Read Masana 2 LABAR-MA-LIYNA 4 Bible Online

2 LABAR-MA-LIYNA 4 - Masana bible

2 LABAR-MA-LIYNA 4

¹Nam kot giwin-ma-ɗifinna ma wayna, fiyokka valamu ir goldoŋ dok-ma', buɗukka valamu ir goldoŋ dok-ma', fiyokka valam ta kulota ir goldoŋ doogo.

²Nam kot ŋarak ma yori kawayna, hay gaŋam gal hena tam gaŋam hena li goldoŋ doogo, tuwam kaf ŋray goy hoɗoɗ', fiyokka valam ta kulota ir goldoŋ vasl, zigew ma giy talamna li ir goldoŋ dok-ɦidi.

³Gaa kuɗ gaŋamu luwayn ka ɗoya, ŋuyi talam kafe, luway doogo vun tuwam hay goldoŋ kep; nam ka ŋuyi goy kat ŋarak ma yori kawayn kaf. Luwayn jakay kay tuwam ma', yoray kuɗ tuwam hiɗi ŋarakŋ kepe.

⁴Ŋarak namna ka tuni kulo kay luwayn doogo yam ma': Luway ma ɦidina iram muɗi hay gal gaa'a, luway ɦidi iram gal vulatiya, luway ɦidi iram muɗi gal kayami, luway ɦidi iram muɗi gal kuɗuwu. Ŋarakŋa ka tuni kulo kalamu, ŋor luway namna kaf ka muɗi kalafi.

⁵Be'da valam ŋray ca hiɗi be'da vi way-ɓamta, gaŋam kotiya ki gaŋ tasata nala, ki ɓona vi tayna nala. Nam as yaw litir birim ɦidi.

⁶Nam kot doway-firin doogo, ma vaslna nam lakam hay gal ma jufna, ma vaslna nam lakam hay gal ma gulla; kay sumun ma muz tuwsi hiɗi niy ma hayna; kay muz slen ma ma li ɗifinna kaw. Ŋarakŋa koti kayni kay muliyan-sa-ɗifinna, kay nisi ma muz tuwsi hiɗi niy ma hayna.

⁷Nam kot sle ma tun fitilla ma ora doogo, kuɗ gatta ta coli kalamta, nam lakam kalaf hay Tempella, vasl hay gal jufu, vasl hay gal gulu may.

⁸Nam kot tablena doogo, lakam hay Tempella, vasl hay gal jufu, vasl hay gal gulu may. Nam kot ŋalayna ma ora kis.

⁹Nam kot wur-daŋŋa vi muliyan-sa-ɗifinna hiɗi wur-daŋŋa ma ŋolla, hiɗi vun-galana vi wur-daŋŋa, nam kor tuw cokorom ma talamna hiɗi wayta.

¹⁰Nam tun ŋarakŋa hay gal ma jufna, hay gal ma kayami hot ir kuɗuwu.

¹¹Huram kot sle ma cuk butuw-kuna, kot pella hiɗi ŋalayna. Ki kayn nala Huram vat lopna ma nam lumu kay mulla Salomon hay ziyna vi Lawna:

¹²Dolla ma' hiɗi yalam ma kulona, ka lakay kulo kay yam dolla ma ma'na,

¹³Sle ma kolo-kolona ma kis-fiɗina kay kaway-ciliyna ma ma'na, sle ma kolo-kolona ma' kuɗ kaway-ciliyn kep kepe, kay duk gaŋ fenetrena ma ma'na vi yam dolla ma kulo kamna.

¹⁴nam kotom cawam ma gaana; nam kot doway-firina, yorom diram ma gaana;

¹⁵ŋarakŋa kuɗ jafam valam kepe, hiɗi luway gaa kuɗum doogo yam ma';

¹⁶sle ma cuk butuw-kuna, pella, hiɗi ɗamna.[2] Slen namna kaf ma Huram-Abi kotom mi mulla Salomon kay ziyda vi Ma-Vatɗin kayni, nam koti hiɗi wayta ta wileta.

¹⁷Mulla yoromay kayni hay fulda vi Yordan, kuɗ naga ma dirginna, jar Sukkot hiɗi gal Sereda.

¹⁸Way namna Salomon yorom ŋolo ta-ta sa fi a ŋaɓam nekka valam noŋɗi.

¹⁹Salomon kot sle hena kaf lo kay ziyda vi Lawna, giwin-ma-ɗifinna ma ora, tablena ma lak fun ma vuli goyna kalamna;

²⁰slen ma tun fitilla hiɗi fitilla ma ora, ma as ŋalamu kuɗ gatta vok ir liyn ma peldetna,

²¹ɓona, fitilla hiɗi ɓalam ma ora, hiɗi or ma koti haɓ ŋolo;

²²kewna, ŋalayna, tasana hiɗi ganuna ma ora; cokorom ma ora kay vun-ziyda ta kal kalaf hay liyn ma peldet suw kafna, kay vun-ziyna ma kal kalaf hay Tempella.