Read Masana ESTER 6 Bible Online

ESTER 6 - Masana bible

ESTER 6

¹Hay henjet na'ta, mulla kal senɗi, nam vul dita kay nisi ma maram ɗerwelda vi slen kaf ma liy jewna, hiɗi labar ma liyna kaw, kay jaŋam vok iramu, nisi jaŋam goy vok mulla.

²Nisi fi labara ɗoya kay slen ma Mardose dum goyo kay Bigtan hiɗi Terek, sum sa patayna vi mulla sa ma'na, sa ŋom vun-galana, sa gar kay ci mulla Asuwerus goyo.

³Mulla di'e: Suburta hiɗi ŋolda mige ma Mardose fi kuɗ kayni? Sa sun mulla hot dita: sa may vulum ŋolda kuɗ kaynɗi.

⁴May mulla di'e: Hay wur-daŋ klan mi gige? Dolay ka co wur-daŋŋa kayn mi Haman, hay tani Haman co tam mulla kayni kay jobom kay Mardose, kay nam min ɓalam kulo kat guna ma nam kotomna.

⁵Sa sunda di'e: Tuɗ hay daŋŋa kilan mi Haman. Mulla di'e: Hinim kali kalafi.

⁶Haman kali kalafi tam mulla. Mulla di talamu: Sa ma mulla min slum yalam kulona ma lum talam mi mige? Haman di hay dikam kalaf ala: Sa mara ma mulla min vulum ŋolda suwan nanu ka lo su?

⁷Haman di tam mulla: Sa ma mulla min vulum ŋolda?

⁸Yaw sligara vi mulla ma mulla cukumna, ɓem kay kulum ma mulla ɓe kalamna, tunum jakawata vi mulda kalamu may,

⁹vul sligara namna hiɗi kulumna hay ɓam sa ma ŋolla vi mulla mara kep, bugolda cuk sligara tam sa ma mulla vulum ŋolda, poyom hiɗi kulumna hay liy ma musta vi hoyok-ziyn kaf, siwel vokom ala: sa ma mulla min vulum ŋolda lum ki kayn nala!

¹⁰Mulla hot dit tam Haman: Tuɗaŋ gosoyo, yawaŋ sligara hiɗi kulumna ki naŋ di nala, naŋ ma li ki kayn nala kat Mardose sa ma Yudiyana, ma ka musi hay faatana vanu, yaŋ ma jok va kep kaw kuɗ slen ma naŋ dumnaɗi.

¹¹Haman yaw sligara cukum tam Mardose, nam ɓem kay kulumna kaw, poyom hiɗi kulumna hay hoyok-ziyna, hay liyn ma musta, ka siwel vokom ala: sa ma mulla min vulum ŋolda lum ki kayn nala!

¹²Bugolda, Mardose hot hay faatana vi mulla, may Haman li tuwam koloyo kay kal vo'o, dikam kaaya, yalam bariya kaw.

¹³Haman vi labar ma li talamna mi cata valamu Zerek hiɗi sa boniyomna kafe. Sa vulum gatta hiɗi cata valamu Zerek di talamu: Mardose namna ma naŋ tun caw muɗ pusluri vokomna kayni, la nam mi Yudiyana, naŋ ma col kulo vokomɗi. Naŋ ma nig gaa vok iramu kay dok-doko.

¹⁴Hay li ma nisi ka law hiɗi namu, sa patayna vi mulla co'o; nisi li tuwsi gosoyo kay tuɗ Haman hay tina ma Ester kotomna.