Read Masana 2 LABAR-MA-LIYNA 32 Bible Online

2 LABAR-MA-LIYNA 32 - Masana bible

2 LABAR-MA-LIYNA 32

¹Bugol slen kayni hiɗi lopna vi vida, Sankerib mulla vi Asiriya co'o, nam kal kulo hay Yuda, nam ŋuy hoyok-ziy ma donona, vul hagata kay nisi ma co gulmunna.

²Hay li ma Ezekiyas wi ala Sankerib coya, nam min ŋuy Yerusalem kaw,

³Ezekiyas ŋra vunam hiɗi sa ŋulona valamu hiɗi sa ŋulona vi duura kaw, kay kaara ma goy bugol hoyok-ziyn kaf nisi ma tosom goyo.

⁴Nisi gutumu, sumun ŋolo tok tuwsiya, kaara hiɗi niy-ma-riŋŋa ma ka riŋ hay liyna visi kaf nisi tosom goyo. Kay nisi di ala: Hay li ma sum sa Siriyan co tan ɗawni, a nisi fi niyn voksi kiɗi-kiɗi' kayn kay mige?

⁵Ezekiyas muɗ mulda valam ŋolo; ir gulmun ma munina nam hot inim kulo'o, ŋram kulo hiɗi simdir ca, nam in gulmun mara goy bugolomu, nam kot tuw gulmunna ma tam ziyna vi Davidna, nam gar sle-ma-duura hiɗi marayn ŋolo kaw.

⁶Nam tun sa ŋulona vi sojena kay sumuna, nam toksi talamu, hay faatana, hay vun-galana vi hoyok-ziyna. Nam ka gatsi ala:

⁷Ligi tuwgi dono'o, ligi kursuliya, ligi narɗi, tuwgi ma vigi bat-bat' vok mulla vi Asiriya hiɗi sum sa kuɗum ɦini-ɦininɗi; kay sum sa ka kuɗgina suw sum sa ka kuɗumna.

⁸hiɗi nam kayni si sum sa hiɗi gilaŋsi ɦawa, may naya, Ma-Vatɗina Lawna vaya, nam as gutaya, nam as vulay donot hay duura. Sumun col kay dita vi Ezekiyas mulla vi Yuda.

⁹Bugol kayni, Sankerib mulla vi Asiriya cuk sojena valamu hay Yerusalem, hay li ma nam ka hay Lakis hiɗi sojena valam kafe; nam cuksi kat Ezekiyas mulla vi Yuda, kat sumuna vi Yuda sa hay Yerusalem kaf, kay disi ala:

¹⁰Sankerib mulla vi Asiriya ka di ala: Nigi lakay hay Yerusalem, vun-zlat kayni, nigi tun vida vigi kayn kay gige?

¹¹Hay li ma Ezekiyas ka digi ala: Ma-Vatɗina Lawna vigiya ma butgi goy hay ɓam mulla vi Asiriya, kayni nam ka zutgi kay numa ma cigi goyo hiɗi mayta hiɗi laata ɗisu?

¹²Ezekiyas kayni mi ma to liyn ma ɗiŋiriŋŋa gaa'a, hiɗi giwin-ma-ɗifinna vi Ma-Vatɗina, numa mi ma di tam Yuda hiɗi Yerusalem ala: nigi ma girif gaa vok giwin-ma-ɗifin kepe tuta, nigi ma ŋal ɗifin kalam nam kep tuta, mi nam ma di nalana ɗisu?

¹³Nanu hiɗi sumiyanu nigi may wi va ma numa lum tam sum sa hay naga hena ɗisu? Lawayna vi sum sa hay naga namna butsi goy hay ɓan gasi but su?

¹⁴Jar lawayna vi sum nisina sa sumiyan ɓulaksi goyn lakŋi, mara kuɗumu ma but sumuna valam goy hay ɓanu ka su? May lawayna vigiya butgi goy hay ɓan ɗawn buttige?

¹⁵Wulin kayni Ezekiyas ma ɗutgi goyɗi, nam gigi yigi ki kayn naɗi kaw, tungi vida vigi hayamɗi, kay laway mara'a vi jaf-sum sara'a lebo vi mulda tara'a ma as but sumuna valam goy hay ɓan nanu hiɗi ɓam sumiyanu mayɗi. Nala lawayna vigiya as butgi goy hay ɓanɗi kaw.

¹⁶Sa sunda vi Sankerib hot law joo'o lo kat Ma-Vatɗina hiɗi sa ma sunda valamu Ezekiyas.

¹⁷Sankerib ɗo ɗerwelda ta ŋulda kep tam Ma-Vatɗina Lawna vi Israyel, nam ka di joo katam ala: Ki lawayna vi naga hena but sumuna visi goy hay ɓanɗi nala, Lawna vi Ezekiyas ma but sumuna valam goy hay ɓanɗi kaw.

¹⁸Nisi siwel hiɗi delsi kulo ŋolo hay vun Yudiyana, kay gi narta hiɗi ɓirta dikga jar sum sa hay Yerusalemna sa ka molay kulo kay gulmunna, kay hiɗi kayni nisi min sli hoyok-ziyna.

¹⁹Nisi law kat Lawna vi Yerusalem ŋray ca ki san ka law kayni kat lawayna vi sum sa nagatna sa ini hiɗi ɓam sana nala.

²⁰Mulla Ezekiyas hiɗi sa ma jobta Esaya goora vi Amos tun caw siɗaw kay lawta kayni, nisi siwel kulo hay wuralawna.

²¹Ki kayn nala Ma-Vatɗina gi sunda-wuralawna kep, sum sa jufayna sa donona sa hay kaŋŋa vi mulla vi Asiriya kaf nam cisi goyo hay kaŋŋa, sa ŋulona vi sojena hiɗi sa ŋulona valam kafe. Ki kayn nala mulla hotay hay nagata valam hiɗi zulota. Nam kal kalaf hay ziyna vi lawayna valamu, ɗawni gurona valam sa nam vuɗsina cum goyo hiɗi kew-gaferaŋa.

²²Ki kayn nala Ma-Vatɗina suɗ Ezekiyas hiɗi sum sa hay Yerusalemna goy hay ɓam Sankerib mulla vi Asiriya, hay ɓam sumun kaf, nam ŋomsi hay ɓam sum sa ŋuyi tisina.

²³Sumun ŋolo mar vulda hay Yerusalem kat Ma-Vatɗina. Nisi mar vulda tam Ezekiyas mulla vi Yuda kaw, kay hay liyn namna pa Ezekiyas muɗi ŋolo kir jaf-sumun kaf.

²⁴Hay li namna kayni, Ezekiyas lo moyo, goboy vun mitta. Nam li siɗawta tam Ma-Vatɗina, Ma-Vatɗina di yoboyn talamu, li ɗekka kiramu kaw.

²⁵May Ezekiyas min gi deɓ mi Ma-Vatɗina kuɗ ŋaata ta nam fa'taɗi, kay suburta kal hayamu, nala Ma-Vatɗin muɗ ɦiy talamu, tam Yuda hiɗi Yerusalem kaw.

²⁶Nala Ezekiyas hin suburta vi dikamu, namu hiɗi sum sa hay Yerusalem kaf hot yisi gaa'a, kuɗ kayni hay buur ma irita vi Ezekiyas kaf ɦiyda vi Ma-Vatɗin may co kisiɗi.

²⁷Ezekiyas fi farayna ŋolo, nam fi gajijit ŋolo kaw, nam fi donot ŋolo, ora ŋolo, hiɗiy ma ŋaana hiɗi aromatna ŋolo, marayna hiɗi sle ma ti gurjut ŋolla dak-dak kaw;

²⁸nam in liyn ma cuk alkamaren hayamna ŋolo, slen ma ɦok vin ma jibetna hiɗi mula hayamna dak-dak kaw, nam vi guruna dak-dak kay farayn kuɗ jafam kaf, kot girlawna kay farayna kaw.

²⁹Nam kot hoyok-ziyna ma luwayna hiɗi fukunayna ka hayam dak-dak; kay Ma-Vatɗina vulum farayn ŋol suw asa.

³⁰Vun niyn ma ŋolla ma kali goy hay Gihon pana Ezekiyas tosom goyo, nam muɗum iram gaa'a, hay gal ma vulatina vi hoyok-ziyna vi David. Slen ma Ezekiyas lumna li hay liyam kafe.

³¹May, hay lawta vi sum sa cuksi ay Babilon pa kay vi labara kay ɗekka ma li hay nagata, Lawn noyom goyo kay wakamu, kay wi slen ma hay dikam kafna.

³²Caw lopna vi Ezekiyas ma hinina, humda valamu kuɗ gatta, kayni ka ɗoy hay wida-vokka vi sa ma jobta Esaya, goora vi Amos, ka ɗoy lo hay ɗerwelda vi muliyana vi Yuda hiɗi Israyel.

³³Ezekiyas miti kuɗ sumiyamu, nisi pum hay liyn ma kulo jiŋiliŋ suwna vi liyn ma pi gurona vi Davidna; jafna vi Yuda hiɗi sum sa hay Yerusalem kaf tiyim selem ŋolo hay mitta valamu. Goora valamu Manase ti mulda hay baŋalamu.