Read Masana NEHEMIYA 3 Bible Online

NEHEMIYA 3 - Masana bible

NEHEMIYA 3

¹Eliyasib mul ŋol ma-ɗifinna, fokay kulo'o hiɗi ɓosiyomna muliyan-sa-ɗifinna, nisi in vun-galana vi fok-dimina. Nisi lum goy peldete, kal cokorom hayam kaw; nisi lum goy peldete, tun caw tam simdira vi Meya pa ta-ta tam simdira vi Hananeel.

²Sumuna vi Yeriko in hay galamu; hay galam lo sumuna vi Zakkur goora vi Imri ina.

³Gurona vi Senaa in vun-galana vi kulufna; hay li ma nisi har gun harna, nisi kal cokoromna vi vun-ziyn gaa'a, hiɗi gu-malla hiɗi kokona valamu kaw.

⁴Li lop galsi kayni mi Meremot goora vi Uriyas, goora vi Hakkos, li lop galsi kayni mi Mesullam goora vi Berekiya, goora vi Mekezabeel; li galsi kayni mi Sadok goora vi Baana;

⁵li lop galsi kayni si sa Tekowana, may sa ŋulona jarsiya min hot yisi gaa kuɗ sa voksinɗi.

⁶Yoyada goora vi Paseya, hiɗi Mesullam goora vi Besodiya nisi kot vun-galana ma busayna. Hay li ma nisi har gun harna, nisi kal cokoromna vi vun-ziyn gaa'a, hiɗi gu-malla hiɗi kokona valamu kaw.

⁷Li lop galsi kayni si Melatiya ma Gabawonna, Yadon ma Meronotitna, hiɗi sumuna vi Gabawon hiɗi Mispa, sum sa cukiyaya kay li lop hay liyna vi guvernera goy bugol niy-lumna.

⁸Li lop galsi kayni Uziyel goora vi Harhaya, jar sa yor ora, li lop galam kayni mi Hananiya, jar sa kot urdina. Nisi co (lop gulmunna vi) Yerusalem ta-ta tam gulmun ma beɗayna.

⁹Li lop galsi kayni mi Refaya goora vi Hur, ma ŋolla vi gal-jafna vi nagata vi Yerusalem.

¹⁰Tap li lop galsi kayni mi Yedaya goora vi Harumaf, ɗiger vok ziyna valamu, tap li lop galam nam kayni mi Hattus goora vi Hasabniya.

¹¹Gal hena vi gulmunna hiɗi liyn ma yor kawayna kotom si Malkiya goora vi Harim hiɗi Hasub goora vi Pahat-Mowab.

¹²Tap li lop hiɗi nisi kayni mi Sallum goora vi Hallohek hiɗi guro-boyna valamu, nam mi ma ŋolla vi gal-nagata vi Yerusalem.

¹³Hanun hiɗi sum sa hay Zanowana kot vun-galana vi lokŋa, nisi inimu, lak cokoromna haya, ci kokona hiɗi gu-malla haya kaw. Nisi li lop suw kayni ir goldoŋ birim kep, nisi co gulmunna ta-ta tam vun-galana vi zigidikŋa.

¹⁴Malkiya goora vi Rekab, ma ŋolla vi nagata vi Bet-Hakkerem, nam kot vun-galana vi zigidikŋa, nam inimu, cuk cokoromna haya, ci kokona hiɗi gu-malla haya.

¹⁵Sallum goora vi Kalhoze ma ŋolla vi nagata Mispa kot vun-galana vi kaara, nam kotomu, hay li ma nam har gun harna, nam ci cokoromna vi vun-ziyn gaa'a, hiɗi kokona hiɗi gu-malla kaw. Suw kayni lo nam kot gulmunna vi goloŋga Silowe, goboy hiɗi jardeŋŋa vi mulla, ta-ta tam liyn ma jik gaa'a hay ziyna vi David pa.

¹⁶Bugolom namu mi Nehemiya goora vi Azbuk, ma ŋolla vi gal-jafna vi nagata vi Bet-Sur, nam li lop kay kot slena ta-ta ɗiger vok yam-usta vi David, ta-ta tam goloŋga ta jugoɗa'ta, ta-ta tam ziyna vi sa donona kaw.

¹⁷Bugolom namu li lop kayni si sa Levitna, Rehum goora vi Bani, tapay hiɗi namu, li lop kay nagata valam kayni mi Hasabiya, ma ŋolla vi gal-nagata vi Keyla.

¹⁸Bugolom namu li lop kayni si ɓosiyosina, Bavay goora vi Henadad, ma ŋolla vi gal-nagata vi Keyla;

¹⁹tapay li lop hiɗi namu mi Ezer goora vi Yosuwa, ma ŋolla vi Mispa, nam kot liyn mara'a, ɗiger vok liyn ma jik kulo hay ziyna vi kaway-ma-duura, hay holokŋa vi gulmunna.

²⁰Bugolom namu mi Baruk goora vi Zabbay, nam li lop hay liy hena hiɗi ciwerta, tun caw tam gefna pa ta-ta tam vun-galana vi ziyna vi Eliyasib, mul-ma-ɗifinna.

²¹Bugolom namu mi Meremot goora vi Uriyas, goora vi Hakkos, nam in liy hena, tun caw tam vun-galana vi ziyna vi Eliyasib pa ta-ta goy hay vun ziyna vi Eliyasib ma vat goyna.

²²Bugolom namu li lop kayni si muliyan-sa-ɗifinna, sum sa lakay hay fulda.

²³Bugolsi nisiya li lop si Benyamin hiɗi Hasub, nisi li lop ɗiger vun ziyna visiya. Bugolsi nisiya li lop kayni mi Azariya goora vi Maaseya, goora vi Ananiya, nam li lop kat ziyna valamu.

²⁴Bugolom namu mi Binnuy goora vi Henadad, nam in liyn hena, tun caw tam ziyna vi Azariya pa ta-ta tam holokŋa, ta-ta tam gef-gulmunna.

²⁵Palal goora vi Uzay li lop ɗiger vok holokŋa hiɗi bidir ma ŋolla ma coli goy vok ziyna vi mulla, goboy hiɗi wur-daŋŋa vi daŋgayna. Bugolom namu li lop mi Pedaya goora vi Parewos.

²⁶Sa Netiniyena sa ka lakay hay Ofel li lop ta-ta ɗiger vok vun-galana vi niyna, gal kuɗuwu, hiɗi simdir ma suwi kulona.

²⁷Bugolsi nisiya sum sa Tekowana kot liy hena ɗiger vok simdir ŋolla ta-ta tam gulmunna vi Ofel.

²⁸Kulo'o kay vun-galana, muliyan-sa-ɗifinna li lop kayni gigekaw vun ziyna valamu valamu.

²⁹Bugolsi nisiya Sadok goora vi Immer, nam li lop vok ziyna valamu. Bugolom namu li lop mi Semayeya goora vi Sekaniya, ma ŋom vun-galana ma gal kuɗuwna.

³⁰Bugolsi nisiya, Hananiya goora vi Selemiya, hiɗi Hanun, goor ma karkiyana vi Salaf, nisi kot liy hena vi gulmunna. Bugolsi nisiya Mesullam goora vi Berekiya, nam li lopo ɗiger vok ziy ta buura valamu.

³¹Bugolom namu mi Malkiya, jar sa yor ora, nam li lopo ta-ta kat ziyna vi sa Netiniyena hiɗi sa li filiwna, ɗiger vok vun-galana vi Mikfad, ta-ta kat ziyda-kulota vi gef-liyna.

³²Sa yor ora hiɗi sa li filiwna li lopo jar ziyda-kulota vi gef-liyna hiɗi vun-galana vi fok-dimina.

³³Hay li ma Sanballat hum ala numa ka in gulmunna, nam muɗ ɦiya, dikam roŋ kotoroŋ'.

³⁴Nam tun caw pan sa Yudiyana. Nam law vok ɓosiyomna hiɗi vok sojena vi Samariya kaw ala: Sa Yudiyan sa maŋayn lakŋ lum kayn mi mige? Nay as hinsi li lopn su? Hinsi li ɗifinna visi su? Hinsi vat lopn su? Hiɗiy ma piy gaa kuɗ nagana ma ŋalay goyna hinsi bigiɗim kulo lo su?

³⁵Tobiya ma Amonitna ka galam zaw, nam ka di ala: Hinsi in tuwa tige, la cekem kaw dab gulmunna visiyawa, nam ma com goy ɦuluk'.

³⁶Hih! Humaŋu, Lawna vuma'a, sumun ka panma'a tige. Hin zulota visiya nig kisiya, hinaŋ sum sara tisi ɓuraŋi, kalsi goy hay naga tara gorvo kalge.

³⁷Naŋ vul gida kay joota visiɗi, ɦas sulukŋa visi goy vok iraŋ noŋɗi, kay nisi ɓulak dik sum sa li lopna.

³⁸Nala numa in gulmunna, numa tuɗum kulo'o ta-ta ɓiretem kulo ca'.