Read Masana ESDRAS 9 Bible Online

ESDRAS 9 - Masana bible

ESDRAS 9

¹Bugol vatta vi slen kayni, sa ŋulona co katanu, nisi di tan ala: Sum sa Israyella, muliyan-sa-ɗifinna hiɗi sa Levitna min ja jarsi goy hiɗi sum sa hay nagat kaynɗi, slen ma liwisna ma sum sa Kananiyana, sa Hititna, sa Feresiyena, sa Yebusiyena, sa Amonna, sa Mowabna, sa Egiptena hiɗi sa Amoriyan ka lumna kaf nisi min ja jarsi goy hiɗi namɗi.

²Kay nisi yaw guro-boyna vi sum nisina boyo, mi gurona visi lay, nisi rigas jaf ma peldetna hiɗi sum sa hay nagat tani; sa ŋulona hiɗi sa ɗiger-lawta li law na'ta ta joota vok sum segen kayn si nisiya.

³Hay li ma nan hum lawta kayni, sligara vanu hiɗi sligar-tuwna van kaf nan jetem goyo, ɗuŋus ma kanna hiɗi ma jiweranna nan ratam goyo, nan mus gaa'a, muɗi zulo'o.

⁴Nisi kaf sa li nari kuɗ yoboyna vi Lawna vi Israyel tok tuwsi katanu, kuɗ lop ma joona ma sum sa ay goy gorvon lumna, nanu, nan mus gaa'a, muɗi zulo'o, ta-ta tam ɗifinna ma hay vulatitna.

⁵Hay li ma ɗifin ma vulatita coowa, nan fok kulo'o hay hot-yamda gaata van pa, sligara hiɗi sligar-tuwna van goy jeti jet, nan guɗof gaa kay ŋulofonu, nan meɗ ɓan kulo kat Ma-Vatɗina Lawna vanu.

⁶Nan di'e: Lawna vanu, liyn viy goy kiranu, nan muɗi zulo kaw kay muɗ iran kulo kataŋ naŋ Lawna; kay sulukŋa vuma'a nam biyay ŋolo suwma yuma'a, joota vuma'a muɗi ŋolo ta-ta kulo dukalawna.

⁷Tun caw tam buura vi sumayma pa kayni, numa li suluk ŋolo ta-ta vaydi; numa yaway goy gorvo kayni kuɗ joota vuma'a, numa'a, muliyana vuma'a hiɗi muliyan-sa-ɗifinna vuma'a, numa vuli goy hay ɓam muliyana vi jaf-sumuna, mi kew-gaferaŋa, mi gorvota, mi vurumta, mi zulota vi goŋ-ira ki vaydi nala.

⁸May hiɗi kayni kaf, hay wulin lakŋi, Ma-Vatɗina Lawna vuma'a, naŋ luma slugotawa, kay naŋ hin sum sara goy kuɗma iriya, kay naŋ vulma liyn ma ŋayna hay liyna vaŋ ma peldetna, kay naŋ Lawna vuma'a ma malma irma goyo, vulma irit neeɗa kaw jar gorvota vuma'a.

⁹Kay numa si gorvo'o; may Lawna vuma'a, naŋ hinma'ay goy hay gorvotɗi, naŋ meɗ ŋaata vaŋ goy kuma'a vok muliyana vi Persiya, kay hot muɗma iriya, kay numa ma hot in ziyna vaŋ naŋ Lawna vuma kulo'o, kay numa ma hot in ɓulakka valamu, kay numa ma fi liyn ma ŋayna hay Yuda hiɗi Yerusalem.

¹⁰Wulin kayni, Lawna vuma'a, numa ma dum bugol kayni mi meloge?

¹¹Kay vun-ma-gatna vaŋu ma naŋ vulum tuma'a hay vun sa jobta vaŋu, (ma naŋ di ala) nagata ta nigi kal haya'ta ɗawni na' ti nagata ta muɗi liwisi kuɗ liwista vi sum sa haya'na, kuɗ liwista ta ŋolda ta nisi ŋuy nagat hiɗi na' kafta;

¹²nigi vul guro-boyna vigiya mi gurona visiɗi, nigi yaw guro-boyna visiya mi gurona vigiɗi kaw, dikgi ma ɓirgi kay sle'ta visiya hiɗi musta ŋaata visiɗi kaw,[5] ki kayn nala nigi ma muɗ dono'o, nigi ma ti tin ma ŋaana vi nagata, nigi ma hinim mi gurona vigi dok-doko.

¹³Bugol slen ma co tuma'a kaf kuɗ lopna vuma ma joona hiɗi jiw-zlata vuma ta ŋolda, kitata ta naŋ Ma-Vatɗin Lawna vuma'a ka' kumata may ŋray hiɗi jiw-zlata vumaɗi, wulin kayni naŋ ŋom dir sumuna vuma sa hin goyna kaw,

¹⁴numa as kay raw vun-ma-gatna vaŋ goyo kay hot kuɗ sumun kayni a li slen ma liwisna lo su? La nala ɦiyda vaŋ ɗawn ma fok kulo katma'a ta-ta vatma goyo, sa mara as hin goy kuɗma loɗi naɗi su?

¹⁵Ma-Vatɗina Lawna, naŋ ɗigere, kay numa vaydi lakŋi ki dir sum sa hini goyna nala. Numa lak vok iraŋ hiɗi jiw-zlata vuma ni, hiɗi kayni numa as lak iri vok iraŋɗi.