Read Masana 2 LABAR-MA-LIYNA 31 Bible Online

2 LABAR-MA-LIYNA 31 - Masana bible

2 LABAR-MA-LIYNA 31

¹Hay li ma slen kayni kaf vatawa, nisi sa Israyella kaf sa ay hay liy namna kali hay hoyok-ziyna vi Yuda kaf, sle ma sli tuw sana ma inina nisi tom gaa'a, naga ma inina ma yum Asera* nisi tom gaa'a, liyn ma ɗiŋiriŋŋa kaf nisi tom gaa'a, giwin-ma-ɗifinna ma hay Yuda hiɗi Benyamin, ma hay Efrayim hiɗi Manase kaw nisi tom gaa'a. Bugol kayni sum sa Israyel kaf hotay hay hoyok-ziyna visiya, gigekaw hay liyna valamu valamu.

²Ezekiyas poŋ ir muliyan-sa-ɗifinna hiɗi sa Levitna kuɗ vokŋa visiya visiya, gigekaw hay lopna valamu valamu, muliyan-sa-ɗifinna hiɗi sa Levitna hay lopna vi ɗifin ma ŋal-goyna, hiɗi ɗifinna vi lop ma slugona, kay li sunda, kay tiy semda hiɗi suburta, hay vun-galana vi kaŋŋa vi Ma-Vatɗina.

³Mulla vul galla vi farayna valamu kay li ɗifin ma ŋal-goyna, ɗifin ma ŋal-goyna ma graw culumta hiɗi ma vulatitna, hiɗi ɗifin ma ŋal-goyna kay sabatna, kay til ma wulina, kay buur ma ŋulona, ki ɗoy hay vun-ma-gatna vi Ma-Vatɗin nala.

⁴nam di tam sumuna, tam sum sa hay Yerusalemna kaw, kay nisi ma vul galla vi muliyan-sa-ɗifinna hiɗi sa Levitna goyo, kay nisi ma lak ɗeŋe hay gatta vi Ma-Vatɗina.

⁵Hay li ma labar kayni biya goy biyana, sum sa Israyella vul vun-jaf ma jewna vi alkamarena, vinna ma jibetna, mula, yumda, hiɗi vuɗna vi sle ma hay sinen kaf, nisi vulum ŋolo; gal-ma-doogona vi slen kaf nisi maram ŋolo. Gal-ma-doogona vi sle hegen kaf kaw nisi maram ŋolo.

⁶Nala kaw, gurona vi Israyel hiɗi gurona vi Yuda sa ka lakay ziy hay hoyok-ziyna vi Yuda vul gal-ma-doogona vi luwayna hiɗi fukunayna, gal-ma-doogona vi sle ma peldetna ma vuli goy tam Ma-Vatɗina Lawna visiya. Nisi pi muɗak goy dak-dak.

⁷Nisi tun caw pi muɗakŋa hay til ma ɦidina, nisi vat goy hay til ma siɗiyana.

⁸Ezekiyas hiɗi sa ministrena valamu co'o kay ɗuw muɗak ma piyna, nisi subur Ma-Vatɗina, nisi gi bol kay sa Israyella kaw.

⁹Ezekiyas job muliyan-sa-ɗifinna hiɗi sa Levitna kay muɗak namna ma molina.

¹⁰Mul ŋol ma-ɗifinna Azariya ma hay jafna vi Sadok hotom dita: Hay li ma sumun tun caw mar vulda hay ziyda vi Ma-Vatɗin pa, sumun ka ti'e, ka hob kaw, ma suw goyna nam ŋol noŋo, kay Ma-Vatɗina gi bolawa kay sumuna valamu; may ma suw goyna ka molay goy tan kayn mi namu.

¹¹Ezekiyas vul hagata kay nisi ma kot ziy ma gurayna kalaf hay ziyda vi Ma-Vatɗina; nisi kotomu kaw.

¹²Hiɗi diksi kep nisi mar vulda, gal-ma-doogona hiɗi slen ma peldetna. Sa ma Levitna Konanya ka ŋom slena, sa ma ma'na ma tapay talamna mi ɓasulumna Simey.

¹³Yehiyel, Azazya, Nahat, Asayel, Yerimot, Yozabad, Eliyel, Yismakya, Mahat hiɗi Benaya kayn si sa ɗuw slena, nisi ka gaa kuɗ gaŋeraŋa vi Konanya hiɗi ɓasulumna Simey, kuɗ va ma mulla hiɗi Azarya ma ŋom ziyda vi Ma-Vatɗina di'e.

¹⁴Sa ma Levitna Kore, goora vi Yimna, ma ŋom vun-gala ma gal kuɗuwna, namu mi ma ŋom vulda kuɗ minda ta la' tam Lawna, kay ɓuraw slen ma vulum tam Ma-Vatɗina hiɗi slen ma suwi peldetna.

¹⁵Hay hoyok-ziy ma li ɗifin hayna, Eden, Minyamin, Yosuwa, Semayeya, Amarya hiɗi Sekaniya, nisi ka lakay kuɗ gaŋeraŋa valamu, kay li ɓurawt tam ɓosiyosin hay liya'a, li ɓurawta tam sa ŋulona hiɗi sa gurayn kaf kuɗ vokŋa visiya visiya.

¹⁶May tam sum sa ŋaɓay goyo, tun caw tam busat ɦidi pa ta-ta kulo kalam ɗawn ɦawaɗi, may tam nisi sa cuk kalaf hay buurta kaf hay ziyda vi Ma-Vatɗina kay li lopna, kuɗ vurnata vi ŋomda ta tuni kisita, kuɗ vokŋa visi kafe.

¹⁷Tam muliyan-sa-ɗifinna sa ŋaɓay goyo kuɗ ziyna visiya visiya, tam sa Levitna sa busata visi dok-ma' pa ta-ta kulo vok ɗaw, kuɗ vurnata vi ŋomda ta tuni kisita hiɗi vokŋa visi kafe,

¹⁸tam nisi sa jar tapna kaf, sa ŋaɓay goyo hiɗi gurona visi sa gurayn kaf, boyna visiya, gurona visi sa jufayna hiɗi sa boyna, kay tuwsi vuli goy kafe kay li lop hay liyn ma peldetna.

¹⁹Kay gurona vi Aaron, muliyan-sa-ɗifinna sa lakay goy kawiya'a, vun hoyok-ziy ma ŋulona, hay hoyok-ziyn kaf sum segen ka'a yiy goy hiɗi sesiya kay ɓuraw galla vi sumun kaf jar muliyan-sa-ɗifinna hiɗi sa Levitna sa ŋaɓay goyna.

²⁰Kayni mi slen ma Ezekiyas lum hay Yuda kafna, nam la' ti ŋaata, ɗigerta hiɗi gasita kaw vok ir Ma-Vatɗina, Lawna valamu.

²¹Hay lopn kaf ma nam lumu kay dakka hay ziyda vi Lawna, kay gatta hiɗi vun-ma-gatna, hay li ma nam gar minda vi Lawna, nam lum kayn hiɗi dikam kaf, lopna valam tuɗ ŋaa'a kaw.