini dikan min kay jun bonot hiɗi Ma-Vatɗina Lawna vi Israyel, kay ɦiyda valam ta ŋolda ma vi tuwa' goy kataya.

¹¹Wulin kayni, gurona vanu, hingi ŋel-vunda goyo; kay Ma-Vatɗin vilekgi kayni kay nigi ma lak vok iramu, kay li sunda valamu, ki sa sunda valam nala, kay ŋal urdin talamu.

¹²Ki kayn nala sa Levitna yaw kulo'o, Mahat goora vi Amasay, Jowel goora vi Azariya, jar gurona vi sa Kehatna, jar gurona vi Merari, Kis goora vi Abdi, Azariya goora vi Yehalelel, jar gurona vi Gerson, Yowah goora vi Zimma, Eden goora vi Yowah;

¹³jar gurona vi Elisafan, Simri hiɗi Yeyel; jar gurona vi Asaf, Zakariya hiɗi Mattaniya;

¹⁴jar gurona vi Heman, Yehiyel hiɗi Simey; jar gurona vi Yedutun, Semayeya hiɗi Uziyel.

¹⁵Nisi tok guro-biyosina, bugol li tuwsi goy peldet lina, nisi co'o kay muz ziyda vi Ma-Vatɗin goyo, kuɗ yoboyna vi Ma-Vatɗina ma mulla di tisiya.

¹⁶Muliyan-sa-ɗifinna cuk kalaf hay ziyda vi Ma-Vatɗina kay muza' goyo; slen ma liwisna ma nisi fum hay ziyda vi Ma-Vatɗin kaf nisi yawamay goyo, ta-ta tam slen ma hay wur-daŋŋa vi ziyna vi mulla kaw, sum sa Levitna yawam hay ɓisiya kay naram goy jiya hay zulla vi Sedron.

¹⁷Nisi tun caw li Tempella goy peldete hay buurta jewta vi til ma jewna; hay buurta glafandita vi tilla, nisi cuk kalaf hay diɓira vi Ma-Vatɗina, nisi li buur glafandi kay li ziyda vi Ma-Vatɗin goy peldete; hay buurta doogo yam karkiyata vi til ma jewn kayni, nisi vat lopnawa.

¹⁸Bugolda nisi cuk kalaf tam mulla Ezekiyas, nisi di'e: Ziyda vi Ma-Vatɗina numa muza'awa goyo, giwin-ma-ɗifinna ma ŋat farayna hiɗi sle ma li lop hiɗi namna kaf, tablena hiɗi fun ma zlarayna hiɗi slen ma li lop hiɗi namna kaf.

¹⁹Numa kotomawa goy ŋaa'a hay liyamna, slen kaf ma mulla Ahaz hay bay-ɗigerta valamu muɗum liwisi hay li ma nam ka ti mulda kaw, numa muzumawa goy ŋaa'a. Nam ka tani vok giwin-ma-ɗifinna vi Ma-Vatɗina.

²⁰Mulla Ezekiyas fok kulo graw culum, nam tok sa ŋulona vi hoyok-ziyna, nam kal kalaf hay ziyda vi Ma-Vatɗina.

²¹Nisi mar luway-jufayn siɗiya, fok-gamalan siɗiya, guro fok-dimin siɗiya, fok-ŋekŋ siɗiya kaw, kay lum ɗifin kay mulda, kay liyn ma peldetna, kay Yuda kaf kaw. Mulla di tam sa muliyan-sa-ɗifinna gurona vi Aaron ala nisi ma lum ɗifini kulo kay giwin-ma-ɗifinna vi Ma-Vatɗina.

²²Muliyan-sa-ɗifinna ŋat luwayna, nisi vi busuwna, yamam kulo kay giwin-ma-ɗifinna; nisi ŋat fok-gamalana, yamam busuwam kulo kay giwin-ma-ɗifinna, nisi ŋat guro fok-dimina, yamam busuwam kulo kay giwin-ma-ɗifinna kaw.

²³Bugolda nisi mar fok-ŋekŋa ma kay sulukŋa vok mulla vi tokŋa, mulla hiɗi sumun tun ɓisi kalamu.

²⁴Muliyan-sa-ɗifinna ŋatamu, yamam busuwam kulo'o kay giwin-ma-ɗifinna kay ɗifin ma kay sulukŋa, ki poora kay sa Israyel kaf, kay mulla di ala ɗifin ma ŋal-goyna hiɗi ɗifin ma kay sulukŋa nam ma li kay sa Israyel kaf.

²⁵Nam lak sa Levitna hay ziyna vi Ma-Vatɗina hiɗi kaway-ma-cina, dilla hiɗi dil ŋulona, kuɗ hagata ta David hiɗi Gad, sa ma wi vokomna vi mulla hiɗi sa ma jobta Natan vul tisiya. Kay kayni ti dita vi Ma-Vatɗina, ta nam vula'a hay vun sa jobta valamu.

²⁶Sa Levitna lak gaa'a hiɗi sle ma gi nulla vi David hay ɓisiya, muliyan-sa-ɗifinna hiɗi togolomna may.

²⁷Ezekiyas di kay nisi ma li ɗifin ma ŋal-goyna kulo kay giwin-ma-ɗifinna. Hay li ma nisi tun caw li ɗifin ma ŋal-goyna, nisi tun caw gi nulla tam Ma-Vatɗina, hiɗi togolomna, tapay hiɗi sle ma gi nulla vi David, mulla vi Israyel.

²⁸Sumun kaf dab voksi gaa'a, nisi gi nulla, nisi buw togolomna, ta-ta vatta vi ɗifinna tuwa.

²⁹Hay li ma nisi vat lopna vi ɗifin ma ŋal-goyna vatna, mulla hiɗi sum sa kuɗumna kaf girif gaa'a, nisi dab voksi gaa'a.

³⁰Bugolda mulla Ezekiyas hiɗi sa ministrena valamu di tam sa Levitna kay subur Ma-Vatɗina hiɗi yoboyna vi David hiɗi sa ma wi vokomna Asaf, nisi suburumu hiɗi firit haysi ŋolo, nisi her gaa'a, girifa kaw.

³¹Bugolda Ezekiyas sli ditiya nam di'e: Wulin kayni Ma-Vatɗin tungiyawa hay lopna valamu, nala nigiyay goboyo, margi farayna, ligi ɗifin ma hot gi-deɓta tam Lawna hay ziyda valamu. Tokŋa mar farayna, nisi li ɗifin ma suburta, sum sa diksi min vulda kaf li ɗifin ma ŋal-goyna.

³²Faray ma nisi maramu kay ŋalam ɗifini noŋ pet kayni, luwayn dok-siɗiya, fok-gamalan kis, guro fok-dimin kis ma'; kaf kayni nisi ŋalam ɗifini tam Ma-Vatɗina.

³³Bugolda nisi yaw luwayn kis-karkiya, fukunayna birim ɦidi, nisi cukum ɗifin kaf.

³⁴May muliyan-sa-ɗifinna kiɗa goyo, nisi may as kay za farayn goy kafɗi; nala ɓosiyosina sa Levitna gutsiya, ta-ta lopna vat goyo, ta-ta muliyan-sa-ɗifinna segena li tuwsi goy peldete tuwa, kay sa Levitna var hiɗi diksi kay li tuwsi goy peldete suw muliyan-sa-ɗifinna.

³⁵Ɗifin ma ŋal-goyna ay ŋolo hay na'ta, hiɗi mul-sliwna ma li ɗifinna vi lop ma slugona, hiɗi mul ma yamam goyna vi ɗifin ma ŋal-goyna. Ki kayn nala dakka ta hay ziyda vi Ma-Vatɗina nisi hot tuna'awa.

³⁶Ezekiyas hiɗi sumun kaf li firiya kay mige Lawn kot slenawa kaf kay sumuna, kay van kayni nam li koloy wit'.