Read Masana ESTER 3 Bible Online

ESTER 3 - Masana bible

ESTER 3

¹Bugol slen kayni, mulla Asuwerus vul gaŋeraŋa mi Haman goora vi Hammedata, ma Agagitna, nam muɗum kulo ŋolo, nam muɗum kulo ŋolo kay sa yerimana sa ay ŋray hiɗi namna kafe.

²Sa sunda kaf sa ka tokay hay faatana vi mulla ka girif gaa'a kay subur Haman. Mulla kay tuwamu vul hagat ki kayni nala. May Mardose min girif gaaɗi, dab vokom gaaɗi kaw.

³Sa sunda vi mulla sa ka tokay hay faatana vi mulla di tam Mardose: Naŋ min li kuɗ vun-ma-gatna vi mullaɗi kay mige?

⁴Nisi ka jobom nala hay buurta kafe, may nam min humsiɗi. Nisi vul labara mi Haman kay ɗuw ala Mardose ma jok varta valam klasige. Kay nam disi goy jew ala nam mi sa ma Yudiyana.

⁵Hay li ma Haman wi ala Mardose may girif gaa'a kay slum yalam kuloɗi, nam hob hiɗi ɦiyda ŋolo.

⁶Nam ɗuw ala la nam cum goy mi Mardose valam kepe ni, kayn kiɗaya. Kay nisi dum kay jafna vi Mardose, Haman vara kay ci sumuna vi Mardose sa Yudiyana sa ka hay nagata vi Asuwerus goy kafe.

⁷Hay til ma jewna, ma yum ala tilla vi Nisan*, hay busata doogo yam ma'ta vi mulla Asuwerus, vok ir Haman, nisi li pur, kayni di'e: ŋaɓta kuɗ ɦayta, nisi li ŋaɓta kay buurta kaf, fok tam til ma jewn pa, ta-ta tam til ma doogo yam ma'na, kayni mi tilla vi Adar.

⁸Haman di tam mulla Asuwerus ala: Hay mulda vaŋu, jaf mara ka'a, nam ɦeleŋe[2] jar sum segen kaf, goy ir valamu hay mulda vaŋ kafe; gatta visiya goy va'a hiɗi jaf-sum segena, nisi may hum kuɗ gatta vi mulla noŋɗi, kayni may ŋaa'a kay hinsi hay tun-sukka loɗi.

⁹La naŋ mulla mina, naŋ ma ɗo gatta kay vatsi goyo, nala nan ma tar gurjuta ir talente* birim doogo hay ɓam sumuna vaŋ sa lopna, kay cuka' hay timgilla vaŋu.

¹⁰Mulla pat wayta ta ɓalamta, nam vula' mi Haman goora vi Hammedata, ma Agagitna, sa ma gaw kay sa Yudiyana.

¹¹Mulla di tam Haman, gurjuta na' vaŋu, sumun kaw, laŋ va ma kiraŋ ŋaana.

¹²Hay buurta doogo yam ɦidita vi til ma jewna, mulla yi sa ɗota valam kaf, sle ma Haman vulsi gatta kalamna nisi dum goy tam sa ŋarmanna vi mulla kaf, tam sa guvernera vi naga ma kuɗumna kaf, hiɗi sa yerimana vi jaf-sumun kaf, tam nagata tarige kaw hiɗi ɗota va'a va'a, tam jaf marige kaw hiɗi vunna valamu valamu. Nisi ɗom kayni hiɗi semda vi mulla Asuwerus, tun tampoŋ kalamu hiɗi wayta vi mulla.

¹³Ɗota jokay goy hay nagata vi mulla kaf, ala nisi ma ci sa Yudiyana goyo, vatsi goyo, ɦilifsi goy kafe, guro sa joriyona hiɗi sa maariyana, gurosgurayna hiɗi boyna, vatsi goy hay buur kep, hay buurta doogo yam ɦidita vi til ma doogo yam ma'na -- kayn mi tilla vi Adar. Nala farayna visi kaf sumun as tum goy ɓuraŋi.

¹⁴Ɗerwelda na'ta ka ɗoy goy hay nagata kaf, kay vula' goy haraŋi kir sumuna kaf a nisi ma lak hiɗi tuwsi kotiya hay buur namna.

¹⁵Labara kali goy gosoyo kuɗ va ma mulla di'e, labara namna ɓakay goyo hay Susa, naga ŋolda. Mulla hiɗi Haman lakay gaa'a kay ti'e. Sum sa hay hoyok-ziyna kaf ka hay tiyna.