Read Masana 2 LABAR-MA-LIYNA 6 Bible Online

2 LABAR-MA-LIYNA 6 - Masana bible

2 LABAR-MA-LIYNA 6

¹Ki kayn nala Salomon di'e: Ma-Vatɗin di ala nam as mus hay jufunda!

²May nanu, nan kot liyn ma mustawa kaŋu, liyn ma naŋ ma mus hayam dok-dokŋa.

³Mulla muɗ iramu, nam gi bol kay tokŋa vi sa Israyel kafe. Tokŋa vi sa Israyel kaf ka lakay kulo kay sesiya.

⁴Nam di'e: Suburta tam Ma-Vatɗina, Lawna vi Israyel, namu ma law hiɗi vunamu tam bunu David, ma hiɗi ɓalamu, hob vun slen ma nam dum ala:

⁵Tun caw tam buur ma nan kal sumuna vanay goy hay nagata Egipte pa, nan bay vilek hoyok-ziya jar jafna vi Israyel, kay in ziy haya a semda van ma yi haya tuwa, nan bay vilek sa'a kay nam ma tun vok sumuna vanu sa Israyella tuwa;

⁶may nan vilek Yerusalem kay semda van ma li tuni haya, nan vilek David kay nam ma tun vok sumuna vanu sa Israyella.

⁷Bunu David var hay dikamu kay in ziyda hay semda vi Ma-Vatɗina Lawna vi Israyel.

⁸May Ma-Vatɗina di tam bunu David: Kay naŋ varay hay dikaŋu kay in ziya hay semda vanu, varta na'ta kayni naŋ vara' ŋaa'a.

⁹May ziy na'ta ina' ɗawni may mi naŋɗi, ziy na'ta ina' ɗawni mi goora vaŋu ma naŋ vuɗumna.

¹⁰Ma-Vatɗina laawa kuɗ yoboy ma nam dumna. Nan fokawa kulo'o hay baŋal bunu David, nan musawa kay zlamda-mulda vi Israyel, ki Ma-Vatɗina di nala, nan in ziydawa hay semda vi Ma-Vatɗina, Lawna vi Israyel.

¹¹Nan tun timgillawa haya, timgilla ma bonota vi Ma-Vatɗina ka haya, bonota ta nam juna'ays hiɗi sa Israyella.

¹²Nam col kulo kay selemu vok giwin-ma-ɗifinna vi Ma-Vatɗina, ɗiger vok sum sa Israyella kafe. Nam meɗ ɓalam goyo.

¹³Kay Salomon kot liyn ma musta kepe, nam kotom hiɗi wayta, nam tunum goy hay wur-daŋŋa; fiyokka valamu ir goldoŋ vasl, ɓuɗukka valamu ir goldoŋ vasl, fiyokka valam ta kulota ir goldoŋ ɦidi. Nam coliya, girif gaa'a vok tokŋa vi sa Israyel kafe, nam meɗ ɓalam kulo dukalawna, nam di'e:

¹⁴Ma-Vatɗina Lawna vi Israyel, lawayn mara'a ma ŋray hiɗi naŋ mayɗi, hay wuralawnɗi, gaa kay nagatɗi kaw: Naŋ ŋom bonota hiɗi ŋaata jaraŋ hiɗi sa sunda vaŋu sa tuɗ vok iraŋu hiɗi diksi kaf.

¹⁵Ki kayn nala slen ma naŋ dum hiɗi vunaŋu kat bunu David naŋ hobom vunamawa, sle namna naŋ ka hobom vunam wulini hiɗi ɓaŋ naŋu.

¹⁶Wulin kayni, Ma-Vatɗina, Lawna vi Israyel, slen ma naŋ dum kat sa ma sunda vaŋu David naŋ ma li kuɗumu, kay naŋ di talam ala: sa ma mus baŋalaŋu hay zlamda-mulda vi Israyel dok-doko, la gurona vaŋu ŋom tuwsi hay poyta visiya, la nisi poy kuɗ gatta vanu ki naŋ poy vok iran nala.

¹⁷Wulin kayni, Ma-Vatɗina, Lawna vi Israyel, dita ta naŋ da' tam sa ma sunda vaŋu David naŋ ma hina' li goyo.

¹⁸May mige? Lawn as mus hiɗi san gaa hay nagat gasi su? Kay dukalawna hiɗi dukalawna ma suw dukalawna kaw may asaŋɗi, ziyda na'ta ta nan ina'ta zawni na' as kiɗa goy kaŋ sem gaage.

¹⁹Hiɗi kayni kaf, Ma-Vatɗina Lawna vanu, jakaŋ humaŋ tam siɗawta vi sa ma sunda vaŋu hiɗi giɗel-delta valamu, humaŋ tiyta hiɗi siɗawta vi sa ma sunda vaŋu.

²⁰Cukaŋ iraŋ kay ziyd zawni falayta hiɗi henjeta kafe, cukaŋ iraŋ kay liyn ma naŋ di ala naŋ min tun semda vaŋ haya. Humaŋ siɗawta ta sa ma sunda vaŋu ka siɗawaŋ hay liyn tani.

²¹Naŋ ma hum giɗel-delta vi sa ma sunda vaŋu hiɗi sumuna vaŋu sa Israyel kafe, hay li ma nisi ma siɗaw hay liyn tani. Naŋ ma huma, hay liyn namna ma naŋ ka musi hayna pa, hay dukalawn pa; naŋ ma huma, naŋ ma vul gida.

²²La sa li sulukawa kat sugolomna, la nisi dumawa ala nam yi va kalamu, la nam yi va kalam kayni vok giwin-ma-ɗifinna vaŋu, hay ziyda zawni,

²³hay dukalawna pa naŋ ma hum kayni, naŋ ma vara kay ka kitata kay sa sunda vaŋu, kay ka kitat kay sa ma li joota, kay tun joota valam kalamu, kay vul gida mi sa ma ɗigera, li talamu kuɗ ɗigerta valamu may.

²⁴La sa gawta mun sumuna vaŋawa, kay nisi li suluk kataŋu, la nisi hotay kataŋu tiy semda vaŋu, la nisi siɗaw taŋu, giɗelaŋ delaŋu hay ziyd zawni,

²⁵naŋ ma hum kayni hay dukalawna pa, naŋ ma vul gida kay sulukŋa vi sumuna vaŋu sa Israyella, naŋ ma hotsiyay hay nagata ta naŋ vula' misi nisiya hiɗi sumaysiya.

²⁶Hay li ma dukalawn dukawa, niyn may si loɗi kay nisi li sulukawa kataŋu, la nisi siɗaw hay liyn tani, la nisi hot tiy semda vaŋu, la nisi hin sulukŋa visiyawa goyo kay naŋ hotsi yisiyawa gaa'a,

²⁷naŋ ma hum kayni hay dukalawna pa. Naŋ ma vul gida kay sulukŋa vi sa sunda vaŋu hiɗi sumuna vaŋu Israyel. Kay naŋ ma hatsi hagata ŋaata ta nisi as poy haya, naŋ ma hin niyn co'o hay nagata vaŋu, nagata ta naŋ vula' voco'o mi sumuna vaŋu.

²⁸Hay li ma mayt ma li hay nagata, hay li ma koɓorona, saŋŋa hiɗi fiyumna ka'a, baar-bobona hiɗi baar-jerena, hay li ma sa gawta ma ŋuy sumuna vigiya hay nagata vigiya, hay vun-galana vigiya, hay li ma bakmarana hiɗi moy mara'a kaf ma co'o,

²⁹siɗawta hiɗi giɗel-delta ta san valam kep min job taŋu lebo sum sa Israyella kaf min job taŋu, la gigekaw wi bakmarana ma ka li talamnawa hiɗi tuw-tita, la nam meɗ ɓalamawa kat ziyd zawni,

³⁰naŋ ma humumi hay wuralawn pa, hay liyn ma naŋ ka musi ziy hayna, naŋ ma vul gida, naŋ ma vul mi gigekaw kuɗ lopna valamu valamu, naŋu ma wi dik gigekawna, kay naŋ kepe mi ma wi dikga vi sum-wurana.

³¹Ki kayn nala nisi ma li nar kaŋu, nisi ma poy hay hagata vaŋu, hay buur kaf ma nisi ka gaa kay nagata ta naŋ vula' mi sumayma'a.

³²Ŋray ca kaw hiɗi sa ma pulla, ma may hay jaf-sumuna vaŋ sa Israyelɗina, la nam coyawa goy hay nagat ta ginet pa, kuɗ semda vaŋu ta ŋolda, hiɗi ɓaŋ ma donona, hiɗi gilaŋataŋ ma goy meɗayna, hay li ma nam coowa tiy taŋu hay nagat kayni,

³³naŋ ma humumi hay wuralawna pa, hay liyn ma naŋ ka musi hayna, slen ma sa ma pulla siɗawam taŋŋa kaf naŋ ma vulumta, kay sum sa hay nagat kaf ma hum kay semda vaŋu, kay li nar kuɗaŋu ki sumuna vaŋu sa Israyel nala, kay nisi ma wi ala semda vaŋ ka yiya hay ziyn ma nan inimna zawni,

³⁴hay li ma sumuna vaŋ ma kal goyo kay dur sa gawt kisina, la nisi jikawa hay hagata ta naŋ tunsi irsi haya'ta; la nisi siɗawaŋu hiɗi irsi muɗi kir hoyok-ziyn ma naŋ vilekemna tani, hiɗi ziyda ta nan ina' hay semda vaŋ tani,

³⁵hay wuralawn pa naŋ ma hum siɗawta hiɗi giɗel-delta visiya, naŋ ma lisi ŋaata.

³⁶Hay li ma nisi li sulukawa kataŋu, kay sa ma li sulukɗi mayɗi, hay li ma dikaŋ ɓulakawa katsiya, la naŋ vulsiya goy hay ɓam sa gawt kisina, hay li ma sum sa yawsi gorvona kalsiyawa goy hay nagata gine'e lebo goboyo,

³⁷la goy hay nagat na'ta pa nisi hot vara, la nisi hotay taŋu, la nisi giɗelaŋ delaŋu hay nagata ta nisi ka haya'ta, la nisi di ala: Numa li sulukawa, numa raway goyo lebo numa li va ma joo'o,

³⁸la nisi hotay taŋu hiɗi diksi kaf, hiɗi ciwta visi kaf, goy hay nagata ta sumun kalsi haya' gorvot pa, la nisi siɗawaŋu hiɗi irsi muɗi kir nagata ta naŋ vula' mi sumaysita, kir hoyok-ziyna ma naŋ vilekemu, hay ziyda hay semda vaŋu,

³⁹naŋ ma humsiyay hay dukalawn pa, hay liyn ma naŋ ka musi hayna pa, naŋ ma hum siɗawta hiɗi giɗel-delta visiya, naŋ ma lisi ŋaata. Naŋ ma vul gida mi sumuna vaŋu sa li suluk kataŋu.

⁴⁰Wulin kayni, hih! Lawna vanu, malaŋ iraŋ goy malge, jak humaŋ tam siɗawta ta nan li taŋu hay liyn tani jakge.

⁴¹Wulin kayni, Ma-Vatɗina Lawna, fokaŋ kulo'o, naŋay hay liyna vaŋ ma tun-sukŋa, naŋu hiɗi timgilla vi donota vaŋu. Ma-Vatɗina, hin muliyan-sa-ɗifinna vaŋu cuki hiɗi su'da, hin sa viyna vaŋu cuki hiɗi su'da tisiya, hin sa viyna vaŋu li firiya hay ŋaata.

⁴²Ma-Vatɗina Lawna, faŋ ma mul ɦoki kalamna naŋ ma zutum goyɗi, humaŋ ma gaŋ kay lop ma hum-vunda vi sa ma sunda vaŋu David.