Read Masana NEHEMIYA 9 Bible Online

NEHEMIYA 9 - Masana bible

NEHEMIYA 9

¹Hay buurta dok-ma' yam fiɗita vi til namna, sum sa Israyella tok tuwsiya, nisi cuk sligar bolla tisiya, goɓ tuwsi hiɗi nagana kaw, kay li laata.

²Nisi sa hay jafna vi Israyel poŋ irsi goy hiɗi sa pulla, nisi co'o kay ham sulukŋa visiya hiɗi sulukŋa vi sumaysiya.

³Hay li ma nisi lak kulo'o hay liyna visiya visiya, nisi jaŋ hay ɗerwella vi gatta vi Ma-Vatɗina, Lawna visiya, ir gal ma fiɗina vi fatta kepe; ir gal ma fiɗina vi fatta lo, nisi ham sulukŋa visi goyo, nisi girif gaa vok Ma-Vatɗina Lawna visiya.

⁴Yosuwa, Bani, Kadmiyel, Sebaniya, Bunni, Serebiya, Bani hiɗi Kenani jik kulo kay balakŋa vi sa Levitna, nisi siwel hiɗi delsi kulo ŋolo kat Ma-Vatɗina Lawna visiya.

⁵Sa Levitna, Yosuwa, Kadmiyel, Bani, Hasabniya, Serebiya, Hodiya, Sebaniya hiɗi Pedaya di'e: Yawgi kulo'o, suburgi Ma-Vatɗina Lawna vigiya, hay vatɗita vatɗita. Hinsi subur semda vaŋu ta gajijita, ta kulo suw bolda hiɗi suburta kafe.

⁶Mi naŋu Ma-Vatɗina, mi naŋ kepe ma li dukalawna, dukalawna ma suw dukalawna hiɗi vok-ma-duura valam kafe, nagata hiɗi sle ma haya'na kafe. Niy-lum ma ŋolla hiɗi slen ma hayamna kafe. Mi slen kayni kaf naŋ vul irita, vok-ma-duura ma dukalawna ka girif gaa vokaŋu.

⁷Mi naŋu Ma-Vatɗina Lawna, ma vilek Abram goyo, ma vumay goy hay Ur vi Kaldee pa, ma vulum semda ala Abraham.

⁸Naŋ fum dikam kayn ɗigere vok iraŋu, naŋ jun bonotawa hiɗi namu, kay vul mi jafna valamu nagata vi sa Kanaaniyana, sa Hititna, sa Amoriyana, sa Feresiyena, sa Yebusna, sa Girgasiyena kaw. Naŋ li kuɗ dita vaŋu kaw, kay naŋ ɗigere.

⁹Naŋ wi lasta vi sumayma hay Egipte, naŋ hum tiyta visiya kaw goboy hiɗi niy-lumna ma slawna.

¹⁰Naŋ li ɗekka hiɗi sle ma ɦuyumna kat Farawn, kat sa sunda valam kaf, kat sum sa hay nagat valam kaf, kay naŋ wi subur-tuwta vi sum sa Egiptena kat sumuna vuma'a, naŋ tiy semda vaŋu, ki naŋ li vaydi nala lo.

¹¹Naŋ ɓet niy-lumna goy voksiya, niy-lumna so goyo, nisi jik jaramu; may nisi sa ka digiɗsina naŋ cuksi gaa hay zul ma wiŋŋa, ki gi hiɗiyn hay niy ma zulla nala.

¹²Naŋ ɗigersi hay falayta hiɗi ɗugul ma ɗuŋusna, hay henjeta hiɗi ɗugul ma kuta kay fo liyn goy voksi hay henjeta, hay li ma nisi ka tuɗa.

¹³Naŋ jiki gaa'a kay hiɗiyt Sinay, naŋ lawsi ay kulo'o hay dukalawn pa, naŋ vulsi dita-gatta ta ɗigerta, hiɗi gatta ta gasita, ɗota-gatta hiɗi vun-ma-gatna ma jifiy ŋolo.

¹⁴Naŋ ɗeksi goy kay sabatna vaŋu ma peldetna, naŋ ɗo vun-ma-gatna vaŋu, dita-colita hiɗi gatta vaŋu naŋ ɗomu, naŋ vulum tisiya kaw hay ɓam Musus sa ma sunda vaŋu.

¹⁵Hay dukalawn pa naŋ vulsi funa hay li ma mayta ka cisiya, naŋ mun niyn ay goy hay hiɗiyn pa, hay li ma mayt ka cisiya, naŋ di tisiya kay nisi ma kal hay nagata ta naŋ yi va kaŋu kay naŋ min vulsiya.

¹⁶May nisiya hiɗi sumayma'a jigal tuwsiya, li yisi ɗeŋe, nisi min hum kuɗ vun-ma-gatna vaŋɗi,

¹⁷nisi min humaŋ vunaŋɗi, humsi min gisi kay ŋaata ta naŋ la' tisitɗi kaw. Nisi li yisi ɗeŋe, hay ŋel-vunda visiya, nisi tun mul kisiya kay hot hay gorvota visiya. May naŋu, naŋ mi Lawna ma vul gida, ma wi haw sumuna, ma li slugota kaw, naŋ muɗ ɦiy gosoyɗi, hobay hiɗi ŋaata, naŋ may noysi goyɗi kaw,

¹⁸hay li ma nisi yor goor-putna ma kawayna, nisi di'e: Zawni mi Lawna vigiya ma kalgiyay goy hay Egipte pa, hay li ma nisi kal tuwsi hay ŋulda ŋolda kataŋu,

¹⁹hay slugota vaŋ ta ŋolda pet, naŋ may noysi goy hay fuldaɗi, hay falayta ɗugul ma ɗuŋusna ka ɗigersi dok-dok hay hagata, hay henjeta ɗugul ma kuta ka ɗigersiya, ka fo hagata ta nisi tuɗ haya'ta goy voksi kaw.

²⁰Naŋ vulsi ŋusta vaŋu ta ŋaata kay poŋ ir slena, naŋ may tel manna vaŋu goy hay vunsiɗi, naŋ vulsi niyna a ci'e kay vat laata visiya kaw.

²¹Ir busat dok-fiɗi, naŋ ŋomsi ay hay fulda, va may kiɗa goy kisiɗi, sligara visi may jet goyɗi, sesi may holɗi kaw.

²²Naŋ vul nagata hiɗi jaf-sumuna hay gaŋeraŋa visiya, nisi yaw nagata vi jaf-sumuna, nagata vi Sihon, mulla vi Hesbon, nagata vi Og, mulla vi Basan.

²³Naŋ biya gurona visiya ki mislek ma dukalawna nala, naŋ kalsi hay nagata ta naŋ di tam sumaysiya kay nisi ma cuk haya.

²⁴Guron kayni kal ay kulo haya, nisi sli nagata; sum sa hay nagatna naŋ hotsi yisi gaa voksiya, kayni sa Kanaaniyana, naŋ vulsi goy hay ɓisiya, hiɗi muliyana visiya hiɗi sum sa hay nagata, kay nisi ma li tisi ki nisi min nala.

²⁵Nisi yaw hoyok-ziy ma gulmun talamna hiɗi naga ma ɗiwna; nisi yaw naga ma hobay hiɗi slen ma ŋaana kafe, kaara ma jugoɗayna, gulda-guldana, gu-olivena hiɗi gu ma vuɗ ŋolla; nisi ti'e hoba kaw, nisi ɗora, lak hay hobta kaw kuɗ ŋaata vaŋu ta ŋolda.

²⁶Nir na'ta kep nisi ŋel gatta, yaway kulo kataŋu, nisi muɗ ŋorsi kat gatta vaŋu, sa jobta vaŋu sa ka gatsi kay hotay taŋu nisi cisi goyo, nisi ŋulaŋ ŋolo.

²⁷Ki kayn nala naŋ vulsi goy hay ɓam sa gaw kisina sa ka curoɗsina. May hay li ma nisi ka vun zlata, nisi siwel taŋu; naŋ humsi ay hay dukalawn pa, hay slugota vaŋ ta ŋolda, naŋ vulsi sum sa butsi goyna sa suɗsi goy hay ɓam sa gaw kisina.

²⁸Hay li ma nisi fi tun-sukka, nisi hot li joota vok iraŋu. Ki kayn nala naŋ vulsi goy hay ɓam sa gaw kisina sa kol kisina. May sem mara lo, nisi siwel taŋu; naŋ humsi ay kulo hay dukalawn pa, hay slugota vaŋ ta ŋolda, naŋ suɗsi goy sem ŋolo.

²⁹Naŋ di tisiya kay nisi ma hotay tam gatta vaŋu, may nisi jigal tuwsiya, min hum vun-ma-gatna vaŋɗi, li suluk kay vun-ma-gatna vaŋu, vun-ma-gatna ma lak sumun iriya, la nisi li kuɗumu may nisi ŋel gatta, li yisi ɗeŋe, min humɗi.

³⁰Naŋ ziysiyawa ir busat ŋolo, naŋ gatsiyawa hiɗi ŋusta vaŋu kaw, hiɗi della vi sa jobta vaŋu, may nisi min jak humsiɗi. Ki kayn nala naŋ vulsiyawa goy hay ɓam sum sa pulla.

³¹Hay slugota vaŋ ta ŋolda, naŋ may vatsi goyɗi, naŋ may noysi goyɗi, kay naŋu mi Lawna ma li slugota, wi hawta kaw.

³²Wulin kayni, hih! Lawna vuma'a, Lawn ma ŋolla, ma dono'o hiɗi narta kuɗaŋ kaw, naŋ ma ŋom bonota hiɗi ŋaata, zumalda ta co kuma'at kayni naŋ ma ɗuwa' ki va goor ɦawa naɗi, numa'a muliyana vuma'a, sa ministrena vuma'a, muliyan-sa-ɗifinna vuma'a, sa jobta vuma'a, sumayma'a hiɗi sumuna vaŋ kaf, tun caw tam liyna vi muliyana vi Asiriya pa ta-ta vaydi.

³³Naŋ ay ɗigere hay slen kaf ma co tuma'a, kay naŋ ɗek tuwaŋ goy ɗigere, may numa'a, numa li jootawa.

³⁴Muliyana vuma'a, sa ministrena vuma'a, muliyan-sa-ɗifinna vuma'a hiɗi sumayma'a min li kuɗ gatta vaŋɗi, nisi min tun ŋalsi kat vun-ma-gatna vaŋɗi, tam di-goyta vaŋu ta naŋ vul tisiyaɗi kaw.

³⁵Hay li ma nisi ay hay mulda visiya, jar ŋaata ŋolda ta naŋ vul tisiya hay nagata ta hiriŋ hiriŋ' ta slen vuɗ haya' ŋolda, nisi min sunaŋɗi, min ja jarsi goy hiɗi lopna visi ma joonɗi kaw.

³⁶Vayd kayni numa muɗi gorvo'o. Wulini numa ka gorvo'o hay nagata ta naŋ vula' mi sumayma'a, kay nisi ma ti vuɗna va'a hiɗi sle haya'na.

³⁷Slen ma vuɗ hay nagat ŋolla nam vi muliyan sa naŋ vulma hay ɓisi gorvona, kuɗ sulukŋa vuma'a; ki nisi min nala, nisi ka ti mul kuma'a, kay farayna vuma'a, numa ka vun zlata ŋolda kaw.