Read Masana ESDRAS 8 Bible Online

ESDRAS 8 - Masana bible

ESDRAS 8

¹Kayni si sa ŋulona vi jafna sa ŋaɓay goyo, sa fokay hiɗi nanu hay Babilon pa, hay liyna vi mulda vi Artakserses.

²Kuɗ jafna vi Fineyas mi Gersom; kuɗ jafna vi Itamar mi Daniel; kuɗ jafna vi David mi Hattuk;

³kuɗ jafna vi Sekaniya, kuɗ jafna vi Parewos mi Zakariya, hiɗi sum sa ŋaɓayn kuɗum kis kalam dok-vasl.

⁴Kuɗ jafna vi Pahat-Mowab mi Elyohenay, goora vi Zerahya, hiɗi sumun kuɗum kis-ma'.

⁵Kuɗ jafna vi Sekaniya, mi goora vi Mahaziyel, sumun kuɗum kis-ɦidi;

⁶kuɗ jafna vi Adin mi Ebed, goora vi Yonatan, sumun kuɗum dok-vasl.

⁷Kuɗ jafna vi Elam mi Esaya, goora vi Ataliya, hiɗi sumun kuɗum dok-siɗiya;

⁸kuɗ jafna vi Sefatiya mi Zebadiya goora vi Mikayel, sumun kuɗum dok-glafandi;

⁹kuɗ jafna vi Yowab mi Abdiyas goora vi Yehiyel, hiɗi sumun kuɗum kis-ma' kalam doogo yam glafandi;

¹⁰kuɗ gurona vi Selomit mi goora vi Yosifiya, hiɗi sumun kuɗum kis kalam dok-karkiya;

¹¹kuɗ jafna vi Bebay mi Zakariya goora vi Bebay, hiɗi sumun kuɗum dok-ma' yam glafandi;

¹²kuɗ jafna vi Azgad mi Yohanan, goora vi Hakkatan, hiɗi sumun kuɗum kis kalam doogo;

¹³kuɗ jafna vi Adonikam, sa cawna sa semda visi ka tani: Elifelet, Yeyel hiɗi Semayeya, hiɗi sumun kuɗsi dok-karkiya;

¹⁴kuɗ jafna vi Bigvay si Utay hiɗi Zabbud, sumun kuɗsi dok-siɗiya.

¹⁵Nan toksiya goboy kat niy-lumna ma ka riŋ goyo hay Ahava, numa molay ɗawni ir buur ɦidi. Nan jak human tam sumuna hiɗi muliyan-sa-ɗifinna, nan may fi goor vi Levi kep kaw jarsiɗi.

¹⁶Nala nan gi sunda kay yi sa ŋulona Eliyezer, Ariyel, Semayeya, Elnatan, Natan, Zakariya hiɗi Mesullam, hiɗi sum sa ɗek-gatta Yoyarib hiɗi El-Natan.

¹⁷Nan vulsi dita kay sa ma ŋolla Iddo, ma ka musi hay Kasifiya, nan disi slen ma nisi ma dum mi Iddo hiɗi ɓosiyomna sa Netiniyena sa ay hay Kasifiya, kay nisi mar sum sa gutma'a kay kot ziyda vi Lawna vuma'a.

¹⁸Ki ɓamta ŋaata vi Lawna ay tuni kuma nala, nisi marma Serebiya, sa ma varta valam ŋaa'a, kuɗ jafna vi Makli, goora vi Levi, goora vi Israyel, hiɗi namu, gurona valamu hiɗi ɓosiyomna, nisi noŋ pet doogo yam glafandi;

¹⁹Hasabiya, hiɗi namu Esaya, jar gurona vi Merari, ɓosiyomna hiɗi gurona visiya, nisi tapay noŋ pet dok-ma';

²⁰jar sum sa Netiniyena, sa David hiɗi sa ŋulona tunsi kay sun sa Levitna, sa Netiniyena kis-ma' kalam dok-ma', yiy goy hiɗi sesi kaf.

²¹Ɗawni, goboy hiɗi niy-lumna Ahava, nan tun laata-lita kay sumuna kay nisi ma hot yisi gaa vok Lawna vuma'a, a jobom kay nam ma hinma tuɗ rogoyta hay sle'ta, kay gurona vuma'a hiɗi slena vuma kaf.

²²Tuwan muɗi zulo'o kay job tam mulla kay nam ma cuk sojena hiɗi sum sa ɓe kulumayn kuɗma'a, kay ŋomma kay sa gawta hay hagata, kay numa di goy jew tam mulla ala: Ɓam Lawna vuma'a ka baray kay nisi kaf sa garamu, kay nam min lisi ŋaata, may donota hiɗi ɦiyda valamu ka kay nisi sa noyom goyna kaf.

²³Kuɗ na'ta kayni numa li laata, yi sem Lawna vuma'a kaw, nam humma'a kaw.

²⁴Nan lak sumun goy visi doogo yam ma' kuɗ sa ŋulona vi muliyan-sa-ɗifinna: Serebiya, Hasabiya, hiɗi ɓosiyosi segen doogo.

²⁵Nan ŋaɓsi doorota, ora, hiɗi slen ma yawam goy kuɗ farayna vi mulla, kuɗ sa vulum gatta hiɗi sa ŋulona valamu kaw, hiɗi ma yawam hay ɓam sa Israyel kaf sa ka hay liy namna.

²⁶Nan ŋaɓ hay ɓisiya talente* ma doorona kis-karkiya kalam dok-vasl, slen ma doorona ir talente kis, hiɗi ora ir talente kis.

²⁷Kaway-ma-cina ma ora dok-ma', ir gurjut birim kep, dowayna ma' kotay hiɗi wayna ma ŋaana, jifiy ŋolo ki or nala.

²⁸Bugolda nan di tisiya: Nigi vuli goy ɗifin mi Ma-Vatɗina; slen cani nam peldete, doorota hiɗi or kayni kaf mi vulda kuɗ minda tam Ma-Vatɗina, Lawna vi sumaygiya.

²⁹Lakgi jigere, slen kayni nigi ma ŋomomu, ta-ta nigi ma ŋaɓam goyo vok sa ŋulona vi muliyan-sa-ɗifinna hiɗi sa Levitna, vok sa ŋulona vi jafna vi Israyel hay Yerusalem, kalaf hay ziyda vi Ma-Vatɗina.

³⁰Muliyan-sa-ɗifinna hiɗi sa Levitna yaw doorota, ora hiɗi slen ma nisi ŋaɓam goyna, kay naram hay Yerusalem, hay ziyda vi Lawna vuma'a.

³¹Numa yawis kel niy-lumna Ahava pa, kay kalma hay Yerusalem, hay buurta doogo yam ma'ta vi til ma jewna. Ɓam Lawna vuma'a ka baray kuma'a, nam ŋomma'a kay sa gawta ma durmaɗi, dukum ma cuma'a hay hagatɗi kaw.

³²Hay li ma numa co hay Yerusalem, numa tun sukma'a ir buur ɦidi.

³³Hay buurta fiɗita, doorota hiɗi ora hiɗi slen kaf numa ŋaɓam goyo hay ziyda vi Lawna vuma'a, numa vulum hay ɓam Meremot goora vi Uriyas, mul-ma-ɗifinna; hiɗi namu ay mi Eliyazar goora vi Fineyas, hiɗi nisiya ay si sa Levitna Yozabad goora vi Yosuwa, hiɗi Nowadiya goora vi Binnuy.

³⁴Gurjut kaf numa ŋaɓa' goyo, ŋaɓta va' kaf numa ɗo' gaa'a.

³⁵Sa maariyana sa hotay goy hay gorvot pana li ɗifin ma ŋal-goyna tam Lawna vi Israyel hiɗi luway-jufayn doogo yam ma' kay sa Israyel kaf, fok-gamalan dok-zleeŋe yam karkiya, guro fok-dimin dok-siɗiya yam siɗiya, fok-ŋekŋ doogo yam ma' kay sulukŋa, kaf li ɗifin ma ŋal-goyna tam Ma-Vatɗina hiɗi namu.

³⁶Nisi tuɗ dita vi mulla tam sa ŋarmanna vi mulla hiɗi guverner sa goy hay gal hena vi niy-lumna, nisi gut sumuna hiɗi ziyda vi Lawna.