Read Masana ESDRAS 1 Bible Online

ESDRAS 1 - Masana bible

ESDRAS 1

¹Hay busata jewta vi Sirus mulla vi Persiya, kay hob vun yoboyna vi Ma-Vatɗina ma nam dum hay vun Yeremiyasna, Ma-Vatɗina zliy ŋusta vi Sirus mulla vi Persiya kulo'o, nam hin siwelda hiɗi ɗot tam sum sa hay mulda valam kafna ala:

²Kayni ti dita vi Sirus, mulla vi Persiya, Ma-Vatɗina Lawn ma dukalawna vulan mulda ta gaa kay nagatawa kafe, nam vulan lopna kay nan ma inim ziyna hay Yerusalem ta ka hay Yuda.

³Jargi tani sa ma ir vi sumuna valamu mi gige? la ka'a Ma-Vatɗina valamu li hiɗi namu, hinim tuɗ hay Yerusalem[1] ta ka hay Yuda, kay in ziyda vi Ma-Vatɗina, Lawna vi Israyel. Mi Lawna ma ka hay Yerusalem.

⁴Hay liyn kaf ma caw sumun ma hinina ka lakay hayna, sum sa hay liyna ma vulsi doorota, ora, slena hiɗi farayna, hiɗi vulda kuɗ minda kaw kay ziyda vi Lawna ta ka hay Yerusalem.

⁵Ki kayn nala, sa ŋulona vi jafna vi Yuda hiɗi Benyamin, muliyan-sa-ɗifinna hiɗi sa Levitna, nisi kaf sa Lawn zliy ŋusta visi kulona yaway kulo'o, kay kal hay nagata, kay in ziyda vi Ma-Vatɗina ta ka hay Yerusalem.

⁶Sum sa ŋuyi tisina kaf marsi gutda hiɗi slen ma ki doorota hiɗi or nala, gurjuta hiɗi farayna, hiɗi vulda minda, vulda-ɦawata hen kaf may ŋaɓayɗi.

⁷Jakŋa ma mulla Nebukadnesar yawamay goy hay ziyda vi Ma-Vatɗina hay Yerusalem pa, hot lakam hay ziyda vi lawayna vamuna, mulla Sirus vulum goyo.

⁸Sirus, mulla vi Persiya gi Midredat ma ŋom slena kay nam yawamay goyo, nam vulum hay ɓam Sesbatsar ma yerimana vi Yuda.

⁹Kayni mi ŋaɓta valamu: Tasa ŋulona ma ora dok-ɦidi, tasa ma ŋulona ma doorona birim kep, kewn dok-ma' yam zleeŋe,

¹⁰kaway-ma-cina ma ora doogo, kaway-ma-cina ma doorona kis-fiɗi hiɗi diram doogo, sle hena birim ɗaw.

¹¹Jakŋa ma ora hiɗi ma wayna tapay pet birim vasl ɦidi kis-fiɗi. Sesbatsar kalam hay nagata valam kaf, ŋray ca kaw hiɗi sa gorvona sa yawsiyays hay Babilon pa, kalsi hay Yerusalem kaw.