Read Masana NEHEMIYA 1 Bible Online

NEHEMIYA 1 - Masana bible

NEHEMIYA 1

¹Yoboyna vi Nehemiya, goora vi Hakaliya. Hay tilla vi Kisilev*, hay busata dok-ma'ta, hay li ma nan ay hay Susa, hoyok-ziy ŋolla,

²Hanani, kep jar sa ɓosiyonna hiɗi sum sara'a may goy hay Yuda pa. Nan jobsiya kay caw Yudiyana sa pir goyna sa hin bay kal gorvona, kay Yerusalem kaw.

³Nisi hotan dita: Sum sa kal gorvoɗina ka hay nagat lak', nisi ka hay lasta ŋolda, sumun ka cen kuɗsiya; gulmunna vi Yerusalem ɦoy gaa'a, vun-galana va' ŋalay kay kuta kaw.

⁴Hay li ma nan hum yoboyn kayni, nan mus gaa'a, nan tiya, ir buur ŋolo nan ka hay yorta. Nan li laata, siɗaw vok ir Lawn ma dukalawn kaw.

⁵Nan di'e: Hih! Ma-Vatɗina, Lawn ma dukalawna, Lawn ma ŋolla ma narta kuɗaŋ ŋolla, naŋ ma ŋom bonota hiɗi ŋaata vaŋu tam nisi sa minaŋu, sa ŋom vun-ma-gatna vaŋu,

⁶jakaŋ humaŋ jakge, mal humaŋ goy mali kaw kaw hum siɗawta vi sa ma sunda vaŋu. Nan ka siɗaw vok iraŋu wulini, falayta hiɗi henjeta, kay sa sunda sa Israyella, kay ham sulukŋa vi sa Israyella, suluk ma numa lum kataŋŋa, nanu hiɗi jafna vanu, numa li sulukawa.

⁷Numa li law joowa kataŋu gasiya, vun-ma-gatna hiɗi ɗota, hiɗi dita vaŋu ta naŋ vulmat hay ɓam Musus sa ma sunda vaŋu numa min li kuɗa'ɗi.

⁸Humaŋ ma gaŋ kay yoboy namna ma naŋ ɗom hay ɓam Musus sa ma sunda vaŋu ala: La nigi muɗawa bay-ɗigere, nan ma mergi goy jar jaf-sumuna;

⁹may la nigi hotay katanu, la nigi ŋom vun-ma-gatna vanu li kuɗumu kaw, hay na'ta la nigi digiɗiys goyo hay vun dabaŋ-gu'ta vi nagata pa kaw, ɗawni pa nan ma tokgi yigiya, nan ma hotgiyaya hay liyn ma nan tun semda van hayna.

¹⁰Nisiya si sa sunda vaŋu hiɗi sumuna vaŋu, sa naŋ butsiyay goyo hiɗi donota vaŋ ta nolda, hiɗi ɓaŋ ma donona.

¹¹Hih! Bum-Sumuna, Jakaŋ humaŋ tam siɗawta vi sa ma sunda vaŋu, hiɗi siɗawta vi sa sunda vaŋu sa min li nari kay semda vaŋu. Vulaŋ kolda mi sa ma sunda vaŋ vaydi, hinim fi slugota vok ir san kayni. Nan ay hay na'ta mi sa ma vul sle ma cin mi mulla.