Read Masana 2 LABAR-MA-LIYNA 9 Bible Online

2 LABAR-MA-LIYNA 9 - Masana bible

2 LABAR-MA-LIYNA 9

¹Cata-mulda vi Seba hum labara kay sem ma tiyna vi Salomon, nala na' co hay Yerusalem kay wakamu hiɗi vanbona.[3] Na' ka hiɗi sumun kuɗa' ŋolo, lamgan ma ziy urdina ma hisna, ora ŋolo hiɗi hiɗiy ma ŋaana kaw. Na' co kat Salomon, dum sle ma hay dika'na kaf.

²Sle ma na' jobom tam Salomon nam da'ti cawam goy kafe. Va mara ma hin ŋayay kir Salomon ma nam as dum cawam goyɗi mayɗi.

³Cat-mulda vi Seba wi yalda vi Salomon, ziyna ma nam inimna,

⁴ir tin ma nam ka tumna, ziyna vi sa sunda valamu, lopna hiɗi sligara vi sa sunumna, sa kotom tina hiɗi sligar ma nisi cukumna, liyn ma jik kulo kalamu kay kal hay ziyna vi Ma-Vatɗina: Nala suka' yaw kela'a, na' di tam mulla:

⁵Labar ma nan humumi hay nagata vanu kay yoboyna hiɗi yalda vaŋu nam gasiya.

⁶Jew a nan co tani kay wi slen hiɗi iran kayni, labar ma co tan jewna nan may vumɗi. May wulini kayni galla vi yalda vaŋ kaw sa may dan kalam tuwa noŋɗi. Naŋ suw seŋ ma tiyna ma nan humum jewna.

⁷Sle'ta ka kay sumuna vaŋu, sle'ta ka kay sa sunda vaŋu, sa ka lakay dok-dok vok iraŋu sa ka hum yalda vaŋu.

⁸Sle'ta ka kay Ma-Vatɗina Lawna vaŋu, namu ma laŋ slugota, namu ma musaŋ kay zlamda-mulda vi Ma-Vatɗina Lawna vaŋu ki mulla nala. Kay Lawna vaŋu min sa Israyella, kay nam min hinsi mus iri dok-doko, kuɗ na'ta kayni nam tunaŋ mul kisiya kay naŋ ma li ɗigerta hiɗi gasita.

⁹Na' vul talente* ma ora kis kalam dok-ma' mi mulla, urdi ma hisna ŋolo, hiɗi hiɗiy ma ŋaana kaw. Urdi ma cata-mulda vi Seba vulum mi Salomonna sa bay wi mara ki kayn nala tuwa.

¹⁰Sa sunda vi Huram hiɗi sa sunda vi Salomon sa mar or ay goy hay Ofir pana, nisi mar gu-santalla* hiɗi hiɗiy ma ŋaana kaw.

¹¹Hiɗi gu-santalla* mulla kot hagata ta kal kalaf hay ziyna vi Ma-Vatɗina hiɗi ziyna vi mulla, hiɗi dilla, dil ŋulona kaw kay sa gi nulla. Sa may wi va mara ki kayn nala jewe hay nagata vi Yuda noŋɗi.

¹²Slen ma cata-mulda vi Saba minimna hiɗi ma na' jobomna kaf nam vula'ta, nam suw sle ma na' maram mi mulla. Bugolda na' hotiya kay kal hay nagata va'a, na'a hiɗi sa sunda va'a.

¹³Talente* ma ora ma co kat Salomon hay busat kafna nam kis-karkiya hiɗi diram dok-karkiya yam karkiya,

¹⁴sle ma taram vunamna, ma sa li filiwn maramna, hiɗi muliyana vi Arabi hiɗi sa guvernera vi nagata, sa mar ora hiɗi doorota mi Salomon,

¹⁵mulla Salomon kot maray ma ŋulona kis-ma' hiɗi or ma yorayna, maray kep kotay hiɗi or yorayna ir sikel* kis-karkiya kis-karkiya.

¹⁶Maray ma gurayna kis-ɦidi hiɗi or ma yorayna, maray kep kotay hiɗi or ma yorayna ir sikel kis-ɦidi kis-ɦidi; mulla lakam hay ziyda vi fulda vi Libaŋ.

¹⁷Mulla kot zlamda-mulda ta ŋolda hiɗi siy-slokŋa, nam kora' tuwa' hiɗi or ma bay-rigasna.

¹⁸Zlamda-mulda na'ta ka tuni kulo kay liy ma jikŋa ma karkiyana, ma tun sem kamna koti hiɗi ora, glaŋatam ka'a, hay galla vi san ma musin kafe, zlon ka lakay kulo ma' hay galla vi glaŋatna,

¹⁹zlon ka lakay doogo yam ma' hay liyn ma jik kulona ma karkiyana hay gal hena, hay gal hena kaw. Va ma ki kayn nala bay li hay mul tara'a tuwa.

²⁰Slen ma mulla Salomon ci dolayn hayamna kaf kotay hiɗi ora, kaway ma ti hayna ma hay ziyna vi fulda vi Libaŋ kaf kotay hiɗi ora ma bay-rigasna. Ma kotay hiɗi doorota may noŋɗi: Hay liyna vi mulla Salomon, sa may yor tuwam kay va noŋɗi.

²¹Kay mulla ka hiɗi lumayna ma ka tuɗ hay Tarsis hiɗi sa sunda vi Huram, hay busat kaf lumayna ka coy hay Tarsis pa, ka mar ora hiɗi doorota, siy-slokŋa, viira hiɗi layn-slek-lawna.[4]

²²Mulla Salomon muɗi ŋolo suw muliyan sa gaa kay nagat kaf hiɗi farayna, hiɗi yalda kaw.

²³Muliyan sa hay nagat kaf gar kay ŋaf hiɗi Salomon, kay hum yalda ta Lawn tuna' hay dikamta.

²⁴San gige gige jarsiya mar vulda valamu, slen ma koti hiɗi doorota, slen ma koti hiɗi ora kaw, sligara, sle ma duura, urdi ma hisna, kulumayna, kulumay-kurona, nisi ka li ki kayn hay busat kafe.

²⁵Salomon ka hiɗi guli ma lak kulumayna hiɗi kekena ir birim fiɗi, sa jaŋ kulumayn birim doogo yam ma' sa nam tunsi hay hoyok-ziy ma sojen ka hayna, hiɗi Yerusalem goboy talam nam nulla.

²⁶Nam koli kay muliyan kaf, tun caway hay niy-lumna pa ta-ta hay nagata vi sa Filistina, ta-ta hay jaara vi Egipte goŋ'.

²⁷Mulla muɗ gurjut hay Yerusalem ŋol dak-dak ki hiɗiyn nala, nam muɗ gu-gamna ŋol dak-dak ki gu-sikomora ma ka day hay fulda nala.

²⁸Kulumayna vi mulla Salomon nisi maramti ay kayni hay Egipte pa, hiɗi naga hena hena kaw.

²⁹Caw lopna vi Salomon ma hinina, ma jewna hiɗi ma cawna, kayni ka ɗoy hay ɗerwelda vi sa ma jobta Natan, hay ɗerwelda jobta vi Ahiya ma Silona, hay ɗerwelda vi sa ma wi vokomna Yeedo, kay Yerobowam goora vi Nebat.

³⁰Salomon ti mulda busat dok-fiɗi hay Yerusalem kay sa Israyel kafe.

³¹Bugol kayni Salomon miti kuɗ sumiyamu. Nisi pum hay hoyok-ziyna vi David bulumu. Goora valamu Robowam ti mulda hay baŋalamu.