Read Masana 2 LABAR-MA-LIYNA 30 Bible Online

2 LABAR-MA-LIYNA 30 - Masana bible

2 LABAR-MA-LIYNA 30

¹Ezekiyas gi sunda hay Israyel hiɗi Yuda noŋ kafe, nam ɗo ɗerwelda kaw kat jafna vi Efrayim hiɗi Manase, kay nisi ma co hay ziyna vi Ma-Vatɗina, hay Yerusalem, kay li yuldeta vi Paskata, kay subur sem Ma-Vatɗina Lawna vi Israyel.

²Mulla, sa ministrena valamu hiɗi tokŋa kaf li ŋra-vunda hay Yerusalem kay li yuldeta vi Paskata hay til ma ma'na,

³kay nisi asay kay li yuldeta hay liyna valamɗi, kay mige, muliyan-sa-ɗifinna sa tuwsi li goy peldetna may asay ŋolɗi, sumun may tokay hay Yerusalemɗi kaw.

⁴Lawta kayni mulla hiɗi tokŋ kaf vi kuɗa'a,

⁵nala nisi fi varta kay siwel labara goy hay Israyel kaf, fokay hay Ber-Seba pa ta-ta hay Dan, kay sumun ma co hay Yerusalem li yuldeta vi Paskata kay subur sem Ma-Vatɗina, Lawna vi Israyel. Kay sumun ŋolo may li yuldeta vi Paskata ki ɗoy hay ɗerwelda nalaɗi.

⁶Sa jaŋ labara kali hiɗi ɗerwelda vi mulla hiɗi sa ministrena valamu kaw hay Israyel hiɗi Yuda kafe, kuɗ va ma mulla di tisiya, nisi di'e: Gurona vi Israyel, hotgiyay tam Ma-Vatɗina, Lawna vi Abraham, Isaak hiɗi Israyel, kay nam kaw ma hotay kirgiya, nigi caw sum sa hin goy kuɗ muliyana vi Asiriya.

⁷Nigi ma li ki sumaygiya hiɗi guro-biyogin naɗi, nisi min vi kuɗ Ma-Vatɗina Lawna vi sumaysiɗi, kuɗ na'ta kayni nam vulsi goy vun-lawta, ki nigi ka wi nala.

⁸Kuɗ ta wulinta, nigi ma so dekdelgi goy ki sumaygi naɗi; vigi ɓigi mi Ma-Vatɗina, nigiyay hay liyna valam ma peldetna, ma nam lumawa goy peldete kay dok-doko, sungi Ma-Vatɗina Lawna vigiya, kay ɦiyda valam ta ŋolda ma vi tuwa' goy tigiya.

⁹La nigi hotay tam Ma-Vatɗina, ɓosiyogina hiɗi gurona vigiya ma fi slugota vok ir sum sa yawsi gorvona, nala nisi ma hotay hay nagat tani; kay Ma-Vatɗina Lawna vigiya nam li slugota, nam wi haw sana, nam may muɗ iram goy kigiɗi, la nigi hotay talamu.

¹⁰Sum sa jaŋ labar kaf jik hay hoyok-ziyna kaf ma hay nagat vi Efrayim hiɗi Manase kaf, ta-ta hay Zabulon. May sumun ka cen kuɗsiya, ka burahsiya kaw.

¹¹May hiɗi kayni kaf, sum sara'a hay jafna vi Aser, Manase hiɗi Zabulon hot yisi gaa'a, nisi co hay Yerusalem.

¹²Hay Yuda kaw Ma-Vatɗina li lopo kay vulsi dikga kepta kay nisi ma hum kuɗ dita vi mulla hiɗi sa lopna valamu, kuɗ yoboyna vi Ma-Vatɗina

¹³sumun ŋolo tok tuwsi hay Yerusalem kay li yuldeta vi fun-bay-kufna hay til ma ma'na, dakka na'ta sumun dak haya' ŋolo.

¹⁴Nisi yaway kulo'o, giwin-ma-ɗifinna ma hay Yerusalem nisi tom goyo, liyn ma ŋal urdina hay kaf nisi tom goyo, cukum goy hay zulla vi Sedron.

¹⁵Hay buurta doogo yam fiɗita vi til ma ma'na, nisi ŋat fok-dimi ma Paskana. Muliyan-sa-ɗifinna hiɗi sa Levitna, hay li ma zulot visiya, nisi li tuwsi goy peldete. Nisi li ɗifin ma ŋal-goyna hay ziyda vi Ma-Vatɗina.

¹⁶Nisi ka lakay hay liyna visi ma nisi ka lak hayam dok-dokŋa, ŋray ca kuɗ va ma vun-ma-gatna vi Musus sana vi Lawna di'e. Muliyan-sa-ɗifinna ka yam busuwn goyo, nisi ka vi busuw namna hay ɓam sa Levitna.

¹⁷Kay sumun ka ŋolo hay tokŋa bay li tuwsi goy peldete, sa Levitna va' tisi kay ŋat fok-dimi ma Paskana kay sumun kaf sa tuwsi may li goy peldetɗina, kay nisi min vulsi goy ɗifini mi Ma-Vatɗina.

¹⁸Kay gal ma ŋolla vi sumuna, ŋolo kuɗ jafna vi Efrayim, Manase, Isakar hiɗi Zabulon kaf bay li tuwsi goy peldete. Nisi ti Paskata bay li kuɗ va ma ɗoyna, kuɗ na'ta kayni Ezekiyas siɗaw kisiya hay li ma nam di'e: Ma-Vatɗina, naŋu ma ŋaa ŋolo, vulaŋ gida,

¹⁹mi nisi kaf sa vul diksi goyo kay garaŋ naŋ Lawna, Ma-Vatɗina, Lawna vi sumaysiya, bay li muzta-peldetta goy jewe!

²⁰Ma-Vatɗina hum Ezekiyas, nam vul gid mi sumuna.

²¹Ki kayn nala sa Israyella sa ka hay Yerusalem li yuldeta vi fun-bay-kufna ir buur siɗiya, hiɗi firita ŋolo. Hay buurta kaf sa Levitna hiɗi muliyan-sa-ɗifinna ka subur sem Ma-Vatɗina dono ŋolo hiɗi slen ma gi nulla kaf.

²²Ezekiyas law hay dik sa Levitna kaf, sa ka poŋ ir ŋolo kay slena vi Ma-Vatɗina, nisi ti sliw sle ma ŋatamna ir buur siɗiya, nisi li ɗifinna vi lop ma slugona, subur sem Ma-Vatɗina Lawna vi sumaysiya kaw.

²³Sumun kaf vunsi ŋra'a kay li yuldeta hay buur mara siɗiya lo, buur hena ma siɗiyana nisi li yuldet hayamu hiɗi firita.

²⁴kay Ezekiyas mulla vi Yuda tar luway-takalin kisi birim kep, fukunayn birim siɗiya, sa ministrena valamu kaw tar luwayn kisi birim kepe, fukunayn birim doogo. Muliyan-sa-ɗifinna ŋolo li tuwsi goy peldete.

²⁵Tokŋa vi Yuda kaf, muliyan-sa-ɗifinna hiɗi sa Levitna, sumun kaf sa may hay Israyel pa hiɗi sum sa pulla sa may hay nagata vi Israyel pa hiɗi sa lakay hay Yuda kaw li firi ŋolo.

²⁶Firit li ŋolo hay Yerusalem. Tun caw hay liyna vi Salomon goora vi mulla David mulla vi Israyel pa, va mara ma ki kayn nala bay li hay Yerusalem tuwa.

²⁷Muliyan-sa-ɗifinna hiɗi sa Levitna yaway kulo'o, nisi gi bol kay sumuna. Ma-Vatɗina humsi delsiya, siɗawta visi co ta-ta hay liyn ma musta valamu hay Wuralawna.