Read Masana NEHEMIYA 8 Bible Online

NEHEMIYA 8 - Masana bible

NEHEMIYA 8

¹Til ma siɗiyan co'o, sum sa Israyella ka lakay hay hoyok-ziyna visiya visiya. Bugol kayni sumun kaf tok tuwsi ki san kep ɦawa nala hay liyn ma ka vok vun-galana vi niyna. Nisi di tam Esdras sa ma wi ɗota kay nam ma mar ɗerwelda vi gatta vi Musus, ta Ma-Vatɗina ɗo' tam sa Israyella.

²Mul-ma-ɗifinna Esdras mar gatta vok tokŋa, ay tokay kayni si jufayna hiɗi boyna hiɗi nisi kaf sa asay kay hum slena. Kayni hay buurta jewta vi til ma siɗiyana.

³Nam jaŋ ɗerwel goyo, tun caw grawta pa ta-ta falayta, nam ka coli hay liyn ma ɗiger vok vun-galana vi niyna, goy vok jufayna, boyna hiɗi nisi sa asay kay huma. Sumun kaf lakay kiliŋ kay hum jaŋga vi gatta.

⁴Esdras ma wi ɗota ka coli kulo kay balakŋa ma nisi pum kay li lop namna. Ka lakay talam hay galam ma jufna kayni si Matitiya, Sema, Anaya, Uriyas, Hilkiya, hiɗi Maaseya, hay galam ma gulla kayni si Pedaya, Mikayel, Malkiya, Hasum, Hakbaddana, Zakariya hiɗi Mesullam.

⁵Esdras mal ɗerwelda goyo kir sumun kaf, kay nam ka coli kulo ɗiŋiriŋi suw sumun kaf, hay li ma nam mal ɗerwel goy malla, sumun kaf lak kulo'o.

⁶Esdras subur Ma-Vatɗina, Lawn ma ŋolla, sumun kaf hot dita hiɗi ɓisi kulo yaway ala: Amen, Amen! Nisi guɗof gaa'a, dab voksi gaa vok Ma-Vatɗina gaa kay nagata.

⁷Yosuwa, Bani, Serebiya, Yanim, Akkub, Sabbetay, Hodiya, Maaseya, Kelita, Azariya, Yozabad, Hanan, Pelaya hiɗi sa Levitna sa ka di caw gatta goy tam sumuna, sumun ka lakay kulo'o may.

⁸Nisi ka jaŋ ɗerwella vi gatta vi Lawna goy haraŋ ŋaa'a ŋolo, nisi ka dum cawam goyo kay nisi ma hum caw sle ma jaŋamna.

⁹Nehemiya ma guvernera, Esdras mul-ma-ɗifinna ma wi ɗota hiɗi sa Levitna sa hat sumuna di tam sumun kaf ala: Buurta vaydit zawni vuli goy tam Ma-Vatɗina Lawna vigiya; lakgi hay yorta hiɗi tiynɗi. Kay sumun kaf ka tiya hay li ma nisi hum yoboyna vi gatta.

¹⁰Esdras di tisiya: Tuɗgiya, tigi tin ma hiɗi mula, cigi dolay ma sleɗna, jokgi gal hena tam sum sa fisin mayɗina, kay fatta vaydit zawni vuli goy tam Bum-sumuna vaya; nigi ma to sutaygiɗi, kay firita hay Ma-Vatɗina kayn ti donota vigiya.

¹¹Sum sa Levitna kaw ka sleɗ dik sumun kaf hiɗi dita ta ala: Zangiya, kay buurta ta vaydit zawni na' peldete, togi sutaygiɗi.

¹²Sumun kaf kali kay ti'e kay ci'e kaw, kay vul galla (mi segena) kay li firita ta ŋolda. Kay nisi humi yoboyna ma cawam ka ɗekay goyna.

¹³Hay buurta ma'ta, sa ŋulona vi jafna vi sumun kaf, muliyan-sa-ɗifinna hiɗi sa Levitna tok tuwsi kat Esdras, sa ma wi ɗota, kay tun ŋalda visiya kay yoboyna vi gatta.

¹⁴Nisi fum ɗoy hay gatta ta Ma-Vatɗina ɗo'a, vula' hay ɓam Mususta ala, sum sa Israyella ma lak hay guɗukŋa hay yuldeta vi til ma siɗiyana.

¹⁵A nisi ma di labar goyo, siwel goy hay hoyok-ziyna visi kaf, hay Yerusalem kaw ala: Cukgiyay goy kay hiɗiyn pa, margi hum-gun olive, hiɗi hum-gu olive ma fulla, hum gu-warana, hum gomona hiɗi gu goɗayna, kay kot guɗukŋa, ki nam ka ɗoy nala.[2]

¹⁶Nala sumun cuki goyo, nisi maramu. Nisi kot guɗukŋa, gigekaw kulo'o hay wur-daŋŋa vi ziyda vi Lawna, hay liyna vi vun-galana vi niyna, hiɗi vun-galana vi Efrayim.

¹⁷Tokŋa vi nisi sa hotay hay gorvot pana kot guɗukŋa; nisi lak hay guɗuk namna. Tam caw tam liyna vi Yosuwa goora vi Nun pa ta-ta tam buur namna, sum sa Israyella bay li va ki kayn nala tuwa, firita li ŋolo.

¹⁸Nisi jaŋ hay ɗerwelda vi gatta vi Lawna, hay buurta kaf, tun caw tam buur ma jewn pa ta-ta tam ma cawna. Nisi li yuldeta ir buur siɗiya, yuldeta ŋolda nisi la' hay buurta glafandita, kuɗ lawta ta colayta.