Read Masana ESDRAS 7 Bible Online

ESDRAS 7 - Masana bible

ESDRAS 7

¹Bugol slen kayni, hay mulda vi Artakserses, mulla vi Persiya, sa kep duɓay goyo yum Esdras goora vi Seraya, goora vi Azariya, goora vi Hilkiya

²goora vi Sallum, goora vi Sadok, goora vi Ahitub,

³goora vi Amariya, goora vi Azariya, goora Merayot,

⁴goora vi Zerahya, goora vi Uzzi, goora vi Bukki,

⁵goora vi Abisuwa, goora vi Fineyas, goora vi Eliyazar, goora vi Aaron, mul ŋol ma-ɗifinna.

⁶Esdras namna fokay hay Babilon pa, namu mi sa ma wi ɗota, tuwam vuli hay gatta vi Musus ta Ma-Vatɗina Lawna vi Israyel vula'ta. Kay ɓam Ma-Vatɗina Lawna valamu ay hiɗi namu, mulla vulum sle ma nam jobomtina kaf.

⁷Sum sa Israyel segena, muliyan-sa-ɗifinna hiɗi sa Levitna, sa gi nulla, sa ŋom vun-galana hiɗi sa Netiniyena kalay kulo hay Yerusalem kaw, kayni hay busata siɗiyata vi mulla Artakserses.

⁸Esdras co hay Yerusalem hay til ma vaslna vi busata siɗiyata vi mulla;

⁹nam col fok-goyta valam hay Babilon hay buurta jewta vi til ma jewna, nam co hay Yerusalem hay buurta jewta vi til ma vaslna, ɓamta ŋaata vi Ma-Vatɗina ay kalam ŋaa'a ŋolo.

¹⁰Kay Esdras tun dikam goyo kay hat gatta vi Ma-Vatɗina, kay li kuɗa'a kaw, kay hat hagata ɗigerta hiɗi gasita tam sa Israyella kaw.

¹¹Kayni mi slen ma ɗoy hay ɗerwelda ta mulla Artakserses vula' mi mul-ma-ɗifinna ma wi ɗota Esdras, ma ka di yoboyn ma Ma-Vatɗin dum talamna goy tam sa Israyella:

¹²Artakserses, mulla vi muliyana, tam mul-ma-ɗifinna Esdras ma wi ɗota, ma tuwam vuli goyo hay gatta vi Lawna ma dukalawna, mr.

¹³Nan vul hagatawa kay sum sa Israyella kaf ma tuɗ hiɗi naŋu, muliyan-sa-ɗifinna hiɗi sa Levitna sa ka hay nagata van kaf, sa tuwsi kotiya kay kal hay Yerusalem.

¹⁴Nan mulla hiɗi sa vul-gatta vanu sa siɗiyana numa gaŋawa kay ɗuw Yuda hiɗi Yerusalem, kuɗ gatta vi Lawna vaŋu, gatta na'ta ta ka hay ɓaŋu,

¹⁵lo, kay ziy doorota hiɗi or ma mulla hiɗi sa vul gatta valamu vulumu kuɗ minda visiya tam Lawna vi Israyel, ma liyn ma musta valamu ka hay Yerusalem,

¹⁶doorota hiɗi or kaf ma naŋ ma fum hay nagata vi Babilon kaf, hiɗi vulda kuɗ minda ma sumuna hiɗi muliyan-sa-ɗifinna lumu kay ziyna vi Lawna visiya hay Yerusalem.

¹⁷Bugol kayni, naŋ ma kot tuw gurju na'ta kay gus luway-jufayna hiɗi na'a, fok-gamalana, guro fok-dimina, hiɗi vulda visiya hiɗi mul ma yamam goyna, naŋ ma lum ɗifin kulo kay giwin-ma-ɗifinna vi Lawna vigiya hay Yerusalem.

¹⁸Va ma ɗuw kirgi ŋaa'a kay li'e, naŋu hiɗi ɓosiyoŋŋa, caw doorota hiɗi ora kaw, nigi ma lum kuɗ minda vi Lawna vigiya.

¹⁹Slen ma vuli hay ɓaŋu kay li lop hay ziyna vi Lawna vaŋŋa, naŋ ma lakam vok Lawna vi Yerusalem.

²⁰Naŋ ma yaw gurjuta hay timgilla vanu kay ba' goyo kay lop hena kaf ma naŋ min li'e kay ziyna vi Lawna vaŋu.

²¹Nanu, mulla Artakserses, nan vul dita tam sa ŋom gurjuta kaf sa goy gal hena vi niy-lumna kay nisi ma vul gurjut goy hay liya' ɗiger tam Esdras mul-ma-ɗifinna, sa ma wi ɗota ma tuwam vuli goy hay gatta vi Lawn ma dukalawna, slen kaf ma nam job tigiya,

²²ta-ta ir talente* doorota kis, alkamarena ir koro kis, vinna goŋgoŋ kis, mula ir goŋgoŋ kis kaw, mandana kuɗ minda kaw.

²³Slen ma Lawn ma dukalawna vulgi hagat kay nigi lumna nigi ma lum hay liyam ɗiger kay ziyna vi Lawna ma dukalawna, kay ɦiyda valamu ma tun kay nagata van nan mulla hiɗi gurona vanɗi.

²⁴Kuɗ na'ta numa min di tigi ala numa as tar sle hay ɓigiɗi, yaw taarɗi, yaw wurakŋa kay hagata ta jik haytaɗi, hay ɓam muliyan-sa-ɗifinɗi, hay ɓam sa Levitnɗi, sa gi nullaɗi, sa ŋom vun-galanɗi, hay ɓam sa Netiniyenɗi, hay ɓam sa sunda sa li lop hay ziy na'taɗi kaw.

²⁵Naŋu Esdras, kuɗ yalla vi Lawna ma ka hay dikaŋu, naŋ ma tun sa ka kitana hiɗi sa ɗiger-lawta kay nisi ma ka kitata kay sum sa goy gal hena vi niy-lumna kaf, mi nisi sa wi gatta vi Lawna vaŋ kafe; naŋ ma ɗeka' mi nisi sa wa'ɗina.

²⁶La san gigekaw may hum kuɗ gatta vi Lawna vaŋu hay liyam ɗigerɗi, hum kuɗ gatta vi mullaɗi, san kayni kitata valam ti cita-goyta, lebo digiɗim goy hay nagata, tun wurak kalamu lebo gum daŋgaya.

²⁷Suburta tam Ma-Vatɗina, Lawna vi sumiyaya, nam ma tun dik mulla kay nam ma vul gajijita ki kayn nala mi ziyda vi Ma-Vatɗina hay Yerusalem,

²⁸namu ma li ŋaata valam tanu vok ir mulla, sa vul gatta valamu hiɗi sa ministrena valamu sa donona! Nan muɗi dono'o kay ɓam Ma-Vatɗina Lawna vanu, kay ɓalam ka tuni kanu, nan tok sa ŋulona vi Israyel, kay nisi ma tuɗis hiɗi nanu.