Read Masana NEHEMIYA 5 Bible Online

NEHEMIYA 5 - Masana bible

NEHEMIYA 5

¹Bugol kayni sumun ŋolo hiɗi boyna visiya tun caw tiy tuwsiya kat ɓosiyosi sa Yudiyana.

²Segen di'e: Numa'a, hiɗi gurona vuma sa jufayna hiɗi sa boyna kaw, numa ka ŋolo; numa min fi alkamarena, kay ti'e, kay lak iriya kay.

³Segen ka di'e: Sinena vuma'a hiɗi gulda-guldana vuma'a numa ka deŋem goyo kay fi alkamarena hay buur ma mayta.

⁴Segen lo di'e: Numa ni gurjuta kay sinena hiɗi gulda-guldana vuma'a kay wurak taar vi mulla.

⁵May numa sliwma ki sliwsi nisi nala lay, gurona vuma'a ki gurona visi nisi nala kaw, may wulini gurona vuma sa jufayna hiɗi sa boyna kaw nisi ka muɗsi gorvo'o, guro-boyna vuma ŋolo muɗi kisi gorvo vatiya, va vuma ma ti may loɗi, sinena vuma'a hiɗi gulda-guldana vuma'a muɗi vi sum sara'a.

⁶Dikan ɓulak ŋolo hay li ma nan hum tiyta visiya hiɗi yoboyna kayni,

⁷nan col lawt ala nam min law tam sa ŋulona hiɗi sa ɗiger-lawta. Nala nan di tisiya: Kayn mige? Nigi vul balla mi guro-biyogina hiɗi niyam kuɗum su? Kuɗ lawta na'ta nan yi dakka ta ŋolda.

⁸Nan di tisiya: Guro-biyoyn sa Yudiyana, sa gusi goy hay ɓam sa waana nay as hot gussi ay kayni hiɗi donota vaya, wulin kayni nigi kay tuwgiya hot gus guro-biyogin goyo lo, hot gussi si nigi kay tuwgi lo litige? Nisi duk vunsi ɓurut', fi va kay hot dit hiɗi nam loɗi.

⁹Bugolda nan hot disi lo: Va ma nigi lum kayni may ŋaaɗi. Nigi ma tuɗ hay narta kuɗ Lawna vaya, kay nay ma muɗ zulo'o vok sa nagatna sa gaw kaynaɗi kayn may ŋaa ɗisu?

¹⁰Nan kaw, guro-biyonna hiɗi joriyona sa sunda vanu, numa vulsi gurjuta hiɗi alkamarena bali, nay ma hin bal namna.

¹¹Hay fatta vaydit zawni nigi ma hotsi sinena visi goyo, gulda-guldana visiya, gu-olivena hiɗi ziyna visi kaw, hiɗi gal ma kisna vi gurjuta, vi alkamarena, vi vin ma jibetna hiɗi mula kaw ma nigi min fi niy tisi hiɗi namu.

¹²Nisi di'e: Numa min hotsita, numa min job va tisi noŋɗi kaw, numa ma li kuɗ va ma naŋ di'e: Ki kayn nala nan yi muliyan-sa-ɗifinna, nan halafsiya kay nisi ma li kuɗ dita vi vunsiya.

¹³Nan gifir birimna vi sligar ma tanna goyo, nan di'e: San gigekaw ma li kuɗ dit kaynɗi, Lawn ma gifirim goy hay ziyna valamu, namu hiɗi slena valam kaf, san kayni ma gifiris goyo, hin goy haw kaɗaŋ-kaɗaŋ'. Tokŋa kaf di ala Amen. Nisi subur Ma-Vatɗina kaw. Sumun li kuɗ dita na'ta may.

¹⁴Tun caw tam buur ma mulla tunan ki guverner nala hay nagata vi Yuda pa, tun caw tam busata dok-ma'ta pa ta-ta tam busata dok-ɦidi yam ma'ta vi mulla Artakserses, ir busat doogo yam ma', nanu hiɗi guro-biyonna kaf numa lakay ti tina vuma kayni may kuɗ guvernertaɗi.

¹⁵Jewan nan kayni, guvernerayna ka curoɗ sumuna, tar funa hiɗi vinna hay ɓam sumuna, jiki goy kay gurjuta ta sikel* dok-fiɗita; guro-joriyona visi kaw ka ti mulda kay sumun hiɗi dono'o. Nan hayɗin min li man ki kayn naɗi, kay narta kuɗ Lawna.

¹⁶Suw kayni lo, nan li lopo kay kot gulmunna kayni, numa may gus sine kepɗi kaw, joriyo sa sunda vanu sa tokayn kaf ka li lopna.

¹⁷Sum sa ti fun kay tablena vanu ay kis kalam dok-vasl, kayni si sa Yudiyana hiɗi sa ɗiger-lawta, sum sa coy katma'a hay nagata ta goy galma pata say hayɗi.

¹⁸Hay buurta kaf nisi ka ŋatan put kep kepe, fok-dimi ma varay goyna karkiya karkiya, hiɗi layayna kaw; jar buur doogo kaf kayni nisi kot vinna ir asay ŋolo. Hiɗi kayni kaf nan may job slena vi guvernertaɗi, kay lopna kayni ka ci sumun nek ŋolo.

¹⁹Hih! Lawna vanu, humaŋ gaŋ kan ŋaa'a gi ge! Kuɗ slen kaf ma nan lum kay sumun kayni.