Read Masana 2 LABAR-MA-LIYNA 35 Bible Online

2 LABAR-MA-LIYNA 35 - Masana bible

2 LABAR-MA-LIYNA 35

¹Yosiyas li yuldeta vi Paskata hay sem Ma-Vatɗina hay Yerusalem, nam ŋat (fok-dimi ma) Paskana hay buurta doogo yam fiɗita vi til ma jewna.

²Nam tun muliyan-sa-ɗifinna hay lopna visiya, vulsi donota kaw hay lopna vi ziyna vi Ma-Vatɗina.

³Nam di tam sa Levitna sa ka hat sa Israyella kafna, sa tuwsi vuli goy mi Ma-Vatɗina ala: Timgil ma peldetna nigi ma tunum hay ziyna ma Salomon goora vi David mulla vi Israyel inimna; nigi ma ziyim kay pelgi loɗi, wulin kayni sungi Ma-Vatɗina Lawna vigiya, hiɗi sa Israyel kafe.

⁴Ɓurawgi tuwgi goyo kuɗ jafna vigi kaf, kuɗ vokŋa vigi kaf, kuɗ ɗota vi David, mulla vi Israyel, hiɗi goora valamu Salomon.

⁵Lakgi goy hay liyn ma peldetna, kuɗ jafna vi guro-biyogin valamu valamu, gurona vi sumuna, kuɗ vokŋa vi jaf sa Levitna kaw.

⁶Ŋatgi (fok-dimi) Paskana, ligi tuwgi goy peldete, nigi ma kotomu kay guro-biyogina, hay li ma nigi li kuɗ yoboyna vi Ma-Vatɗina ma Musus dum dina.

⁷Yosiyas yaw fukunayna, guro fok-dimina hiɗi guro fok-meena kaw, kay nam min ŋatam goy Paska kaf kay sumuna sa ka tokay talamna, nam tapay noŋ pet birim dok-ɦidi, luwayna birim ɦidi kaw, kayni mulla yawam kuɗ farayna valamu.

⁸Sa ministrena valam kaw, kuɗ minda visiya, nisi yaw farayn goyo kay sumuna, kay muliyan-sa-ɗifinna hiɗi sa Levitna. Hilkiya, Zakariya hiɗi Yehiyel, sa ŋom ziyda vi Lawna vul fukunayna birim ma' hiɗi kis karkiya hiɗi luwayna kis-ɦidi tam muliyan-sa-ɗifinna kay ŋatam Paska'a.

⁹Konanya, Semayeya, hiɗi Netaneel sa ɓosiyomna, Hasabya, Yeyel hiɗi Yozabad, sa ŋulona vi sa Levitna, nisi yaw fukunayn goy birim vasl, luwayn kis-vasl kaw kay ŋatam Paska'a.

¹⁰Lopna tunawa li'e, muliyan-sa-ɗifinna hiɗi sa Levitna lak kulo kay sesiya, kuɗ vokŋa visiya visiya, kuɗ dita vi mulla.

¹¹Nisi ŋat (faray ma) Paskana; muliyan-sa-ɗifinna yam busuw ma nisi vum hay ɓam sa Levitna goyo, sa Levitna za farayn goyo may.

¹²Ma ŋalam goy ɗifinna nisi poŋom iram goy valamu, kay vulum kuɗ ziyn mara'a mara'a tam sumuna, kay nisi ma vulum tam Ma-Vatɗina, ki ɗoy hay ɗerwelda vi Musus nala, nam li nala kaw hiɗi farayna.

¹³Nisi zal fok-dimi ma Paskana hay kuta, ki gatta di nala, slen ma peldetna nisi zalam hay ŋalayna, hay doŋolayna hiɗi ŋarakŋa; nisi ɓurawam tam sumun gosoy gosoyo.[13]

¹⁴Bugol kayni, sa Levitna kot ma kay tuwsina, hiɗi ma kay muliyan-sa-ɗifinna gurona vi Aaron kaw. Kay muliyan-sa-ɗifinna gurona vi Aaron ka vun lopna ta-ta hay henjeta, kay li ɗifin ma ŋal-goyna hiɗi mula; kuɗ na'ta kayni sa Levitna ka kotom mi tuwsiya, mi muliyan-sa-ɗifinna gurona vi Aaron kaw.

¹⁵Sa gi nulla gurona vi Asaf ka lakay hay liyna visiya, ki David, Heman, Asaf hiɗi Yedutun ma wi vokomna vi mulla vul hagatis nala, sum sa ŋom vun-galana ka lakay hay vun-galan kafe; nisi may fi kay ja jarsi goy hay lopna visiɗi, kay guro-biyosina sa Levitna ka kotsi ir fisina.

¹⁶Ki kayn nala lopna vi Ma-Vatɗina kaf ma li yuldeta vi Paskata hiɗi ɗifin ma ŋal-goyna ma lum kulo kay giwin-ma-ɗifinna vi Ma-Vatɗina liy goy hay hagata valamu kaf, ki mulla Yosiyas vul hagata nala.

¹⁷Sum sa Israyella sa ka hay liy namna li yuldeta vi Paskata hay liy namna, hiɗi yuldeta vi fun-bay-kufna ir buur siɗiya.

¹⁸Hay buura vi Samuel ma jobta pa Paska tara ki kayn nala bay li hay Israyel tuwa. Paska na'ta ta Yosiyas hiɗi muliyan-sa-ɗifinna hiɗi sa Levitna hiɗi jafna vi Yuda hiɗi Israyel kaf sa ka hay liy namna, hiɗi sum sa hay Yerusalem kaf la'ta kayni, mul mara'a jar sa Israyella kep kaw bay la' ira'ta tuwa.

¹⁹Paska na'ta nisi la' kayni hay busata ta doogo yam glafandita vi mulda vi Yosiyas.

²⁰Bugol slen kayni kaf, bugol Yosiyas kot tuw ziyda vi Ma-Vatɗin goy kotna, Neko mul ma Egiptena co'o kay li duura hay Karkemis, kel Eufrata. Yosiyas kali goyo kay ŋafam iramu.

²¹Neko gi sunda talamu kay dum ala: Nan ma lum hiɗi naŋ mige mulla vi Yuda? Nan co vaydi kayni kay duraŋ naŋɗi; nan co kayni kay li duura hiɗi sum sa duura ka jaran hiɗi nisiya. Lawna di tan ala nan ma li tuwan koloyo. Lawn ka hiɗi nanu, naŋ ma col digamɗi, kay nam ma caŋ goyɗi.

²²May Yosiyas min vi tuwam goyɗi, nam muɗ tuwamu, min hum dita vi Nekoɗi, may dita vi Neko may hay vun Lawna pa. Nam co durumu hay lokŋa vi Megiddo.

²³Sum sa gi ɓarawta gi mulla Yosiyas hiɗi ɓarawta, mulla Yosiyas di tam sa sunda valamu: Nigi slan goyo, kay nan fi mil ma joowa.

²⁴Sa sunda valamu slumay gaa hay keke-ma-duura pa, burum hay keke hena, kalam hay Yerusalem. Nam mita, nisi pum hay zulda vi sumiyamu. Sum sa hay Yuda hiɗi Yerusalem kaf ti do'olla kay Yosiyas.

²⁵Yeremiyas kot nul ma tiyna kepe kay Yosiyas; sum sa jufayna hiɗi sa boyna kaf law kay Yosiyas hay nul ma tiyna visiya, ta-ta vaydi kaw nisi ka li nul namna hay Israyel.

²⁶Caw lopna vi Yosiyas ma hinina, lopna valamu ma hum vunna ma tapay hiɗi sle ma ɗoy hay gatta vi Ma-Vatɗina,

²⁷lopna valamu ma jewna hiɗi ma cawna, kayni ka ɗoy hay ɗerwelda vi muliyana vi Israyel hiɗi Yuda.