Read Masana ESTER 8 Bible Online

ESTER 8 - Masana bible

ESTER 8

¹Hay buur na'ta de', mulla yaw ziyna vi Haman ma gaw kay Yudiyana, nam vulum mi Ester. Mardose co vok mulla, kay Ester ɗekem kay sugol ma jara' hiɗi Mardosena.

²Nala mulla pat wayta ta nam ga' ɓam Hamanta goyo, nam vula' mi Mardose. Nala kaw Ester tun Mardose vo hay ziyna vi Haman.

³Ester may vat nala deɗi, na' sli ditiya vok mulla, na' gi tuwa' gaa gayamu ka tiya, na' jobom kay nam ma li slugota lo kay nam ma vat ɗerwelda joota vi Haman ma Agagitna goyo, kay lawta ta nam kota' kay ci sa Yudiyan goyta.

⁴Mulla ɗek zugulda valam mi Ester. Ester fok kulo'o, col kulo vok mulla.

⁵Na' di'e: la van kayni kiraŋ ŋaa'a, la nan fi slugotawa vok iraŋu, la van kayni cuk kuɗ hayaŋ naŋ mulla, la nan kiraŋ ŋaa'a, ɗerwelda ta Haman goora vi Hammedata ma Agagitna ɗo' goyo kay vat sum sa Yudiyan sa hay nagatna vaŋ kaf goyn kayni, naŋ ma ɗo ɗerwel tara'a kay tel ta jewta.

⁶Kay nan as mus bay lawi hay li ma sumuna van ka vun lawta ɗawn mustige? Awa, nan as mus bay lawi hay li ma jafna van ka vat goyo kayni may asɗi.

⁷Mulla Asuwerus di tam ca-mulda Ester hiɗi Mardose ma Yudiyana: Wulin kayni nan vul ziyna vi Hamanawa mi Ester, namu ɓalay kulo kat guna kay nam gar kay ci sa Yudiyana.

⁸Wulin kayni, ɗogi va ma ɗuw kirgi ŋaa'a kay sa Yudiyana hay semda vi mulla, tungi tampoŋŋa mulda vanu kalamu. Kay ɗerwelda ta ɗoy hay semda vi mulla, tampoŋŋa vi mulla tuni ka'a kaw, kayni sa as kusa'ɗi.

⁹Hay buur na'ta de', nisi yi sa ɗota vi mulla, kayni hay buurta dok-ma' yam ɦidita vi til ma ɦidina ma yum ala Sivan*. Slen ma Mardose dum kay sa Yudiyana kaf tam sa ŋarmanna, sa guvernera, tam sa yerimana hay nagat kaf, fokay hay Indiya pa ta-ta hay Etiopiya, nagat kis kalam dok-ma' yam siɗiya, tam nagata tarige kaw hiɗi ɗota va'a, jaf marige kaw hay vunna valamu valamu, tam Yudiyana suw pete hay ɗota visiya hiɗi vunna visiya.

¹⁰Nisi ɗo ɗerwelda hay semda vi mulla Asuwerus, nisi tun tampoŋŋa vi mulda ka'a, cuk sumuna hiɗi ɗerwelda, nisi ɓey kay kulumayna, kulumay-ŋurmana ma varay goyna.

¹¹Hay ɗota na'ta mulla vul gatta tam sa Yudiyana sa hay hoyok-ziyn kaf, kay tok yam tuwsiya kay suɗ irita visiya, kay vat sa gawta, kay cisi goyo, sojena vi hoyok-ziyna kaw sa min lassiya, nisi as kay cisi goyo. Nisi as ci gurosgurayna hiɗi boyna kaw. Nisi as vurumsiya kay ti slen ɓuraŋi.

¹²Kayni ma li hay buur kep ɦawa, hay nagata vi mulla Asuwerus kuɗulu, buurta doogo yam ɦidita vi til ma doogo yam ma'na, ma yum ala tilla vi Adar*.

¹³Ɗerwel na'ta ka ɗoya kay ɓurawa' goy hay nagat kafe, ɗota na'ta ma jaŋa' goy kir sumun kafe, kay sum sa Yudiyana ma lak hiɗi tuwsi kotay hay buur na'ta kay job yisi tam sa gawt kisina.

¹⁴sa sunda sa ɓey kay kulumay-ŋurmana ma varayna, kali goy koloyo, nisi yaway jaŋi, kuɗ gatta vi mulla, gatta kayni meray goy hay Susa, naga ŋolda kafe.

¹⁵Mardose vi tuwam goy vok mulla, cuki hiɗi sligar ma mulda talamu, sligar ma goɗiya, haɓi kaw, hiɗi jakawata ta ŋolda ta ora, hiɗi sligar-tuwna ma haɓaya, ma purpella kaw. Hoyok-ziyna Susa ka hobay hiɗi firita ta ŋolda.

¹⁶Hay buur namna kayni, sum sa Yudiyana hobay hiɗi firita, ka ciriya kay haysi sleɗiya kay kolda visiya.

¹⁷Hay nagat kaf, hay hoyok-ziyn kaf, hay liyn kaf ma gatta hiɗi dita vi mulla na'ta co haya, sum sa Yudiyana ka hiɗi firita, ka ciriya, ka li yuldeta kaw kay kayni mi buur ma yuldeta visiya. Sum segena ŋolo jarsiya hay nagata muɗ tuwsi goy Yudiya'a, kay narta kuɗ sa Yudiyana kal hay diksiya.