Read Masana NEHEMIYA 4 Bible Online

NEHEMIYA 4 - Masana bible

NEHEMIYA 4

¹Sumun vul tuwsi hay lopna kayni. May Sanballat, Tobiya, sa Arabna, sa Asdodiyena hay li ma nisi hum ala inda vi gulmunna vi Yerusalem ka tuɗ vokomu, iram ma munina ka tosa kaw, nisi muɗ ɦiy ŋolo.

²Nisi ŋra vunsi kaf kay co dur Yerusalem, kay ɓulaka' goyo.

³May numa siɗaw Lawna vuma'a numa lak sum sa ŋomda hay falayta hiɗi henjeta kaw, kay ŋomma kay sa gawta.

⁴Hay na'ta jafna vi Yuda di'e: Sum sa ziy jakŋa donosi vatawa, hiɗiy ma ɦoy gaa kay tuwamna suwi ŋolo; nay as a in gulmunnaɗi.

⁵Sa gaw kuma'na di'e: Nisi ma wiɗi, ɗuwɗi kaw ta-ta nay ma co kisi tukusi'. Nay ma cisi goyo, ki kayn nala nay ma tel lopna.

⁶Dolay kayni Yudiyana sa ka lakay ziy hiɗi nisina ka co tuma'a kay duma newta sem doogo: Hay liyn kaf ma nisi ka lakay hayamna, nisi ka co katma'a.

⁷kay na'ta nan lak sumun goy hay liyn ma holokŋa bugol gulmunna, goy hay liyn ma soyna, nan laksi kuɗ vuɗna vuɗna, hiɗi kew-gaferaŋa visiya, hiɗi kawayna hiɗi ɓarawna kaw.

⁸Nan ɗuwa, nan fokay kulo'o, nan di tam sa ŋulona, tam sa ɗiger-lawta hiɗi sum segen kaf ala: Ligi nar kisiɗi, humgi ma gigi kay Ma-Vatɗina, ma ŋolla ma ɦuyumda kuɗumna, durgi kay ɓosiyogina, guro sa jufayna vigiya hiɗi sa boyna vigiya hiɗi ziyna vigi kaw.

⁹Hay li ma sa gaw kumana hum ala newt coy tuma'a, Lawn vat ŋra-vunda visi goyo. Numa kaf hotay tam gulmunna, gigekaw vun lopna valamu valamu.

¹⁰Tun caw hay na'ta pa, gal hena vi sa sunda vanu ka li lopna, galla visi hena ka ganay hiɗi kawayna, marayna, ɓarawna hiɗi bogorayna kaw. Sa ŋulona ay bugol jafna vi Yuda kafe.

¹¹Nisi ka in gulmunna, hiɗi nisi sa ziy lebo yaw jakŋa ka li lop hiɗi ɓisi ta kepta, kawayn mokay hay ɓisi heta ta kepta may;

¹²nisi sa in gulmunna gigekaw ka hiɗi kew-gaferaŋa valam juni hay furamu. Nisi ka li lop kayn ki kayn nala. Nam ma buw togolomna ka coli goboy hiɗi nanu.

¹³Nan di tam sa ŋulona, sa ɗiger-lawta hiɗi sum segen kaf ala: Lopna kayni ka ŋolo, buɗuk ŋolo kaw, numa ka meray goy kay gulmunna ɓe-ɓe', jarma gine'e kaw.

¹⁴Tokgi tuwgi ay kulo katma'a, hay liyn ma nigi ma hum buwna vi togolomna; Lawna vaya ma dur hay baŋalaya.

¹⁵Ki kayn nala numa tuɗi vok hiɗi lopna, galma hena ka hiɗi kawayn hay ɓisiya, tun caw hay ŋarpita pa ta-ta mislekŋa vul tuwam goyo.

¹⁶Hay liyn namna kayni, nan di tam sumun mara lo: Hin san gigekaw bur kulo hay Yerusalem hiɗi goor joriyo ma sunumna, nay ma li ŋomda hay henjeta, lay lopna hay falayta may.

¹⁷Nanu hiɗi guro-biyonna, hiɗi joriyo sa sunda vanu, hiɗi sum sa ŋomda sa tapay kuɗanna kaw, sligara vuma ma tuma'na numa may fokom goyɗi. Gigekaw hay ɓalam kayni mi sle ma duura hiɗi niy ma cina tuta.