Read Masana ESTER 7 Bible Online

ESTER 7 - Masana bible

ESTER 7

¹Mulla hiɗi Haman co'o hay ziyna vi ca-mulda Ester kay ti hiɗi na'a.

²Hay buur na'ta ta ma'ta lo, hay li ma nisi ka ci vinna, mulla di tam Ester: Ca-mulda Ester: Jobta vagu anige? Siɗawta vagu ti mige? Nan as vulakga. Nak min siɗawam mi mige? La ti gal mulda van kaw, nan as vulakga.

³Ester hot dita: Mulla, la nan fi slugotawa vok iraŋu, la kayni kiraŋ ŋaa'a, kayni ti jobta vanu: Naŋ ma hinan iri hinge; siɗawta van kayni kay irita vi jafna vanu may.

⁴Kay nanu hiɗi jafna vanu numa gusi goyo kay vatma goyo, kay cuma goyo, kay ɦilifma goyo. Numa'a kaf, jufayna hiɗi boyna, la gusma gusi goyo kay sumun luma gorvo ɦawa'a ni, nan as di vaɗi. May sa ma gawta as wurak joota ta nam la' taŋga ɗawnɗi.

⁵Mulla Asuwerus sli ditiya di tam ca-mulda Ester: nam mi gige? Nam ma dikam hobay kay li van kayni ka arige?

⁶Ester hot dita: Sa ma joona ma gawta kayni mi Haman, Haman namna sa ma joon damni! Ki kayn nala Haman yor hokok' vok mulla hiɗi ca-mulda Ester.

⁷Hay li ma mulla muɗi ɦiy dono ŋolo, nam hin liyn ma tina koloyo, kali goy hay wur-daŋŋa vi mulda. Haman hin musi dam, ka tiy tam Ester kay na' ma suɗum goyo, kay nam wi goy haraŋ ala varta vi mulla coli vatiya kay bam iram goyo.

⁸Hay li ma mulla hotay hay wur-daŋŋa vi mulda pa, nam kal kalaf hay ziy ma tina, hay na'ta nam fi kayni Haman ka guɗofi gaa tam va ma musta vi Ester. Mulla ka siwela: Naŋ min bur hiɗi cata van dono vok iranu hay ziyd zawn lo su? Hay li ma lawt kayni kali goy hay vun mulla pa, nisi jun sligara kir Haman.

⁹Harbona kep jar sa patayna vi mulla, di tam mulla: Mulla, Haman kot gun kep hay ziyna valamu, kay ɓal Mardose ma di ŋaat kaŋŋa talamu. Gu namna fiyokka valamu ir goldoŋ dok-vasl. Mulla di'e: Ɓal Haman talamu.

¹⁰Nisi ɓal Haman kat guna ma nam kotomu kay Mardose. Nala ɦiyda vi mulla hot tun gaa'a.