Read Masana ESDRAS 5 Bible Online

ESDRAS 5 - Masana bible

ESDRAS 5

¹Sa ma jobta Haggeya, hiɗi sa ma jobta Zakariya goora vi Iddo, di vun jobta kat Yudiyana sa ka hay Yuda hiɗi Yerusalem, hay semda vi Lawna vi Israyel.

²Ki kayn nala Zorobabel, goora vi Seyaltiyel, hiɗi Yosuwa goora vi Yotsadak, nisi yaway kulo'o, tun caw in ziyda vi Lawna hay Yerusalem. Sa jobta vi Lawna ka hiɗi nisiya kay gutsiya.

³Hay liyn namna kayni, Tatnay guverner ma hay nagata ta ka goy gal hena vi niy-lumna, Cetar-Boznay hiɗi nuroysina, co katsiya, ka di tisi ala: Sa ma vulgi hagat kay in ziyd kayni, kay kot gulmunna kaw kayn mi gige?

⁴Numa di tisi ala: Sum sa in ziyd kayni semda visi anige?

⁵May ir Lawna visiya ka kay sa maariyana vi sa Yudiyana. Hay li ma nisi gi ɗerwelda tam Dariyus kay vulum labara, ta-ta nam fi ɗerwelda kay law na'ta kayni, nisi may telsi kay lopnɗi.

⁶Kayni mi sle ma ɗoy hay ɗerwelda ta Tatnay guverner ma goy bugol niy-lumna, Cetar-Boznay hiɗi nuroysina sa hay Afarsak goy bugol hena vi niy-lumna ɗo' tam mulla Dariyus:

⁷Kayni mi labar ma nisi ɗomtina: tam mulla Dariyus, sle'ta kaŋu.

⁸Mulla, naŋ ma wi ala numa kal hay nagata vi Yuda, ta-ta hay ziyda vi Lawn ma ŋolla. Nisi ka kota'a hiɗi hiɗiy ma fiyokŋa, nisi ka cuk guna kulo kay ziyda; lopna ka tuɗ ŋaa'a ŋolo hay ɓisiya.

⁹Numa job tam sum sa maariyana, numa di tisi ala: Sa ma vulgi hagat kay in ziyd zawni, kay kot gulmunna va' kulo kaw kayn mi gige?

¹⁰Numa jobsi sesi kaw kay ɗekem kiraŋu, kay numa min ɗo sem sum sa ŋulona sa tuni voksina.

¹¹Kayni ti hot-dita ta nisi vul tuma'a, Numa kayni si sa sunda vi Lawna ma li wuralawna hiɗi nagata, numa ina' kayni ti ziyda ta ay ini jewe ir busat wulin ŋolo, mul ma ŋolla vi Israyel mara kep ina'a, nam vat inda va' kaw.

¹²May bugolda hay li ma sumayma'a ɓulak dik Lawn ma wuralawn ɓulakŋa, nam vulsi goy hay ɓam Nebukadnesar mulla vi Babilon ma Kaldeena, nam ɦo ziyd kayn gaa'a, nam kal sumun goy gorvo hay Babilon.

¹³May hay busata jewta vi Sirus mulla vi Babilon kayni, mulla Sirus vul hagata kay hot in ziyda vi Lawn na'ta.

¹⁴Lo slena vi ziyda-Lawna ma ora hiɗi ma doorona ma Nebukadnesar yawamay goy hay Tempella vi Yerusalem pa lakam hay Tempella vi Babilon kaw, mulla Sirus yawamay goyo, vulum hay ɓam Sesbatsar ma nam tunum guvernera,

¹⁵nam di talam ala: Yawaŋ slen namna, tuɗaŋ lakam hay Tempella vi Yerusalem, ziyda vi Lawna ma hot inis kulo hay baŋala'a kaw.

¹⁶Sesbatsar namna co tani, nam vi bag-ziyda vi Lawn gaa'a hay Yerusalem, hay na'ta pa ta-ta vaydi na' ka ina, may na' bay vat tuwa.

¹⁷Wulin kayni la mulla mina, nigi ma fek hay ɗerwella vi mulla vi Babilon, kay ɗuwa la mulla Sirus vul hagata kay in ziyda vi Lawna hay Yerusalem. Bugolda naŋ ma duma varta vaŋiya kay lawta kayni.