Read Masana 2 LABAR-MA-LIYNA 5 Bible Online

2 LABAR-MA-LIYNA 5 - Masana bible

2 LABAR-MA-LIYNA 5

¹Ki kayn nala slen ma Salomon kotom kay ziyna vi Ma-Vatɗina lopna valam vatawa. Salomon mar sle ma bulum David vulum ɗifinna, doorota hiɗi ora hiɗi sle hegen kaf. Nam lakam jar jakŋa ma hay ziyda vi Lawna

²Salomon tok sa maariyana vi Israyel hiɗi sa ŋulona vi jafn kaf, sa ŋulona vi ziyna vi sa Israyel kaf, nam toksi talamu hay Yerusalem, kay nisi ma sli timgilla vi bonota vi Ma-Vatɗina ay goy hay ziyna vi David ma yum Siyon.

³Sum sa Israyel kaf tok tuwsi kat mulla kay li yuldeta, yuldeta vi til ma siɗiyana.

⁴Sum sa maariyana vi Israyel kaf co'o, sum sa Levitna ka ziy timgilla may.

⁵Nisi sli timgilla ay goyo, guɗuk ma fi-tuwna, sle ma peldetna kaf ma ka hay guɗukŋa: Yawamay goy kayni si muliyan-sa-ɗifinna sa Levitna.

⁶Mulla Salomon hiɗi tokŋa vi sa Israyel kaf sa nam yisi katamna lak goy vok timgilla. Nisi li ɗifini hiɗi farayna hiɗi luwayna, nam ŋol dak-dak, sa as kay wi ŋaɓta valam noŋɗi.

⁷Muliyan-sa-ɗifinna mar timgilla vi bonota vi Ma-Vatɗina hay liyna valamu, hay liyn ma peldetna vi ziyda, hay liyna ma peldet suw kafna, ta-ta gaa kuɗ gilaŋat kerubena*.

⁸kerubena gilaŋatsi goy meɗi kulo kay liyn ma tun timgilla, kerubena ka bar yam timgilla hiɗi gu-malla ma ka cuki kulo kalamna.

⁹Gu-malla namna fiyok ŋolo, san as wum vunam ma hini goyna, hay li ma nam ka goy gine hiɗi timgilla vok liyn ma peldetna, may goy jiya san as wumɗi. Timgilla ka tuni hay liy namna ta ta-ta vaydi.

¹⁰Lakay hayam kayni mi tablena ma ma'na ma Musus lakam hay Horebna tuta, kayni hay liyn ma Lawna jun bonot hiɗi sa Israyella hay kalta visi ay goy hay Egipte pa.

¹¹Hay li ma muliyan-sa-ɗifinna kali goy hay liyn ma peldetna pa, kay muliyan-sa-ɗifinna sa hay liy namna ka li tuwsi goy peldete, bay li kuɗ gatta ta tun kay tuwsi kuɗ vokŋa vokŋa,

¹²sa Levitna sa gi nulla kaf, Asaf, Herman, Yedutun, gurona visiya hiɗi ɓosiyosina, cuki hiɗi sligar haɓna, ka lakay hay gal ma kuɗuwna vi giwin-ma-ɗifinna, hiɗi kaway beɗayna, dilla hiɗi dil ŋolla, muliyan-sa-ɗifinna ka katsi kis kalam dok-ma' kay buw togolomna.

¹³Hay li ma nisi sa buw togolomna hiɗi sa gi nulla, tap tuwsi kep kay subur sem Ma-Vatɗina tiyim selemu kaw, nisi buw togolomna, kaway beɗayna hiɗi sle hena ma li nulla, nisi subur Ma-Vatɗina hiɗi dita ala: kay nam ŋaa, kay ŋaata valamu mus dok-doko, hay na'ta kayni, ziyda, ziyda vi Ma-Vatɗina hob hiɗi nukŋa.

¹⁴Muliyan-sa-ɗifinna may fi liyn kay lak hay liy namna kay li lopna loɗi, kuɗ no'osna, kay gajijita vi Ma-Vatɗina hob ziyda vi Lawn hobo.