Read Masana 2 LABAR-MA-LIYNA 7 Bible Online

2 LABAR-MA-LIYNA 7 - Masana bible

2 LABAR-MA-LIYNA 7

¹Hay li ma Salomon vat siɗawt vatna, kut jikay kulo hay wuralawn pa, ɗifin ma ŋal-goyna hiɗi ɗifin ma ɦawana na' ŋalam goy kafe, gajijita vi Ma-Vatɗina hob ziyda.

²Muliyan-sa-ɗifinna as cuk kalaf hay ziyda vi Ma-Vatɗin noŋɗi, kay gajijita vi Ma-Vatɗin hob hay ziyda valamu.

³Sum sa Israyel kaf ka wi kut jik gaa'a, hiɗi gajijita vi Lawna ka kulo kay ziyda; nisi dab voksi gaa kay nagata hay liy ma korayna, nisi girif Ma-Vatɗina, suburum kaw, di'e: Kay nam ŋaa ŋolo, kay ŋaata valamu mus ta-ta hay vatɗita.

⁴Mulla hiɗi sumun kaf li ɗifini vok ir Ma-Vatɗina.

⁵Mulla Salomon ŋat luwayn birim dok-ma' yam ma', fukunayna birim kis kalam dok-ma', nam lum ɗifini. Ki kayn nala mulla hiɗi sumun kaf mal vun-ziyda vi Lawna.

⁶Muliyan-sa-ɗifinna lakay vun lopna visi kaf, sa Levitna kaw, hiɗi slen ma gi nulla tam Ma-Vatɗina, ma mulla David kotomu kay subur sem Ma-Vatɗina hiɗi namna, hay li ma David vulsi hagat ala hay li ma nisi subur sem Ma-Vatɗina nisi ma di ala «kay ŋaata valamu mus dok-doko». Muliyan-sa-ɗifinna ka buw togolomna goy vok irsiya, sum sa Israyel kaf ka lakay kulo'o.

⁷Jar wur-daŋŋa ma ka vok ziyda vi Ma-Vatɗina, Salomon vulum goy mi Ma-Vatɗina; kay nam li ɗifin ma ŋal-goyna hiɗi mul-sliwna vi ɗifinna vi lop ma slugona, kay giwin-ma-ɗifinna ma wayna ma Salomon kotomna may as kay ɗifin ma ŋal-goyna, vulda hiɗi mul-sliwna kafɗi.

⁸Salomon li yuldeta hay liy namna ir buur siɗiya, sum sa Israyella kaf hiɗi namu kaw, tokŋa vi sumun ŋolo co'o, fokay hay vun Hamat pa ta-ta hay lokŋa vi Egipte.

⁹Hay buurta glafandita, nisi li yuldeta ŋolda, kay nisi mal vun giwin-ma-ɗifinna ir buur siɗiya, nisi li yuldeta ir buur siɗiya kaw.

¹⁰Hay buurta dok-ma' yam ɦidita vi til ma siɗiyana, Salomon gi ir sumun hay guɗukŋa visiya visiya. Nisi li firi ŋolo, diksi muɗi firi ŋolo kay ŋaata Ma-Vatɗina la' tam David, tam Salomon hiɗi sa Israyella sumuna valamu.

¹¹Salomon vat inda vi ziyda vi Ma-Vatɗina hiɗi ziyda vi mulla. Slen ma nam var kay lum hay ziyda vi Ma-Vatɗina hiɗi ziyda vi mulla nam lum kafe.

¹²Ma-Vatɗina vul tuwam kir Salomon hay henjeta nam di talamu: Nan hum siɗawta vaŋawa, liyn tani nan vilekamawa ki ziy ma li ɗifinna nala.

¹³Hay li ma nam duk dukalawnawa, la niyn may si loɗi, hay li ma nam ma vul hagata tam baara kay ti sle ma hay nagatna, hay li ma nan ma gi bakmaran kat sumuna vanu,

¹⁴la sumuna vanu sa semda van yiy tisina hot yisi gaa'a, la nisi siɗawa gar vok iranu kaw, la nisi hotay bugolsi tam hagata visi ta joota, nanu hay wuralawn pa nan ma humsi delsiya, nan ma vul gida kay sulukŋa visiya, nan ma muɗ nagata visi goy ŋaa'a.

¹⁵Vok ɗawni iran ma li goy maliya, human ma li jakiya kat siɗawta ta nigi min la' hay liyn tani.

¹⁶Ziyd zawni nan vileka'awa kay dok-doko, nan vul ziyd zawni goy mi Ma-Vatɗina kay semda van ma li haya' dok-doko, nan ma cuk iran ka'a, tun dikan ka' dok-doko kaw.

¹⁷May naŋu, la naŋ poy vok iranu ki buŋ David nala, kay li kuɗ slen ma nan daŋ kalam kafna, la naŋ li kuɗ gatta hiɗi dita-colita vanu,

¹⁸nan ma tun zlamda-mulda vaŋu, kuɗ va ma nan colom jaranu hiɗi buŋu David ala: Sa ma vurna hay baŋalaŋ dok-doko kay ti mulda kay sa Israyella.

¹⁹May la nigi cal goyo, la gatta hiɗi dita ta nan cola' vokgita nigi noya' goyo, la nigi tuɗ sun lawayn mara'a, la nigi girif gaa vokomu,

²⁰nan ma yawgi goy hay nagata ta nan vulgitta pa, ziyda ta nan muɗa' ir vanta zawni nan ma noya' goyo, sumun kaf ma muɗ gi junda, di law ma burahta kaw hiɗi sem ziy na'ta.

²¹Kuɗ ŋolda vi ziy na'ta, gigekaw hay li ma nam jikawa goboy ta'a, ma muɗ ɦuyum', ma di ala: Nagata kayni hiɗi ziyda zawni Ma-Vatɗina lum nala kay mige?

²²Nisi ma hot dit ala: Kay nisi noy Ma-Vatɗin goyo, Lawna vi sumaysiya, nam ma kalsiyay goy hay nagat Egipte pa, kay nisi jun tuwsi tam lawayn mara'a, nisi girif gaa vok lawayn namna, sunumu kaw; kuɗ na'ta kayni nam hin joota co'o kisiya.