Read Masana 2 LABAR-MA-LIYNA 3 Bible Online

2 LABAR-MA-LIYNA 3 - Masana bible

2 LABAR-MA-LIYNA 3

¹Salomon tun caw in ziyda vi Ma-Vatɗina hay Yerusalem, kulo kay hiɗiyta vi Moriya,[1] ta ay ɗeki kir bulumu David, hay liyn ma David kotom kulo hay muɗakŋa vi Ornan ma Yebusna.

²Nam tun caw in ziyn kayni hay til ma ma'na vi busata fiɗita vi mulda valamu.

³Kayni mi buɗukŋa vi ziyda vi Lawna ta Salomon ina'ta: Fiyokka kuɗ goldoŋŋa hiɗi ŋaɓta ta jewta ir goldoŋ dok-karkiya, be'da va'a ir goldoŋ dok-ma'.

⁴Diɓira ma voka'na fiyokka valamu ir goldoŋ dok-ma', ŋray ca hiɗi be'da vi ziyda, fiyokka valam ta kulota ir goldoŋ kis kalam dok-ma', hayam ma kalafna Salomon korom hiɗi or ma bay-rigasna.

⁵Ziyda-ŋolda nam bara' ya' hiɗi gu-siprena; nam bara' ya' hiɗi or ma ŋaana, nam ceɗ gomona hiɗi jaɓna ma gurayna kulo tam ziyda.

⁶Nam kor tuw ziyda hiɗi hiɗiy ma ŋaana kay ɗo' tuwa'a; ora mi or ma hay Parvayim.

⁷Nam kor ziyda hiɗi ora, kor tuw gu-malla, vun-ziyda, tuw-ziyda, cokoromna, nam ceɗ kerubena* kulo kat ziyda kaw.

⁸Nam kot ziyda vi ma peldet suw kafna; fiyokka va'a ir goldoŋ dok-ma', nam kora' tuwa' hiɗi or ma ŋaana ir talente* kis-karkiya,

⁹nekka vi ora ma kot oslna ir sikel* dok-vasl. Ziy ma kulo kamna nam korom tuwam hiɗi ora kaw.

¹⁰Nam ceɗ keruben* ma' hay ziyda vi ma peldet suw kafna, korom tuwam hiɗi ora kaw.

¹¹Gilaŋat kerubena fiyokka valam ir goldoŋ dok-ma'. Gilaŋat kerube ma jewna, fiyokka valamu ir goldoŋ vasl, jo ta-ta tam tuw ziyda, gilaŋatam hena, fiyokka valamu ir goldoŋ vasl, co ta-ta tam gilaŋat kerube ma ma'na.

¹²Gilaŋat kerube ma ma'na, fiyokka valamu ir goldoŋ vasl, jo ta-ta tam tuw ziyda, gilaŋatam hena fiyokka valamu ir goldoŋ vasl, co tam gilaŋat kerubena ma jewna.

¹³Gilaŋat kerube namna meɗi goyo, co ta-ta ir goldoŋ dok-ma'. Nam ka lakay kulo'o kay selemu, iram ka muɗi kir ziyda.

¹⁴Sligar ma gaɓayna nam kotom goɗiya, hena purpella hiɗi slawi hiɗi haɓi kaw, nam ɗo keruben kulo talamu may.

¹⁵Goy vok ziyda nam kot dolla ma' ma fiyokka valamu ir goldoŋ dok-ɦidi yam vasl, hiɗi yalam ma dilarayna ir goldoŋ vasl.

¹⁶Nam kot jaɓ ma gurayna ki ma hay liyn ma peldetna nala, nam lakam kulo'o hay yam dolla, nam mok sle ma kolo-kolon kis, nam kalam kalaf hay jaɓna.

¹⁷Nam lak dolla goy vok Tempella, kep gal jufu, kep gal gulu. Ma gal jufna nam tunum selem ala Yakin, ma gal gulla nam tunum selem ala Bowaz.