Read Masana ESTER 2 Bible Online

ESTER 2 - Masana bible

ESTER 2

¹Bugol slen kayni, ɦiyda vi mulla Asuwerus tun gaa'a. Humam gum kay Vasti, kay sle ma na' lumna, hiɗi varta ta nam var kay li ta'a.

²Sum sa joriyona sa ka sun mulla di'e: Nay ma gar mi mulla guro-boy sa bay bur tam sa tuwa, sa jifiy ŋolo.

³Sum sa li lopna hay nagata ta kuɗ mulda vaŋ kafna ma tok guro-boy sa jifiyna sa bay bur tam sa tuwa, marsi hay liyn ma lak boyna, hay Susa naga ŋolda, lakay kuɗ ŋomda vi Hegay, sa ma patayna vi mulla, ma ŋom boyna, vulsi slen ma muz-tuwna kaw.

⁴Goot-cata ta ir mulla va'ta ma ti mulda hay baŋal Vasti. Dita kayni firi dik mulla, nam li ki kayn nala.

⁵Hay na'ta sa mara kepe ay hay Susa, nagata ŋolda, semda valam ala Mardose, namu mi goora vi Yayir, goora vi Simey, goora vi Kis, hay jaf Benyamin.

⁶Nam ay jar sum sa Nebukadnesar mulla vi Babilon yawsiyays gorvona, sa yawsi hiɗi Yekoniya mulla vi Yudana.[1]

⁷Nam ka wul Hadasa ta ya' Ester, na' ti goota vi nasulumu. Bu'a hiɗi su'a mitiya. Goot-cat na'ta jifiy ŋolo. Hay mitta vi bu'a hiɗi su'a, nam va'a kay wula'a.

⁸Hay li ma dita vi mulla hiɗi ɗota valamu vul goy tam sumun kayni, guro-boyn ŋolo tokay hay Susa, nagata ŋolda, Hegay ka ŋomsiya. Ester kaw nisi mara' hay ziyna vi mulla, hay ŋomda vi Hegay sa ma ŋom boyna.

⁹Goot-cat kayni li kiram ŋaa'a, na' fi slugot vok iramu. Nam vula' sle ma kot tuwna kaf ma na' mina, hiɗi tin ma na' min kaf, nam vula' guro-boyna sa suna'na siɗiya, yawsiyay goy hay ziyna vi mulla pa, nam joka' hiɗi guro-boy nisina goy hay ziyna ma ŋaa suwa ma lak boyna.

¹⁰Ester min pat dir sumuna va' goyɗi, jafna va'ɗi kaw, kay Mardose da' kay na' ma di goyɗi.

¹¹Hay buurta buurta kaf Mardose ka co vun liyn ma boyn ka tokay hayna, kay ɗuw ala Ester ka nanige, nisi ka kota' tuwa' kottige kaw.

¹²Gatta vuli ala guro-boyn ma kot tuwsi ir busat kep, nisi as set tuwsi hiɗi mula miir* ir til karkiya, nisi as set tuwsi hiɗi urdina, kot tuwsiya ir til karkiya kaw, hay li ma til doogo yam ma' vatawana, guro-boyna as vurna tuwsi vok ir mulla may.

¹³Hay li ma goot-cat min tuɗ kat mulla, slen ma hay ziyna vi boyna ma na' jobom kafna as vula'ta, kay na' naram ka'a hay ziyna vi mulla.

¹⁴Na' tuɗ talamu hay vulatita, hay graw culumta, na' kal goy hay ziyna mara'a ma boyna sa sunda vi mulla ka tuni haya hay ŋomda vi Saasgaz ma patayna vi mulla ma ŋom boy sa sunda. La mulla may joba'ɗi, ya' hiɗi se'ɗi kaw, na' may hotay talam loɗi.

¹⁵Ester goota vi Abigayil, ɓasum Mardose ma wula'na, liyn asawa kay na' co vi mulla. Slen ma Hegay ma patayna vi mulla ma ŋom boyna vula'tina na' min job va suw kalamɗi. Ester na' kir sumun kaf ŋaa ŋolo.

¹⁶Nisi co vi Ester kay tuɗa' hay ziyna vi Asuwerus hay ziy ma mulda hay til ma doogona, ma yum ala Tebet*, hay busata siɗiyata vi mulda valamu.

¹⁷Mulla min Ester suw boy segena kafe, na' kiram ŋaa'a, nam la' slugot suw boy segen kafe kaw. Nala nam tun bogorayna vi mulda ka'a, tuna' mulu hay baŋal Vasti.

¹⁸Mulla li yuldeta ŋolda mi yerimana hiɗi sa sunda valam kaf kuɗ Ester, nam vul tun-sukka mi nagata valam kafe, vul slena ma ŋaana vi mulda goyo kuɗ minda valamu kaw.

¹⁹Hay li ma nisi dak guro-boyna hay sem ma ma'na, Mardose ka jar sa tokay hay faatana vi mulla.

²⁰Ta-ta wulini Ester min pat dir jafna va' goyɗi, ki Mardose di ta' nala, Ester ka li kuɗ dita vi Mardose, ki na' ay hay gaŋeraŋa valam dok-dok nala.

²¹Hay li ma Mardose ka musi hay faatana jar sum sa mulla yisina, sum sa patayna vi mulla ma', sa ŋom vun-galana vi mulla, Bigtan hiɗi Terek, hay ɦoyta visi ta ŋolda, nisi var kay ci mulla Asuwerus goyo.

²²Lawta kayni co hay humda vi Mardose, nam di law na'ta mi ca-mulda Ester, Ester di law na'ta mi mulla hay semda vi Mardose.

²³Nisi fek caw law na'ta, na' gasiya. Nala sum sa patayna sa ma'na nisi ɓalsi kulo kat guna. Van kayni nisi ɗom hay ɗerwella vi Labar-Ma-Liyna, vok ir mulla.