Read Masana 2 LABAR-MA-LIYNA 8 Bible Online

2 LABAR-MA-LIYNA 8 - Masana bible

2 LABAR-MA-LIYNA 8

¹Hay vatta vi busata dok-ma'ta, Salomon vat inda vi ziyda vi Ma-Vatɗina hiɗi ziyda valamu.

²Hoyok-ziyna ma Huram vulumtina nam inim kulo'o, lak sa Israyella hayamu.

³Salomon kali dur Hamat vi Soba, nam sli nagat na'ta.

⁴Nam in Tadmor hay fulda, hiɗi hoyok-ziyna ma feera haya kaf ma nam inim hay Hamat.

⁵Nam in Bet-Horon ta kulota hiɗi Bet-Horon ta gaata, Hoyok-ziy ma donona, gulmun talamu, vun-galana valamu duki hiɗi kawayna kaw;

⁶Baalat hiɗi hoyok-ziyna ma feera ka haya ma vi Salomon, hoyok-ziyn ma keke-ma-duura ka haya, ma kulumayn ka haya, ziyna ma Salomon inim kuɗ minda valamna kaf, hay Yerusalem, hay Libaŋ, hay naga ma nam ka ti mul kalamna kafe.

⁷Sum sa hin kuɗ sa Hititna, sa Amoriyana, sa Feresiyena, sa Heviyena hiɗi sa Yebusna kaf nisi may ŋaɓay jar sa Israyelɗi.

⁸Gurona visiya sa hin bugolsiya hay nagata, sa sum sa Israyella may vatsi goyɗina, Salomon tunsi lopn ma nekŋ kisiya, nisi ka li lopna ta-ta vaydi.

⁹Sum sa Israyella Salomon min tunsi lop kisiɗi, kay nisiya si sum sa li duura, sa ŋulona vi sa ziy marayna, sa ŋulona vi sa jaŋ keke-ma-duura, hiɗi sa ɓe kulumayna.

¹⁰Sum sa ŋulona sa Salomon tunsina nisi kis-ma' hiɗi diram dok-vasl, nisi kayni si sa tuni kay li lop vok sumuna.

¹¹Goota vi Farawn Salomon va'ay goy hay ziyna vi David pa, hay ziyna ma nam ina'tina, kay nam di'e: Cata vanu as mus hay ziyna vi mulla vi Israyelɗi, kay mige liyn ma timgilla vi bonota vi Ma-Vatɗina ka kali hayna nam peldete.

¹²Ki kayn nala Salomon ka li ɗifini tam Ma-Vatɗina kulo kay giwin-ma-ɗifinna vi Ma-Vatɗina ma nam inim goy vok diɓira.

¹³Ɗifin ma Ma-Vatɗina vul hagata tam Musus kay lum hay buurta kaf, hay buur sabatna, kay til ma wulina, kay yuldeta ta sem hiɗi hay busata, kay yuldeta vi fun-bay-kufna, kay yuldeta vi lumuna hiɗi yuldeta vi guɗukŋa kaf nam ka lumu.

¹⁴Ki bulum David vulum hagat nala, nam tun muliyan-sa-ɗifinna kuɗ vokŋa visiya visiya kay li lopna, sa Levitna kaw kuɗ lop ma tuni kisina, kay nisi ma subur sem Ma-Vatɗina, kay li lopna vok ir muliyan-sa-ɗifinna, kuɗ lop ma hay buurta kafna, ki sa ŋom vun-galana ɓuraway kuɗ vun-galana mara'a mara'a kuɗ vokŋa visiya visiya; kay David sana vi Lawna vul hagatis ki kayn nala.

¹⁵Slen ma mulla dumis kay muliyan-sa-ɗifinna hiɗi sa Levitna nisi min rawam goyɗi, slen ma nam dumis kay faray ma hay timgilla nam nala kaw.

¹⁶Ki kayn nala lopna vi Salomon nam tuni kafe, tun caw hay buur ma sem ziyda vi Ma-Vatɗina tun gaan pa, ta-ta tam vatta va'a. Ziyda vi Ma-Vatɗina lopna va' vat ŋaa ŋolo.

¹⁷Bugol kayni Salomon kali hay Etsiyon-Geber hiɗi Eylot, kel niy lumna, hay nagata vi Edom.

¹⁸Huram cuk sumun talamu hiɗi lumayna hiɗi sa sunda sa wi niy-lumna ŋaa kaw. Nisi co hiɗi sa sunda vi Salomon hay Ofir. Nisi yaw talente* ma ora kis-fiɗi hiɗi diram dok-vasl, nisi maram tam mulla Salomon.