Read Masana NEHEMIYA 13 Bible Online

NEHEMIYA 13 - Masana bible

NEHEMIYA 13

¹Hay liy namna, nisi jaŋ hay ɗerwelda vi Musus vok ir sumun kafe, nisi fi ɗot ala sa ma Levitna hiɗi sa Amonna as kal kalaf hay tokŋa vi Lawn noŋɗi,[4]

²kay nisi may co ŋaf ir sa Israyella hiɗi funɗi hiɗi niynɗi kaw, kay nisi vul gurjuta mi Balaam kay nam beɗ sa Israyella, may Lawna vuma'a muɗ be'da goy bolda.

³Hay li ma nisi hum vun-ma-gatna humna, nisi poŋ ir sa pulla kaf goy hiɗi sa Israyella.

⁴Jew van kayni, mul-ma-ɗifinna Eliyasib, ma ka musi kalaf hay ziyɗa vi Lawna vuma'a, namu mi sugol Tobiya,

⁵ki kayn nala ziyda kalafta ta ŋolda ta jewe lak haya slen ma vulda, urdina, jakŋa, gal-ma-doogona, vi alkamarena, vi vin ma jibetna hiɗi mula, slen ma hagata vuli kay vulum tam sa Levitna, sa gi nulla hiɗi sa ŋom vun-galana, hiɗi galla ma yawam goyo kay muliyan-sa-ɗifinna kaw, nam mus Tobiya haya'a.

⁶Nan may hay Yerusalemɗi hay li ma slen kayni kaf li'e, kay nan ay hotay kat mulla Artakserses, mulla vi Babilon hay busata dok-ɦidi yam zleeŋe vi mulda valamu. Mulla vulan

⁷hagata kay nan hotay Yerusalem, iran cuk kay joota ta Eliyasib la'ta, hay li ma nam vul ziyda mi Tobiya hay wur-daŋŋa vi ziyda vi Lawna.

⁸Nan dikan ɓulak ŋolo, slena vi Tobiya ma kalaf hay ziyda nan durum goy jiy kafe;

⁹nan vul hagata kay nisi por hay ziy ma kalafn goyo, slen ma hay ziyda vi Lawna nan hot lakam kalaf hay ziyna, vulda hiɗi urdina kaw.

¹⁰Nan hum kaw ala galla vi sa Levitna may vuli goyɗi, sa Levitna hiɗi sa gi nulla sa lopna vuli hay ɓisina muni jaŋi, gigekaw hay sinena valamu valamu.

¹¹Nan law ɦiya tam sum sa ɗiger-lawta, nan di tisiya: Ziyda vi Lawna noyay goy kayn kay mige? Nan tok sa Levitna hiɗi sa gi nulla, nan hot tunsi hay lopna visiya.

¹²Ki kayn nala jafna vi Yuda kaf mar gal-ma-doogona vi alkamarena, vi vin ma jibetna hiɗi mula kaw hay feera.

¹³Nan vul ŋomda vi feera hay ɓam Selemiya mul-ma-ɗifinna hay ɓam Sadok, ma wi ɗota, hay ɓam Pedaya, kep jar sa Levitna, goy galsiya mi Hanan, goora vi Zakkur, goora vi Mattaniya, kay sesi goy tiy ala nisi si sum sa ɗigere. Nisi vulsi lopna hay ɓisiya kay nisi ma ɓuraw slen tam ɓosiyosina.

¹⁴Humaŋ ma gaŋ kan gige, naŋ Lawna vanu, kuɗ slen kayni, lop ma ɗigera ma nan lum kat ziyda vaŋu hiɗi lita kuɗ vun-ma-gatna naŋ ma ɦasam goyɗi ge.

¹⁵Hay liy namna, nan wi sum segena sa Israyella ka kesl gulda-guldana hay buura vi sabatna, ka yaw yam wanay vo'o, ka dakam kulo kay kurona, nisi ka li nala hiɗi vinna, hiɗi gulda-guldana, hiɗi gumna hiɗi jaf ma nekŋa kaf, nisi ka maram hay Yerusalem hay buura vi sabatna; nan lawsi kirsiya hay buur ma nisi ka gus sle ma tin goyo.

¹⁶Sum sa Tirusna segen ka lakay ziy jarsi lak', nisi ka mar kulufna hiɗi sle ma gusna kaf, nisi ka gusum goyo tam sa Yudana hiɗi sa hay Yerusalem hay buura vi sabatna.

¹⁷Nan law ɦiya kat sa ŋulona vi Yuda, nan di tisiya: Nigi ka li lop ma joona ki kayn nala hay li ma nigi muɗ buura vi sabatna goy liwisi kayni ɗek mige?

¹⁸Sumaygiya may li ki kayn nala ɗisu? Kuɗ na'ta Lawna vaya hin joot kaf kayni co kaya hiɗi hoyok-ziyna tani. May nigiya, nigi jor ɦiyda valamu kat sa Israyella hay li ma nigi muɗ sabatna goy liwisi.

¹⁹Bugol kayni, hay li ma vun-galana vi Yerusalem tun caw muɗ jufunu, jew sabatna, nan vul hagata kay duk vun-galan kulo'o, say malam goy kay bugol sabatna tuwa. Nan lak sum segen jar sa joriyon sa sunda vanu kat vun-galana, kay nisi ma tel sumuna kay nisi mar jakŋ hay Yerusalem hay buura vi sabatnɗi.

²⁰Nala sum sa li filiwna hiɗi sum sa gus sle ma tin goy kuɗ jafam kafna bur goy ŋor Yerusalem sem kep, cap sem ma' noŋo.

²¹Nan lawsi kisiya, nan di tisi ala: Nigi bur goy ŋor gulmunna kay mige? La nigi hot mara li nala lo, nan ma tun ɓan tigiya. Hay na'ti pa kayni, nisi min hotay hay buura vi sabatna loɗi.

²²Nan di tam sa Levitna kay nisi ma por tuwsi goyo, kay nisi ma co ŋom vun-galana, kay nisi ma li buura vi sabatn goy peldete. Kuɗ kayni kaw, humaŋ ma gaŋ kanu, naŋ Lawna vanu, naŋ ma ŋomanu kuɗ ŋaata vaŋ ta ŋolda.

²³Hay liy namna kayni lo, iran cuk kay Yudiyana sa yaw boy sa Asdodiyena, sa Amonitna hiɗi sa Mowabna.

²⁴Galla vi gurona visiya lawam mi vun Asdodiyena, may wi vun Yudiyan ŋoŋɗi; nisi lawam kayni mi vunna vi sum sara'a sara'a.

²⁵Nan lawsi ɦiya, nan beɗsiya; segena nan tosiya, segena nan ratsi ɗuŋus ma kisin goyo, nan zutsi kay yi va kisi hay semda vi Lawna ala: Nigi ma vul guro-boyna vigiya mi gurona visiɗi, nigi ma yaw guro-boyna visiya mi gurona vigiɗi, migi nigiɗi kaw.

²⁶Zawni ti lawta ta kal Salomon mulla vi Israyel hay sulukŋa ɗisu? Mul mara ma ŋray hiɗi namu jar jaf-sumun kaf mayɗi, namu Lawn minim ŋolo, Lawn tunum mulu kay sa Israyel kafe; may hiɗi kayni kafe boy sa pulla kalam hay sulukŋa.[5]

²⁷San as hum labar kigi ala nigi ka li suluk ma ŋolo, nigi muɗi bay-ɗigere kat Lawna hay li ma nigi yaw boy sa pulla lo su?

²⁸Kep jar gurona vi Yoyada, goora vi Eliyasib mul ŋol ma-ɗifinna namu mi kuno Sanballat ma Horonitna. Nan digiɗim goy gine'e vok iranu.

²⁹Humaŋ ma gaŋ kisiya, naŋ Lawna vanu, kay liyn ma ɗifinna, bonota vi muliyan-sa-ɗifinna hiɗi sa Levitna kaf nisi muɗumawa goy liwisi.

³⁰Nan porsi goy kay sum sa pulla sa jarsin kaf, nan hot tun gatta vi muliyan-sa-ɗifinna hiɗi sa Levitna hay hagata va'a, nan tun gigekaw hay lopna valamu valamu,

³¹hiɗi slen ma ɗek kay guna ma as ŋalamu hay buur ma colina, hiɗi vun-jaf ma jewna kaw. Humaŋ ma gaŋ kanu, lan ŋaata vaŋ lige, naŋ Lawna vanu.