Read Masana ESTER 1 Bible Online

ESTER 1 - Masana bible

ESTER 1

¹Labara namna kayni li'e hay liyna vi Asuwerus, Asuwerus namna ma mulda valam fokay hay Indiya pa ta-ta hay Etiopiya. Nam ka ti mulda kay nagat kis kalam dok-ma' yam siɗiya.

²Hay na'ta kayni mulla Asuwerus ka musi kay zlamda-mulda valamu, hay Susa, naga ŋolda.

³Hay busata ɦidita vi mulda valamu, nam li yuldeta ta ŋolda kay sa yerimana valamu hiɗi sa sunda valam kaf, kay sa sojena vi Persiya hiɗi Mediya kaf, kay sa ŋulona hiɗi sa guverner hay naga ma kuɗumna kafe.

⁴Nam ɗek gajijita vi farayna vi mulda valam goyo, hiɗi wileta vi ŋolda valamu ta ira' may waaɗita. Kayni mus ir buur ŋolo. Buur kis kalam dok-glafandi.

⁵Hay li ma buur namna vatawa, mulla kot tin kay sumun kaf goy jiy hay haraŋa, hay wur-daŋŋa vi mulda valamu, nam kot tin kay sumun kaf sa ka hay Susa, nagata vi mulda, nam kotom kay sa ŋulona hiɗi sa gurayna kaf.

⁶Sligara ma tuwam ɗoy hiɗi barawna, baraw haɓna hiɗi ɗuŋus fok-dimina ma goɗayna ka meɗay goy tam zigew ma haɓna hiɗi ma purpella, kali hay jaɓna ma doorona, juni kat dolla ma koti hiɗi hiɗiy ma wilena, slen ma musta koti hiɗi ora hiɗi doorona, nam lakay kulo kay nagana ma yalam koray slawi, haɓi, ciliŋi hiɗi wura'a kaw.

⁷Nisi ka ɓuraw sle ma cina hay kaway-ma-cina ma ora kuɗ jafam valamu valamu, vinna vi mulda ka ŋolo, kay gigekaw ci kuɗ minda valamu.

⁸Sumun kaf ci kuɗ minda visiya, ki mulla di nala, sa may li sa hiɗi donoɗi.

⁹Ca-mulda Vasti kaw ka li yuldeta kay boyna kalaf hay ziyna vi mulla Asuwerus.

¹⁰Hay buurta siɗiyata, hay li ma mulla dikam hobawa hiɗi vinna, nam di tam Mekuman, Bista, Harbona, Bigta, Abagta, Zetar hiɗi Karkas, sum sa patayna sa siɗiyana sa ka lakay vunamu kay sunumu,

¹¹kay nisi ma mar ca-mulda Vasti vok iramu, hiɗi bogorayna vi mulda tuni ka'a, kay ɗek jifiyta va' goy tam sumuna hiɗi sa yerimana, kay na' jifiy ŋolo.

¹²May ca-mulda Vasti min tap kuɗ sumun kayni kay tuɗ kat mullaɗi, nala mulla dikam ɓulaka, nam muɗ ɦiy ŋolo.

¹³Nala mulla job sa yalla sa wi ŋaɓta vi liyna. Kay labara vi mulla co vok nisi kaf sa wi gatta hiɗi sa ɗiger-lawta sa co talamna kafe.

¹⁴Sa ay kat mulla kayni: Karsena, Setar, Admata, Tarsis, Meres, Marsena, Memukan, sa yerimana vi Persiya hiɗi Mediya sa siɗiyana, sa hatay hiɗi mulla, sa lakay hay liyn ma vokŋa hay mulda.

¹⁵Mulla di tisiya: Nan cuk sa patayna kat ca-mulda Vasti, may na' min hum dita vanɗi, gatta as di mige ka'a?

¹⁶Memukan di vok mulla hiɗi sa yeriman kaf ala: Van kayni ca-mulda Vasti may lum kayn kat mulla kepɗi, may kat sa yerimana hiɗi sumun sa hay nagata ta kuɗaŋ naŋ mulla Asuwerus kaf.

¹⁷Kay ŋel-vunda vi ca-mulda kayni ma kal hay humda vi boyna kaf, kayni ma vulsi donota kay miyes jufaysiya, hay li ma nisi ma hum labara ala Asuwerus vul hagata tam Vasti kay co talamu, may na' min coɗi.

¹⁸Wulin kayni boyna vi yerimana sa hay Persiya hiɗi Mediya, hay li ma nisi hum ŋel-vunda vi ca-muldawa, nisi ma li ki kayn nala kaw kat sa yerimana sa hay mulda visiya: Ki kayn nala miyesta hiɗi panta ma li ɗawn ŋolo.

¹⁹Mulla, la van kayni kiraŋ ŋaa'a, dita vaŋu ma siwelis goyo, dita ta as mu'ɗi, na' ma liys ɗoy gaa hay gatta vi Persiya hiɗi Mediya, ala Vasti ma col vokaŋ naŋ mulla Asuwerus loɗi, a naŋ ma yaw mulda va' goyo, vula' mi cat kep jar boy sa kuɗa'na, ta ŋaa'a suwa' na'a.

²⁰Hay li ma sum sa kuɗ mulda vaŋ kaf hum dita vaŋ na'tawa, boyn kaf ma sli yam jufaysi kulo'o, tam sa ŋulon pa ta-ta tam sa gurayna.

²¹Dit kayni cuk kuɗ hay mulla hiɗi sa yerimana, nala mulla li kuɗ va ma Memukan dumna.

²²Nam gi ɗerwelda goy tam nagata ta kuɗumta kaf, tam nagata tarige kaw nam ɗo tisiya hiɗi ɗota visiya hiɗi vunna visiya, ala juf gigekaw ma li mi ma ŋolla vi ziyna valamu, nam ma lawam mi vunna vi jafna valamu kaw.