Read Masana ESDRAS 4 Bible Online

ESDRAS 4 - Masana bible

ESDRAS 4

¹Sa gaw kay Yuda hiɗi Benyamin hum ala sa maariyana sa ay goy gorvona ka in Tempella mi Ma-Vatɗina, Lawna vi Israyel.

²Nisi co kat Zorobabel hiɗi sa ŋulona vi jafna, nisi di tisiya: Numa min in hiɗi nigiya; kay numa kaw ka yi sem Lawna vigiya, numa ka lum ɗifini tun caw hay liyna vi Esar-Haddon mulla vi Asiriya ma yawma'ay goy tanna pa.

³May Zorobabel, Yosuwa, hiɗi sa ŋulona vi jafna vi Israyel hot dit tisiya: May ŋaa'a kay nigiya hiɗi numa'a inay ziy mi Lawna vuma'a kuɗ tuwayɗi, numa in ziyn kay tuwma'a mi Ma-Vatɗina Lawna vi Israyel, ki mulla Sirus, mulla ma Persiyana vulma hagat nala.

⁴Ki kayn nala sum sa hay nagatna ɓulak dik sumuna vi Yuda; nisi zliŋsi goyo, telsi kay in ziyna,

⁵sum sa vul gatta nisi wuraksi gurju'u, tapsi kuɗsiya kay tel lopna. Lawta kayni li nala hay buur ma irita vi Sirus mulla vi Persiya kafe, ta-ta tam mulda vi Dariyus mulla vi Persiya.

⁶Hay mulda vi Asuwerus, hay tun cawta vi mulda valamu, nisi ɗo ɗerwelda kay pi lawta kay sum sa hay Yuda hiɗi Yerusalem.

⁷Hay liyna vi Artakserses kayni: Bisilam, Mitredat, Tabeel hiɗi nuroysina sa hinina, ɗo ɗerwelda tam Artakserses, mulla vi Persiya. Ɗerwel na'ta ɗoy kuɗ ɗota vi Arameena, muɗi goy hay vun Arameena.

⁸Rehum guvernera, Simsay ma ɗo slena, nisi ɗo ɗerwelda kep tam mulla Artakserses kay Yerusalem, nisi ɗo ala:

⁹Rehum, guvernera, Simsay, ma ɗo slena, hiɗi nuriyaysi sa hinina, nisi sa hay Din, sa hay Arfarsatak, sa hay Tarpel, sa hay Afaras, sa hay Erek, sa hay Babilon, sa hay Susa, sa hay Deha, sa hay Elam.

¹⁰Hiɗi sum segena sa Osnapar ma ŋolla ma selem tiyna yawsiyay gorvo'o, laksi hay hoyok-ziyna vi Samariya hiɗi liy hena goy bugol vi niy-lumna namna.

¹¹Kayni mi sle ma ɗoy hay ɗerwelda ta nisi ga' tam mulla Artakserses: Sa sunda vaŋu, sum sa goy gal hena vi niy-lumna.

¹²Mulla, naŋ ma wi ala Yudiyana sa may goy vaŋ pa sa co jarma tanna ka in hoyok-ziy ma ŋel-gatta ma murlina, nisi ka kot gulmunna, ka tun sem ziyn gaa'a kaw.

¹³Mulla, naŋ ma wi goy ala: La hoyok-ziyn kayn inawa kulo'o, la gulmunna valam kotiya, nisi ma wurak slen ma kaam kisin loɗi, vul taara loɗi, wurak jik ma hay hagatnaɗi kaw, nala van kayni ma li joo'o taŋ naŋ mulla.

¹⁴May wulini ki numa ka ti mandana vi mulda nala,[3] may kirma ŋaa'a kay san as burah mullaɗi, labar namna numa gumis taŋ naŋ mulla.

¹⁵kay nisi ma gar hay ɗerwella vi gi-humda vi sumiyaŋu, naŋ ma fi'e, naŋ ma wi hay ɗerwella vi gi-humda kaw ala hoyok-ziyn kayni mi hoyok-ziy ma ŋel-gatta, mi hoyok-ziy ma li joo'o tam muliyana hiɗi naga ŋulona, sum sa hayamna si sum sa ŋel gatta hay liyn ma ɓa-ɓan pa. Kuɗ na'ta kayni hoyok-ziyn namna ka toy gaa'a.

¹⁶Numa min di taŋ naŋ mulla ala: La hoyok-ziy namna ini kulo mara lo, la gulmun ma talamna kotawa kulo'o, naŋ ma fi liyn goy bugol niy-lumna tani loɗi.

¹⁷Mulla gisi hot ditay ala: Tam Rehum guverner, tam Simsay ma ɗo slena, tam nuroygina sa hinina, sa ka lakay hay Samariya hiɗi liyn hena goy bugol niy-lumna, gigi deɓe, mr.

¹⁸Ɗerwelda ta nigi ga'ayta nisi jaŋa' goy vokan hay liya'a.

¹⁹Nan vul hagata kay sumun ma feka; numa fi kayn ala hay liyn ma jew ɓa-ɓan pa, hoyok-ziy namna fok kulo'o kat muliyana, sum sa hayna yaw kulo'o, nisi li ŋel-vunda kaw.

²⁰Muliyan sa dono ŋolo ay hay Yerusalem, sa ka ti mul kay nagat kafe goy hay gal hena vi niy-lumna, sumun ka tarsi slena, vulsi taara, wuraksi kay haga ma jikŋa kaw.

²¹Kuɗ kayni, vulgi hagata kay tel lopna vi sumun kayni, kay hoyok-ziyn kayni ma li iniya jew a nan vulsi hagata.

²²Nigi ma li ŋali kay ti muray kay lawt kaynɗi, kay a joot ma jor voko kay ɓulak muliyanɗi.

²³Wulini wulini hay li ma ɗerwelda vi Artakserses jaŋis goy vok Rehum, Simsay ma ɗo slena hiɗi nuriyosina, nisi kalay koloyo hay Yerusalem kat sa Yudiyana, nisi tel lopna visiya hiɗi ɦawlata hiɗi donota.

²⁴Ki kayn nala lopna vi ziyda vi Lawna ma hay Yerusalemna teliya, nisi telemu ta-ta hay busata ma'ta vi Dariyus mulla vi Persiya.