Read Masana 2 LABAR-MA-LIYNA 33 Bible Online

2 LABAR-MA-LIYNA 33 - Masana bible

2 LABAR-MA-LIYNA 33

¹Manase ka hiɗi busat doogo yam ma' hay li ma nam tun mulu, nam ti mulda ir busat dok-vasl yam vasl hay Yerusalem.

²Nam li sle ma joona vok ir Ma-Vatɗina, nam kal tuwam hay lop ma liwisna vi jaf-sum sa Ma-Vatɗin digiɗsi vok sa Israyella.

³Liyn ma diŋiriŋŋa ma bulum ɦom gaana nam hot inim kulo'o, nam in giwin-ma-ɗifinna mi Baal, nam in nagana, yum selem Asera*, nam girif gaa vok mislek ma dukalawn kaf, ka siɗawamu kaw.

⁴Nam in giwin-ma-ɗifinna hay ziyda vi Ma-Vatɗina, kayni ti ziyda ta Ma-Vatɗin di ka' ala: Semda vanu ma yi hay liy namna dok-doko.[10]

⁵Nam in giwin-ma-ɗifinna tam mislek ma dukalawna kaf, hay wur-daŋŋa ma ma'na vi ziyda vi Ma-Vatɗina kaw.

⁶Nam ŋal gurona valam goy hay kuta hay lokŋa vi gurona vi Hinnom; nam di law ma vokŋa, da fulla, li guna kaw. Nam tun sum sara'a kay job kuɗ sa mitina, di law ma voksina kaw. Nam li slen ma joon vokom suwa tam Ma-Vatɗina, kay ɓulakam dikamu.

⁷Va ma ceɗay sli tuw sana nam colom hay ziyda vi Lawna. Kayni mi va ma Lawna di tam David hiɗi goora valam Salomon ala: Hay ziyda zawni, hay Yerusalem tani ta nan vileka'a jar jafna vi Israyel kaf, nan ma tun semda van haya'a kay dok-doko.

⁸Sum sa Israyella nan ma jasi jarsi goy gine'e hiɗi nagata ta nan vula' mi sumaygitɗi, la nisi li kuɗ slen ma nan ɗekem tisi kafna, la nisi li kuɗ gatta kafe, ɗota hiɗi slen ma colina kafe, ma vuli tisiya hay ɓam Musus.

⁹May slen ma Manase lumna nam viy jafna vi Yuda hiɗi sum sa hay Yerusalem kaf goyo, hay li ma nisi muɗ li joo suw jaf-sum sa Ma-Vatɗina ɓulaksi voksina.

¹⁰Ma-Vatɗina law tam Manase hiɗi sumuna valamu, may nisi min tun ŋalda visiɗi.

¹¹Nala Ma-Vatɗina cuk sa ŋulona vi sojena vi Siriya ay katalamu, nisi vi Manase hiɗi silikŋa, nisi junum hiɗi jaɓna ma wayna, kalam hay Babilon.

¹²Hay li ma nam kalawa hay vun-zlata, nam tiy tam Ma-Vatɗina Lawna valamu, nam hot yalam gaa dono ŋolo vok Lawna vi sumiyamu.

¹³Nam siɗaw tam Ma-Vatɗina, Ma-Vatɗin hum siɗawta valamu, Ma-Vatɗin hum giɗel-delta valamu, hotomay hay Yerusalem hay mulda valamu. Ki kayn nala Manase wi ala Ma-Vatɗina nam mi Lawna.

¹⁴Bugol kayni, nam in gulmunna goy ŋor hoyok-ziyna vi David, hay gal ma vulatina vi Gihon, hay lokŋa, ta-ta co tam vun-galana vi kulufna. Nam ŋuyi tam Ofel, nam wulum kulo fiyok ŋolo, nam lak sa ŋulona vi sojena hay hoyok-ziyna vi Yuda kafe.

¹⁵Lawayn ma pulla ma ka hay ziyda vi Ma-Vatɗina hiɗi va ma sli tuw san naana nam yawam goy hay ziyda vi Ma-Vatɗina, hiɗi giwin-ma-ɗifinna kaf ma nam inim kulo hay hiɗiyta vi ziyda vi Ma-Vatɗina hay Yerusalem, nam cukum goy gine'e hiɗi hoyok-ziyna.

¹⁶Nam hot in giwin-ma-ɗifinna vi Ma-Vatɗina, nam li ɗifinna vi lop ma slugona hiɗi ɗifin ma gi-deɓta kulo kalamu, nam di tam jafna vi Yuda kay nisi ma sun Ma-Vatɗina Lawna vi Israyel.

¹⁷Hay na'ta sumun ka li ɗifin kayn kulo kay liyn ma ɗiŋiriŋŋa, may nisi ka lum kayni tam Ma-Vatɗina Lawna visiya.

¹⁸Caw lopna vi Manase ma hinina, siɗawta valamu tam Lawna valamu, hiɗi yoboyna vi sa wi voksina ma nisi di talamu hay sem Ma-Vatɗina Lawna vi Israyel, kayni ka ɗoy hay lopna vi muliyana vi Israyel.

¹⁹Siɗawta valamu hiɗi humda ta Lawn humumu, sulukŋa valamu hiɗi bay-ɗigerta valamu, liyn ma nam in liyn ma ɗiŋiriŋŋa haya, ma nam in naga ma yum Asera* haya, hiɗi slen ma sli tuw sana jew a nam hot yalam gaa'a, kayni ka ɗoy hay ɗerwelda vi Hosay.[11]

²⁰Manase mit kuɗ sumiyamu, nisi pum hay ziyna valamu, goora valamu Amon ti mulda hay baŋalamu.

²¹Amon ka hiɗi busat dok-ma' yam ma' hay li ma nam tun mulu; nam ti mulda ir busat ma' hay Yerusalem.

²²Nam li slen ma joona vok ir Ma-Vatɗina, ki bulum Manase li nala, slen ma sli tuw sana ma bulum Manase kotomna, nam li ɗifin talam kaf, girifimu kaw.

²³Nam may hot yalam gaa vok Ma-Vatɗina ki bulum Manase hot yalam gaa naɗi, kay namu Amon li tuwam joo suwa.

²⁴Sa sunda valamu fok lawt kalamu, nisi cum goyo hay ziyna valamu.

²⁵May sum sa hay nagatna ci sum sa fok lawt kalamna goy kafe, sum sa hay nagatna tun goora valamu Yosiyas mulu hay baŋalamu.