Read Masana 2 LABAR-MA-LIYNA 36 Bible Online

2 LABAR-MA-LIYNA 36 - Masana bible

2 LABAR-MA-LIYNA 36

¹Sum sa hay nagatna vi Yowahaz goora vi Yosiyas, nisi tunum mulu hay baŋal bulumu hay Yerusalem.

²Yowahaz ka hiɗi busat dok-ma' yam ɦidi hay li ma nam tun mulu, nam ti mulda ir til ɦidi hay Yerusalem.

³Mul ma Egiptena patam goyo hay Yerusalem, nam tun taara kay nagat noŋo, nisi ka wurakam doorota hiɗi talente* kis, talente ma ora kepe may.

⁴Mul ma Egiptena vi Elyakim ɓasum Yowahazna, nam tunum mulu kay Yuda hiɗi Yerusalem, nam muɗum selem ala Yehoyakim. Neko vi ɓasulumna Yowahaz, nam kalam hay Egipte.

⁵Yehoyakim ka hiɗi busat dok-ma' yam vasl hay li ma nam tun mulu, nam ti mulda ir busat doogo yam kep hay Yerusalem. Nam li slen ma joona vok ir Ma-Vatɗina Lawna valamu.

⁶Nebukadnesar mulla vi Babilon, fokay kulo kalamu, nam junum hiɗi pakalamna ma wayna, kay tuɗum hay Babilon.

⁷Nebukadnesar yaw sle ma ka hay ziyda vi Ma-Vatɗina, nam kalam hay Babilon, nam lakam hay ziyda valamu hay Babilon.

⁸Caw lopna vi Yehoyakim ma hinina, liwis ma nam lumna, va ma co talamna, kayni ka ɗoy hay ɗerwelda vi muliyana vi Israyel hiɗi Yuda. Goora valamu Yehoyakin ti mulda hay baŋalamu.

⁹Yehoyakin ka hiɗi busat glafandi hay li ma nam tun mulu, nam ti mulda hay Yerusalem ir til ɦidi hiɗi buur doogo hay Yerusalem. Nam li slen ma joona vok ir Ma-Vatɗina.

¹⁰Hay li ma busat wulit co goboyo, mulla Nebukadnesar kalam hay Babilon, hiɗi slen ma ŋaana ma hay ziyna vi Ma-Vatɗina. Sedekiyas ɓasum Yehoyakimna nam tunum mulu kay Yuda hiɗi Yerusalem.

¹¹Sedekiyas ka hiɗi busat dok-ma' yam kep hay li ma nam tun mulu. Nam ti mulda ir busat doogo yam kep hay Yerusalem.

¹²Nam li slen ma joona vok ir Ma-Vatɗina Lawna valamu; sa ma jobta Yeremiyas ma ka law talamu hay semda vi Ma-Vatɗina nam min hot yalam gaa vokomɗi.

¹³Nam fok kulo'o noŋo kat mulla Nebukadnesar ma halafamu hay semda vi Lawna, nam ŋel humamu, muɗ dikam ɗeŋe, min hotay tam Ma-Vatɗina Lawna vi Israyelɗi.

¹⁴Sa ŋulona vi muliyan-sa-ɗifinna kaf hiɗi sumun kaf jor bay-vida visi vok ŋol suwa; nisi tap kuɗ lop ma liwisna vi jaf-sum segen kaf; ziyna vi Ma-Vatɗina ma nam porom goy hay Yerusalemna nisi muɗum goy liwis kaf.

¹⁵Ma-Vatɗina Lawna vi sumaysi disi ay goy kirsi jewe hay vun sa sunda valamu, kay nam min hulot sumuna valamu hiɗi liyn ma musta valamu goyo.

¹⁶May nisi tun caw pan sa sunda vi Lawna, nisi pan yoboyna valamu, cen kuɗ sa jobta valamu kaw ta-ta ɦiyda vi Ma-Vatɗin kat sumuna valamu fok kulo'o, guna va'a (ma hota' gaana) may loɗi.

¹⁷Ki kayn nala Ma-Vatɗina gi mulla vi Kaldeen ay katsiya, sum sa joriyona visiya nam cisi goy hiɗi kew-gaferaŋa hay Tempella visiya; sum sa joriyona nam min hinsi goyɗi, guro-boynɗi, sa maariyanɗi, sum sa ɗuŋus haɓn kisin kaw. Nam vulsi kafe goy hay ɓalamu.

¹⁸Slen kaf ma hay ziyda vi Lawna, la ma ŋulo'o lebo ma guroyo, timgil ma hay ziyda vi Ma-Vatɗina, timgil ma hay ziyda vi mulla hiɗi sa ministrena valam kaf Nebukadnesar kalam hay Babilon.

¹⁹Nisi ŋal ziyda vi Lawn goyo, gulmun ma tam Yerusalemna nisi ɦom gaa'a, ziy ma mulda kaf nisi ŋalam goy hay kuta, slen ma ŋaana kaf nisi ŋalam goyo.

²⁰Sum sa hin goy kuɗ kew-gaferaŋa Nebukadnesar kalsi gorvo hay Babilon; nisi muɗ dab voksi gaa vokomu, vok gurona valamu kaw, ta-ta tam gaŋeraŋa vi mulda vi Persiya goŋ'.

²¹Kay hob vun yoboyna ma Ma-Vatɗina dum hay vun Yeremiyas; ta-ta nagat tun suka' kay sabatna va'a. Nagat hin goy hay tun-sukka hay buur ma ya' hini goy ɦawan kaf, ta-ta busata dok-siɗiya vat goy tuwa.[14]

²²Hay busata jewta vi Sirus mulla vi Persiya, kay hob vun dita vi Ma-Vatɗina ta nam da' hay vun Yeremiyas, Ma-Vatɗina zliy dik Sirus mulla vi Persiya kulo'o, Sirus law kulo' hiɗi delem ŋolo, ɗo ɗerwelda kaw goy tam sum sa kuɗ mulda valam kaf ala:

²³Kayni ti dita vi Sirus mulla vi Persiya, Ma-Vatɗina Lawn ma wuralawna vulan mulda ta gaa kay nagat kafe, nam vulan lopna kay nan ma inim ziya hay Yerusalem hay Yuda. Sa ma jargiya ma ir vi sumuna valamu ka su? La ka'a, Ma-Vatɗina Lawna valamu ma li hiɗi namu, hinim tuɗa kaw.